Apotruwo Dɔwawawo
24 Le ŋkeke amatɔn goduɔ, avɔnsatɔ gangantɔ Ananiasi koɖo jumɛga ɖewo sɔ kpe nɔ etahwlɛnnamɛtɔ* ci yí tɔ mɔ Tɛtulusi va yí nu ehwɛ ciwo wodokɔ Pɔlu nɔ ejujikpɔtɔ lɔ. 2 Ci wona nuxu Tɛtulusi ɔ, étɔ ehwɛ dodo Pɔlu yí nu mɔ:
“Mɛgan Bubutɔ Felisi, eo yí na yí mìkpɔ fafa sugbɔ yí susu ciwo yí èɖe dɔ yí enuwo trɔkɔ yí gbenyɔkɔ doji le eju cɛ mɛ, 3 eyi mìdokɔ akpe gangan nɔ eo hweɖekpokpuinu le fishiafi. 4 Vɔ nɔ ŋdagu gamɛ nɔ eo gbaliɔ, ŋɖekɔ kuku nɔ eo mɔ eɔ le wa xomɛvu nɔ mì yí ase enyɔ kleŋ ci mìjikɔ anu. 5 Ðo mìkpɔ mɔ ŋsu cɛ nyi enugbleju* yí na yí eʒin tɔnkɔ le Ʒuifuwo pleŋ mɛ le nyigban lɔ keŋkeŋ ji. Ényi Nazarɛtitɔwo sɛnsɛn ŋkɔnɔtɔ ɖeka. 6 Étekpɔ hɛnnɛ mɔ yeaxo ɖyi gbedoxɔ lɔ, eyi taɖo mìli. 7* —— 8 Nɔ eoŋtɔ èbiɔ nyɔwo yi seɔ, àkpɔ mɔ ehwɛ ciwo pleŋ mìduiduiɛ nyi nyɔnɔnwi.”
9 Eyi Ʒuifuwo pleŋ can lɔn do ji mɔ, enyɔ cɛwo nyi nyɔnɔnwi. 10 Ci ejujikpɔtɔ lɔ wa alɔ̀ nɔ Pɔlu mɔ le xo nuxuɔ, énu mɔ:
“Ŋnya nywiɖe mɔ ènyi kojoɖotɔ nɔ eju cɛ na nɔ exwe sugbɔ, eyi taɖo ŋlɔn mɔ maxo nuxu asɔ hwlɛn eta nɔ nyɛɖeki. 11 Ŋkeke 12 han yɛ yí ŋva Ʒerusalɛmu keŋ asɛn Mawu, èhɛn àji gɔnmɛ kpɔ ni eoŋtɔ. 12 Wodekpɔ yí ŋdɔnkɔ nyɔ koɖo mɛɖe le gbedoxɔ lɔ mɛ alo dɔ yí eʒin tɔn le amɛwo mɛ le Ʒuifuwo nukplaxuwo alo le eju lɔ mɛ o. 13 Wodatɛnŋ adasɛ le elɛ hɛnnɛ mɔ, ehwɛ ciwo wododoɔŋ kakacɛ yɛ nyi nyɔnɔnwi o. 14 Vɔ ŋlɔnlɔn do nyɔ cɛ yɛ ji le ŋkɔ nɔ eo mɔ, ŋwakɔ sɛnsɛndɔ kɔkɔɛ nɔ tɔgbinyɛwo Mawu yí lé ŋwɛwɛ do yí nyi ŋci woyɔkɔ mɔ sɛnsɛn klandoakpo, ŋkando ŋciwo pleŋ yí le Ese lɔ mɛ koɖo ŋciwo enyɔnuɖɛtɔwo ŋwlɛ ji. 15 Ŋkpɔkɔ emɔ shigbe lé hanci mɛ cɛwo can kpɔkɔ emɔ nɛ mɔ, Mawu afɔn amɛjɔjɔɛwo koɖo amɛmajɔmajɔwo so ku. 16 Ecɛ yí na taɖo yí ŋjenɔ agbla sugbɔ gashiagamɛ keŋ akpɔtɔ aɖo ayexa mɛmi* le Mawu koɖo agbetɔwo ŋkɔ. 17 Exwe sugbɔ goduɔ, ŋhɛn xomɛvu nunanawo vɛ nɔ anyi jukɔn yí gbewa vɔnsawo. 18 Hwenu ŋle ŋcɛwo wakɔɔ, wokpɔŋ le gbedoxɔ lɔ mɛ yí ŋklɔkɔ nyɛɖeki shigbe lé Ese lɔ nui do nɛ, gan wodekpɔ nyɛ koɖo amɛahwa ɖe alo kpɔŋ yí ŋdodoɔ hunnyahunnya do amɛwo mɛ o. Vɔ Ʒuifu ɖekawo so Azi. 19 Nɔ anyɔɔ, wowo can ɖo ava ŋkɔ nɔ eo sa yí nɔ ehwɛnyɔ ɖe le wo shi do ŋnuɔ, woanui. 20 Alo biɔ mɛ ciwo yí le elɛ se, nɔ wowoŋtɔwo anu enudɔndɔn ci wokpɔ yí ŋwa hwenu ŋle te le Sanhedrɛn lɔ ŋkɔ. 21 Enu kuɖeka kpaŋ ci wohɛn woado hwɛŋ nɔ yí nyi hwenu ŋle te le wo mɛ yí do axwa mɔ: ‘Ci ŋxɔɛ se mɔ woafɔn amɛkukuwo so ku yí taɖo woɖoɖoɔ kojo nɔŋ gbɛ le ŋkɔ nɔ mí!’”
22 Vɔ ci Felisi nya nuwo nywiɖe so Axwetɔ Mɔ cɛ nuɔ, éɖo te kojoɖoɖo lɔ yí nu mɔ: “Ahwaga Lisiasi yí ava elɛ keŋ gbɔxwe naso enyɔ lɔ nɔ mí.” 23 Eyi eɖe gbe nɔ sɔjawo ga lɔ mɔ wo le kpɔtɔ acɔcɔ Pɔlu, gan yí ana vovo hwɛɖeka yi yí agbelɔn nɔ yi mɛwo ava donɔ alɔ̀ yi.
24 Le ŋkeke ɖewo goduɔ, Felisi koɖo ashiɛ Drusila ci yí nyi Ʒuifu va, eyi Felisi dɔ yí wokplɔ Pɔlu vɛ yí eɖo to yí se lé woaxɔ Kristo Yesu ji se do. 25 Vɔ ci Pɔlu xokɔ nuxu so lé woawa enujɔjɔɛ do koɖo lé woalé amɛɖeki do mɛ do sɔ kpe nɔ kojoɖoɖo ci yí avava nuɔ, Felisi vɔn yí nu mɔ: “Sò yi keŋ. Vɔ nɔ eyaɔ, nagbeɖo amɛ ɖaɖa eo.” 26 Vɔ Felisi kpɔkɔ emɔ mɔ Pɔlu ana eho ye, eyi na taɖo edɔnɔ amɛ ɖaɖɛ blaŋblaŋ yí kannɔ seŋ koɖi. 27 Vɔ le exwe amɛve goduɔ, Pɔrsiu Fɛstusi vaɖɔli Felisi le ega ji. Eyi ci Felisi ji mɔ ye nu le kpe nɔ Ʒuifuwoɔ, égbe Pɔlu do gakpa mɛ.