Wema Ŋkɔtɔ ci Woŋwlɛ Ðaɖa Korɛntitɔwo
11 Míwa anyitɔ han shigbe lé nyɛ can ŋwakɔ Kristo tɔ han nɛ.
2 Ŋkanfukɔ mí, ɖo míɖonɔ ŋwiŋ le enuwo pleŋ mɛ yí wa ɖaŋ wakɔ do enu ciwo pleŋ yí ŋkpla mí ji. 3 Vɔ ŋji mɔ míanya mɔ, Kristo yí nyi eta nɔ ŋsu ɖeshiaɖe yí ŋsu nyi eta nɔ nyɔnu yí Mawu nyi eta nɔ Kristo. 4 Nɔ ŋsu ɖe sɔ nu cɔn ta gbɔxwe yí dokɔ gbe ɖaɖa alo nukɔ enyɔ ɖɛɔ, édo ŋkpɛn mɛ ci yí nyi eta ni. 5 Vɔ nɔ nyɔnu ɖe dokɔ gbe ɖaɖa alo nukɔ nyɔ ɖɛ yí desɔ nu cɔn taɔ, édokɔ ŋkpɛn mɛ ci yí nyi eta ni, ɖo ele shigbe nyɔnu ci yí xlɔ ta nɛ. 6 Nɔ nyɔnu ɖe desɔ enu cɔnnɔ taɔ, éɖo akpa ɖa, vɔ ci enyi ŋkpɛn nɔ nyɔnu mɔ akpa ɖa alo axlɔ taɔ, éɖo acɔn nu ta.
7 Ŋsu deɖo asɔ nu cɔn ta o, ɖo Mawu wɛ yí eɖyi yiŋtɔ yí gbenyi kanfukanfu yitɔ, vɔ nyɔnu nyi kanfukanfu nɔ ŋsu. 8 Ðo ŋsu deto so nyɔnu mɛ o, vɔ nyɔnu yí to so ŋsu mɛ. 9 Gbesɔ kpe niɔ, denyi ŋsu yí wowa do nyɔnu ŋci o, vɔ nyɔnu yí wowa do ŋsu ŋci. 10 Eyi taɖo nyɔnu ɖo asɔ nu cɔn ta keŋ asɔ dasɛ mɔ yele mɛɖe cɛkpakpa gɔnmɛ, sɔ kudo mawudɔlawo ŋci.
11 Ganŋke le Axwetɔ lɔ mɛɔ, nyɔnu dali nɔ ŋsu tɔ dɛn le mɛ o, ahanke ŋsu dali nɔ nyɔnu tɔ dɛn le mɛ nɛ. 12 Ðo shigbe lé nyɔnu to so ŋsu mɛ nɛɔ, ahanke nyɔnu can ji ŋsu nɛ, vɔ Mawu yí wa enuwo pleŋ. 13 Míwoŋtɔwo míkpɔ enyɔ lɔ ɖa: Esɔgbe mɔ nyɔnu ado gbe ɖaɖa nɔ Mawu yí dasɔ enu cɔn taa? 14 Xexe lɔ ŋtɔ dekpla mí mɔ nɔ eɖa jinjin nɔ ŋsu ɖeɔ, ŋkpɛn enyi ni ba? 15 Gan yí nɔ eɖa jinjin nɔ nyɔnu yɛɔ, bubu enyi ni ba? Ðo eɖa yí wona nyɔnu nɔ acɔn eta ni. 16 Vɔ nɔ mɛɖe ji mɔ yeadɔn nyɔ so nyɔ cɛ nuɔ, enyɔ bu ɖe dele mì shi mìanu ni o yí eɖe dele Mawu hamɛ lɔ shi hɛnnɛ o.
17 Ci ŋnakɔ enukplamu cɛwo míɔ, denyi kan ŋkanfukɔ mí o; ɖo nɔ míbɔ dojuɔ, enuwo denyɔnɔ doji o, vɔ nyi wonyinanɔ doji. 18 Ðo ŋkɔŋkɔtɔɔ, ŋse mɔ nɔ mívabɔ doju le hamɛ lɔ mɛɔ, mamawo nɔnɔ mí mɛ yí ŋkando ji mɔ enyɔ ciwo ŋse ɖewo nyi nyɔnɔnwi. 19 Mama anɔ mí mɛ dandan, vɔ ecɛ adɔ yí woakpɔ mɛ ciwo nu yí jɔ ji nɔ Mawu petii.
20 Nɔ míbɔ dojuɔ, denyi Axwetɔ Fiɛfi Ŋɖuɖu lɔ míɖunɔ ŋtɔŋtɔ o. 21 Ðo nɔ ega lɔ xo yí míaɖuiɔ, mɛɖekaɖeka ɖunɔ yi ŋɖuɖu doŋkɔ, gan yí shive aciciɛ mɛɖewo yí mɛbuwo nunɔ aha mu. 22 Axwe ciwo mɛ míanɔ yí aɖu nu yí agbenu dele mí shi ba? Alo mígbalikɔ Mawu hamɛ lɔ yí dodoɔ ŋkpɛn mɛ ciwo shi ŋɖe dele yɔa? Enyɔ ci nanu nɔ mí yɛɔ? Makanfu mí yɔa? Oo, ŋdakanfu mí le ecɛyɛ mɛ o.
23 Ðo enu ci ŋxɔ so Axwetɔ lɔ gbɔ yí ŋsɔ jo nɔ mí mɔ, ezan ci mɛ yí wojikɔ asa Axwetɔ Yesu leɔ, ésɔ kpɔnnɔ ɖeka 24 yí do akpe do ji, éŋi mɛ keŋ yí nu mɔ: “Ecɛ le dumɛ nɔ anyi lankpu ci wosɔ na do ta nɔ mí. Míwanɔ ecɛ asɔ ɖonɔ ŋwiŋ.” 25 Ci woɖu fiɛfi ŋɖuɖu lɔ ɖegbɔɔ, ésɔ kɔnkpu ɖeka ci mɛ vɛn le hɛnnɛ yí nu mɔ: “Kɔnkpu cɛ le dumɛ nɔ enublabla yoyu ci wowa toto anyi hun ji. Míwanɔ ecɛ asɔ ɖonɔ ŋwiŋ hweɖekpokpuinu ci míanui.” 26 Ðo hweɖekpokpuinu ci míaɖu kpɔnnɔ cɛ yí anu vɛn cɛɔ, míakpɔtɔ adradra eku Axwetɔ tɔ lɔ keke ana nɔ hwenu yí ava.
27 Eyi taɖo nɔ dele mɔ mɛɖe aɖu kpɔnnɔ lɔ alo anu vɛn le Axwetɔ lɔ kɔnkpu mɛ gbɔxwe yí wɛkɔɔ, éje agɔ do Axwetɔ lɔ lankpu koɖo yi hun. 28 Gbɔxwe mɛɖe aɖu kpɔnnɔ lɔ yí anu vɛn lɔɔ, éɖo abu tamɛ kpɔ so yiɖeki nu nywiɖe doŋkɔ. 29 Ðo nɔ mɛɖe ɖuikɔ yí gbenuikɔ gan yí debu tamɛ kpɔ so enu ci lankpu lɔ nyi nu nywiɖeɔ, anyi yiŋtɔ kojoɖoɖo yí eɖukɔ yí gbenukɔ ahan. 30 Ecɛ yí na taɖo amɛ sugbɔ gbɔjɔ yí lé dɔ̀ yí amɛ sugbɔ ku le mí mɛ.* 31 Vɔ nɔ mìyi mìwoɖekiwo mɛ kpɔ nywiɖeɔ, wodaɖo kojo nɔ mì o. 32 Ele ahan gan, nɔ woɖo kojo nɔ mìɔ, anyi Yehowa* yí gbe enyɔ nɔ mì keŋ nɔ woŋgbevado hwɛ mì sɔ bɔdo xexe lɔ nu o. 33 Eyi taɖo nɔvinyɛwo, nɔ mívabɔ doju yí aɖuiɔ, mínɔnɔ te kpɔ míwonɔnɔwo. 34 Nɔ shive ci mɛɖeɔ, le ɖu nu le axwe mɛ keŋ nɔ mívabɔ dojuɔ, woŋgbevaɖo kojo nɔ mɛɖe o. Vɔ nɔ ŋvava mí gbɔɔ, nakpɔ nyɔ kpɛtɛwo gbɔ.