Wema ci Woŋwlɛ Ðaɖa Ebretɔwo
10 Ðo ci Ese lɔ nyi kpɔli nɔ enunywi ciwo yí avava gan yí denyi enu lɔwo ŋtɔŋtɔ yɔɔ, datɛnŋ* ato vɔnsa ɖekɛ lɔwo ciwo yí wokpɔtɔ wanɔ xweshiaxwe ji yí ana yí mɛ ciwo yí teteɛ gogo Mawu anyi amɛmaɖoafɛnwo gbeɖe o. 2 Nɔ denyi ahan ɖe, wodami vɔnsa lɔwo wawa ba? Ðo mɛ ciwo yí wakɔ sɛnsɛndɔ kɔkɔɛ amɛ́ zeɖeka yí anyi evɔ, eyi wodagbekpɔɛ mɔ yewonyi nuvɔnwatɔwo o. 3 Vɔ vɔnsa ŋtɔ́wo ɖonɔ ŋwi nuvɔnwo xweshiaxwe, 4 ɖo nyibuwo koɖo egbɔwo hun datɛnŋ aɖe nuvɔnwo swi o.
5 Eyi taɖo hwenu eva xexe lɔ mɛɔ, énu mɔ: “‘Dèjinɔ vɔnsawo koɖo enunanawo o, vɔ èdra lankpu do ɖɛ nɔŋ. 6 Vɔnsa ciwo wotɔnɔ zo pleŋ koɖo nuvɔn vɔnsawo dekpenɔ nɔ eo o.’ 7 Eyi ŋnu mɔ: ‘Kpɔ ɖa! Ŋva (woŋwlɛ nu so ŋnu le wemaŋwlaŋwla lɔ mɛ), Oo Mawu, ŋva yí awa ao dro.’” 8 Énu doŋkɔ mɔ: “Dèjinɔ vɔnsawo, enunanawo, vɔnsa ciwo wotɔnɔ zo pleŋ koɖo nuvɔn vɔnsawo o yí wowo nu dekpenɔ nɔ eo hɛnnɛ o,” wowanɔ vɔnsa cɛwo shigbe lé Ese lɔ nui do nɛ. 9 Égbenu mɔ: “Kpɔ ɖa! Ŋva yí awa ao dro.” Éɖe enu ŋkɔtɔ lɔ swi keŋ aɖo amɛvetɔ lɔ. 10 To “edro” cɛ jiɔ, lankpu ci Yesu Kristo sɔ sa vɔn zeɖeka nɔ hwenu lɔwo pleŋ na yí mìmɛ́.
11 Ahanke avɔnsatɔ ɖekpokpui nɔnɔ yi tɔxu gbeɖeka duu yí awakɔ sɛnsɛndɔ kɔkɔɛ yí agbewakɔ vɔnsa ɖekɛ ŋmɛ lɔwo gbɛmɛgbɛmɛ. Vɔnsa cɛwo datɛnŋ aɖe nuvɔnwo swi keŋkeŋ o. 12 Vɔ ŋsu cɛ yɛwa vɔnsa do ta nɔ nuvɔnwo zeɖeka yí enyi evɔ yí nɔ nyinɔnɔ do ɖushi mɛ nɔ Mawu, 13 eyi anɔ te keke ana nɔ hwenu yí woasɔ yi ketɔnɔwo sɔ wa afɔɖojinu ni. 14 Ðo vɔnsa kuɖeka ji eto yí na yí mɛ ciwo yí wosɔ trɔkɔ amɛmɛmiwo nyi amɛmaɖoafɛnwo tɛgbɛɛ. 15 Gbesɔ kpe niɔ, gbɔngbɔn kɔkɔɛ lɔ nakɔ kpeɖoji mì hɛnnɛ, ɖo énu le yi godu mɔ: 16 “Yehowa* nu mɔ: ‘Ecɛ yí nyi enu ci nabla koɖo wo le ŋkeke ŋtɔ́wo godu. Nasɔ anyi sewo do ejiwo mɛ nɔ wo, eyi naŋwlɛ wo do susu mɛ nɔ wo.’” 17 Égbenu mɔ: “Ŋdagbeɖo ŋwi wowo nuvɔnwo koɖo enudɔndɔn ciwo yí wowa o.” 18 Vɔ nɔ wosɔ enu cɛwo ke amɛɔ, wodagbewa vɔnsa do ta nɔ nuvɔnwo o.
19 Eyi taɖo nɔviwo, to Yesu hun jiɔ, mìkando ji* mɔ mìatɛnŋ ato emɔ ci yí yi kɔkɔɛtɔxu lɔ. 20 Éto xɔmɛsovɔn lɔ ci yí nyi yi gbaza ji yí hun emɔ yoyu koɖo agbe mɔ nɔ mì. 21 Eyi ci avɔnsatɔ gangantɔ ci yí kpɔkpɔ Mawu xwe lɔ ji le mì shiɔ, 22 mìate gogo Mawu koɖo eji nyɔnɔnwitɔ sɔ kpe nɔ xɔse ci yí le blebu, ɖo woklɔ mìwo jiwo* so ayexa vwin mɛ yí le eshi mɛmi nɔ mìwo lankpuwo. 23 Mìakpɔtɔ axoxoɔ nuxu so mìwo mɔkpɔkpɔ lɔ nu veviɖe le jugbaja yí mìdaxo nu kpɔ o, ɖo egbejinɔtɔ yí mɛ ci yí ɖo gbe lɔ nyi. 24 Eyi mìabunɔ mìwonɔnɔwo tɔ kpɔ* yí adonɔ ŋsɛn mìwonɔnɔwo nɔ lɔnlɔn koɖo edɔ nywiwo wawa. 25 Mìdagɔnnɔ mìwo bɔbɔwo shigbe lé enyi enumadoamɛ nɔ mɛɖewo nɛ o, vɔ mìadonɔ ŋsɛn mìwonɔnɔwo yí agbewɛni sɔwu ci míkpɔ mɔ ŋkeke lɔ gogokɔ.
26 Nɔ mìmɔŋje nyɔnɔnwi lɔ mɛ nywiɖe gan yí ɖui yí gbele nuvɔn wakɔɔ, vɔnsa ɖe degbeli nɔ nuvɔn lɔwo o. 27 Vɔ enu ci mìakpɔkɔ emɔ nɔ koɖo vɔnvɔn yí nyi kojoɖoɖo koɖo dɔmɛzi ci yí le shigbe ezo nɛ yí afiɔn egufɔntɔwo. 28 Wowunɔ mɛɖekpokpui ci yí da le Moizi Se lɔ ji nɔ amɛ amɛve alo amɛtɔn ɖe kunu so nu yí wodekunɔ ŋshishi ni o. 29 Nɔ mɛɖe ɖo afɔ Mawu Vi lɔ ji yí kpɔ enublabla hun ci yí na yí enyi amɛkɔkɔɛ do enugbali ji yí gbali xomɛvu gangan gbɔngbɔn lɔ ɖe, mídekpɔ mɔ eto ci woadɔn nɔ mɛ ŋtɔ́ agangan wu ba? 30 Ðo mìjeshi Mɛ ci yí nu mɔ: “Enyɛ yí aɖe hlɔn; enyɛ yí acu fɛn lɔ.” Eyi egbenu mɔ: “Yehowa* aɖo kojo nɔ yi jukɔn.” 31 Enuɖyivɔnvɔn enyi mɔ woaje Mawu agbuagbu lɔ lɔ̀ mɛ.
32 Vɔ míkpɔtɔ aɖoɖoɔ ŋwi sasa ŋkekewo; ci míkpɔ klɛnklɛn lɔ goduɔ, mído ji yí do gbla sugbɔ le efunkpekpewo mɛ. 33 Gaɖewomɛɔ, wodo ŋkpɛn mí le amɛwo mɛ* yí tre fun nɔ mí, eyi hweɖewonuɔ, mínɔnɔ koɖo mɛ ciwo yí kpekpeɛ fun cɛ hanciwo. 34 Ðo míse vevi do mɛ ciwo yí le gakpa mɛ nu yí ci wofi míwo nuwoɔ, míxɔɛ koɖo jijɔ, ɖo mínya mɔ enu ci yí le yewo shi nyɔ wu yí agbeni tɛgbɛɛ.
35 Eyi taɖo míŋgbesɔ edɔngbegbe míwotɔ* dɔŋkpe o, ána yí woacu fɛn nɔ mí sugbɔ. 36 Ðo míʒan ejidodo keŋ nɔ míwa Mawu dro ɖegbɔɔ, míaxɔ enu ci gbe woɖo. 37 Ðo “hwɛɖeka yí kpɔtɔ kpoŋ” yí “mɛ ci yí gbɔgbɔ ava yí daji gamɛ o.” 38 “Vɔ xɔse ci anyi mɛjɔjɔɛ ɖo yí adɔ anɔ agbe,” eyi “nɔ étrɔ yi goduɔ, yi nu dagbekpe nɔŋ* o.” 39 Mìdenyi mɛ ciwo yí trɔnɔ yi godu keŋ ayi gu o, vɔ mìnyi mɛ ciwo yí ɖo xɔse ci yí adɔ woahwlɛn mìwo gbewo* gan.