Wema Ŋkɔtɔ ci Woŋwlɛ Ðaɖa Korɛntitɔwo
2 Eyi taɖo nɔviwo, hwenu ŋva mí gbɔɔ, ŋdenu enyɔ ganganwo alo yí zan nunya ci yí wugan mí yí sɔ xo nuxu so Mawu nyɔwlawla kɔkɔɛ lɔ nu nɔ mí o. 2 Ŋɖui mɔ ŋdaxo nuxu so nubu ɖe nu sɔ zeto Yesu Kristo koɖo lé wokin do aci nu do nu o. 3 Hwenu ŋva mí gbɔɔ, ŋgbɔjɔ, vɔnvɔn leleɛŋ yí ŋhunhunkɔ sugbɔ. 4 Anyi nyɔwo koɖo Mawu nyɔ ci ŋnukɔ dele shigbe enyɔ ciwo wemanyatɔwo nunɔ yí asɔ ʒinkɔ do amɛwo ji nɛ o, vɔ anyi nyɔ lɔwo dadasɛ ŋsɛn ci yí le Mawu gbɔngbɔn lɔ nu 5 keŋ nɔ míwo xɔse ŋgbenɔ agbetɔ ŋɖɛnyanya ji o, vɔ anɔ Mawu ŋsɛn ji.
6 Mɛ ciwo yí shin yí mìxoxoɔ nuxu nɔ so nunya nu, denyi nunya ci yí so xexe* cɛ mɛ alo egawo nunya ci yí avatrɔ enugbali nu mìxoxoɔ nuxu so o. 7 Vɔ Mawu nunya ci yí le enyɔwlawla kɔkɔɛ ɖeka mɛ nyɔ yí mìnukɔ, nunya ci wosɔ wla ɖɛ yí Mawu wa toto so nu daɖɛ so gbeɖegbe* nɔ kanfukanfu mìwotɔ. 8 Ega ciwo yí le xexeɛ* mɛ ɖekpokpui demɔŋje nunya cɛ mɛ o, nɔ womɔŋje mɛ saɔ, wodakan mìwo Xwetɔ gangan Yesu do aci nu o. 9 Shigbe lé woŋwli ɖɛ nɛ mɔ: “Enu ciwo yí ŋkuvi dekpɔ kpɔ o, enu ciwo yí eto dese kpɔ o alo enu ciwo yí deva susu mɛ nɔ agbetɔ kpɔɔ, wowo yí Mawu dra do ɖɛ nɔ mɛ ciwo yí luin.” 10 Mìwo yí Mawu dasɛ wo nɔ to yi gbɔngbɔn ji, ɖo gbɔngbɔn lɔ jinɔ dwi nɔ enuwo pleŋ kpɔ keke je Mawu nuwlawla ciwo yí le citocito tɔxu ŋtɔkpu ji.
11 Mi yí nya ŋci yí le agbetɔ mɛɔ? Agbetɔ lɔ ŋtɔ gbɔngbɔn ɖekɛ yí nya. Nɛnɛke mɛɖe denyanɔ Mawu nuwo sɔ zeto Mawu gbɔngbɔn lɔ ŋtɔ nu o. 12 Denyi xexe lɔ gbɔngbɔn yí mìxɔ o, vɔ gbɔngbɔn ci yí so Mawu gbɔ yí mìxɔ keŋ nɔ mìatɛnŋ anya enu ciwo yí Mawu na mì xomɛvutɔ. 13 Enu cɛwo nu yí mìxonɔ nuxu so hɛnnɛ; denyi ŋɖɛnyanya ci mìkpla le agbetɔwo gbɔ yí mìsɔ xonɔ nuxu o, vɔ ci gbɔngbɔn lɔ kpla mì yí mìsɔ xonɔ nuxu. Eyi mìsɔ gbɔngbɔn mɛ nyɔwo sɔ drenɔ gbɔngbɔn mɛ nuwo mɛ.
14 Mɛ ci agbetɔ susu dadasɛ emɔ nɔ datɛnŋ axɔ enu ciwo yí so Mawu gbɔngbɔn mɛ o, woɖyinɔ sukunuwo doŋ ni; datɛnŋ amɔŋje wo mɛ o, ɖo Mawu gbɔngbɔn lɔ yí kpenɔdo amɛ nu gbɔxwe womɔnɔŋje wo mɛ. 15 Gan mɛ ci gbɔngbɔn lɔ dadasɛ emɔ nɔ jinɔ dwi kpɔ nɔ enuwo pleŋ yí mɔnɔŋje wo mɛ, vɔ mɛɖe detɛnŋ yí mɔnɔŋje yiŋtɔ mɛ o. 16 “Mi yí tɛnŋ jeshi Yehowa* susu keŋ akpla nu yiɔ?” Mìwoɔ, Kristo susu yí le mì shi.