Wema ci Woŋwlɛ aɖa Rɔmatɔwo
14 Míxɔ mɛ ci xɔse desɛnŋ nɔ o, vɔ míŋgbeɖonɔ kojo nɔ mɛ ciwo yí susu wowotɔ to akpo nɔ míwotɔwo* o. 2 Mɛ ci xɔse sɛnŋ nɔ ɖunɔ nuwo pleŋ, vɔ ɖafiɔnwo ɖekɛ yí mɛ ci xɔse desɛnŋ nɔ ɖunɔ. 3 Mɛ ci yí ɖunɔ nuwo pleŋ ŋgbegbali mɛ ci yí deɖunɔ nushianu o yí mɛ ci yí deɖunɔ nushianu ŋgbedo hwɛ mɛ ci yí ɖunɔ enuwo pleŋ o, ɖo Mawu xɔ mɛ ŋtɔ́. 4 Mi ènyi yí ɖoɖoɔ kojo nɔ mɛbu dɔwaviɔ? Yi xwetɔ yí anya nɔ éle te alo éjuin. Le nyɔnɔnwi mɛɔ, ánɔ te dru, ɖo Yehowa* atɛnŋ awɛ yí anɔ te.
5 Mɛɖewo kpɔɛni mɔ ŋkeke ɖe le veviɖe wu kpɛtɛwo yí mɛbuwo kpɔɛni mɔ ŋkeke lɔwo pleŋ nyi ŋɖekɛ; mɛɖekaɖeka le kando enu ci yí na taɖo ekpɔkpɔɛ do ahan ji. 6 Mɛ ci yí kpɔkpɔ ŋkeke ɖe mɔ yɛle veviɖe wɛkɔ ahan nɔ yi nu akpe nɔ Yehowa.* Mɛ ci yí ɖunɔ nuwo pleŋ wɛkɔ ahan nɔ yi nu akpe nɔ Yehowa* hɛnnɛ yí egbedonɔ akpe ni. Mɛ ci yí deɖunɔ nuwo pleŋ can wɛni ahan nɔ yí nu akpe nɔ Yehowa* yí edonɔ akpe nɔ Mawu hɛnnɛ. 7 Le nyɔnɔnwi mɛɔ, mɛɖe dele mì mɛ yí le agbe nɔ yiŋtɔ ɖekɛ o yí mɛɖe dekunɔ nɔ yiŋtɔ ɖekɛ hɛnnɛ o. 8 Ðo nɔ mìle agbeɔ, mìle agbe nɔ Yehowa.* Eyi nɔ mìkuɔ, mìku nɔ Yehowa.* Eyi taɖo nɔ mìle agbe alo mìku can ɔ, Yehowa* tɔ yí mìnyi. 9 Ecɛ yí dɔ yí Kristo ku yí wofuin do agbe keŋ nɔ atɛnŋ anyi Axwetɔ nɔ amɛkukuwo koɖo amɛleagbuwo.
10 Vɔ nyi yí taɖo èɖoɖoɔ kojo nɔ nɔvioɔ? Nyi yí taɖo eo can ègbalikɔ nɔvioɔ? Ðo Mawu avaɖo kojo nɔ mì pleŋ.* 11 Ðo woŋwlɛ ɖɛ mɔ: “Yehowa* nu mɔ, ‘Ci ŋle agbe duuɔ, amɛwo pleŋ aje klo ji nɔŋ yí mɛshiamɛ* anu le jugbaja mɔ enyɛ yí nyi Mawu.’” 12 Eyi taɖo mɛɖekaɖeka le mì mɛ avajo kɔnŋta nɔ Mawu so yiɖeki nu.
13 Ci ele ahan ɔ, mìami kojo ɖoɖo nɔ mìwonɔnɔwo; vɔ mìaɖui koŋ mɔ mìdawa ŋɖekpokpui ci yí adɔ nɔvi ɖe aklɛn afɔ alo abu emɔ o. 14 Ŋnya yí gbekando ji le Axwetɔ Yesu mɛ mɔ ŋɖe denyi enumakɔmakɔ o, nɔ mɛɖe kpɔ ŋɖe do enumakɔmakɔ ji gbɔxwe yí anyi enumakɔmakɔ ni. 15 Ðo nɔ enu ci èɖukɔ le efun ɖekɔ nɔ nɔvioɔ, anyi dègbewakɔ nu koɖo lɔnlɔn o. Ŋgbesɔ ao ŋɖuɖu dadahɛn nu le mɛ ci Kristo ku do ta nɔ nu o. 16 Eyi taɖo míŋgbelɔn nɔ woaxo nuxu vɔn so nunywi ci míwakɔ nu o. 17 Ðo denyi enu ci mɛɖe aɖu alo anu yí adɔ aɖo Mawu Fyɔɖuxu lɔ mɛ o, vɔ éɖo awakɔ enujɔjɔɛ yí anɔ fafa mɛ koɖo mɛbuwo yí akpɔkɔ jijɔ ci gbɔngbɔn kɔkɔɛ lɔ nanɔ. 18 Mɛɖekpokpui ci yí wɛwɛ ahan yí nyi hwashi nɔ Kristo ɔ, ányɔ le Mawu gbɔ yí yi nu agbekpe nɔ agbetɔwo.
19 Eyi taɖo mìɖo awa ŋɖekpokpui ci ji mìkpe yí anɔ fafa mɛ koɖo mɛbuwo yí agbedonɔ ŋsɛn mìwonɔnɔwo. 20 Mími Mawu dɔ dadahɛn do ŋɖuɖu ŋci. Le nyɔnɔnwi mɛɔ, enuwo pleŋ le kɔkɔɛɖe, vɔ nɔ mɛɖe ɖu ŋɖe ci yí ana yi kpena ajuin ɔ,* denyɔ o. 21 Denyɔ mɔ àɖu lan alo anu vɛn alo awa nubu ɖekpokpui ci yí ana nɔvio aklɛn nu o. 22 Xɔse ci èɖo do nɛnɛnuwo nu le nyi eo koɖo Mawu gblamɛ nyɔ. Nɔ mɛɖe kpɔ mɔ ŋɖe nyɔ yí wɛ yí enu lɔ dena edo hwɛ yiɖekiɔ, eji ajɔɛ. 23 Vɔ nɔ mɛɖe xo nu kpɔ so ŋɖuɖu ɖe nu gbɔxwe yí ɖuiɔ, wodo hwɛ yi xoxo. Ðo dekando ji teŋ mɔ yɛnyɔ gbɔxwe yí ɖui o. Le nyɔnɔnwi mɛɔ, ŋɖekpokpui ci wowa yí xɔse dɛn le mɛɔ, nuvɔn yɔ.