Apotruwo Dɔwawawo
4 Ci wo koɖo ve lɔ le nuxu xokɔ nɔ mɛ lɔwoɔ, avɔnsatɔwo, mɛ ci yí kpa nɔ gbedoxɔ lɔ jikpɔtɔwo koɖo Sadusitɔwo va kɔdo wo ji le avomɛ. 2 Wodo dɔmɛzi do apotru lɔwo nu, ɖo wokplakpla nu amɛwo yí nunuɔ le jugbaja mɔ Yesu fɔn so ku. 3 Eyi taɖo wolé wo cu do gakpa mɛ yí wonɔ enɔ keke eŋ ke, ɖo fiɛfi vaɖo vɔ. 4 Ele ahan gan, mɛ ciwo yí se nyɔ lɔ sugbɔtɔ trɔ xɔsetɔwo yí ŋsuwo hlɛnhlɛnmɛ yi 5 000 han.
5 Yi ŋkegbuɔ, Ʒuifuwo kplɔtɔwo, ejukplɔtɔwo koɖo esekplamɛtɔwo bɔ do Ʒerusalɛmu. 6 Anasi ci yí nyi avɔnsatɔ gangantɔ, Kayifu, Ʒan, Alɛsandru koɖo avɔnsatɔ gangantɔ lɔ mɛwo pleŋ can le enɔ koɖo wo. 7 Wokplɔ Piɛ koɖo Ʒan va dodomɛ yí tɔ wo biɔbiɔ se mɔ: “Ŋsɛn ci mísɔ wa ŋcɛɔ, yí mi ŋkɔ mɛ míwɛ leɔ?” 8 Eyi Piɛ ɖɔ koɖo gbɔngbɔn kɔkɔɛ yí nu nɔ wo mɔ:
“Ʒuifuwo kplɔtɔwo koɖo jumɛgawo, 9 nɔ míbiɔkɔ nyɔ mì se gbɛ so edɔ nywi ci mìwa nɔ ŋsu atakunɔ lɔ nu yí gbeji mɔ yewoanya mɛ ci ŋkɔ mɛ yí edɔ̀ mi ni leɔ, 10 míwo lɔwo pleŋ koɖo Izraɛli jukɔn lɔ pleŋ le nya mɔ Yesu Kristo Nazarɛtitɔ lɔ ŋkɔ mɛ yí edɔ̀ mi nɔ ŋsu cɛ le yí ele te le ŋkɔ nɔ mí le elɛ le lanmɛsɛn mɛ. Yesu cɛ yí míkan do aci nu, vɔ Mawu fuin do agbe. 11 Eyi nyi ‘ekpe ci míwo, exɔcutɔwo míkpɔ do enugbali ji yí evatrɔ zoguijikpe vevitɔ.’* 12 Gbesɔ kpe niɔ, hwlɛngan degbele mɛbu ɖe mɛ o, ɖo ŋkɔ bu ɖe degbele nyigban lɔ ji ci wona agbetɔwo, ci ji mìato akpɔ hwlɛngan o.”
13 Ci wokpɔ mɔ Piɛ koɖo Ʒan xo nuxu koɖo edɔngbegbe* gan yí wotrɔgbɔ nyi amɛmasewemawo* koɖo amɛgbaliwoɔ, ékpaca wo sugbɔ; eyi wovanya mɔ wonɔ koɖo Yesu. 14 Ci ŋsu ci woda edɔ̀ nɔ le te le wo gbɔ yí wokpɔkpɔɛɔ, wodegbekpɔ nyɔ ɖe anu o. 15 Eyi taɖo wonu nɔ wo mɔ wo le to le Sanhedrɛn xɔ lɔ mɛ, eyi wotɔ susu ɖeɖe le wowoɖeɖewo mɛ 16 yí nukɔ mɔ: “Lé mìawɛ nɔ ŋsu cɛwoɔ? Ðo wowa enujiŋ gangan ɖeka to wo ji nyao keke Ʒerusalɛmutɔwo pleŋ kpɔ tɔxu yí mìdatɛnŋ agbe mɔ nɛnɛnu ɖe dejɔ o. 17 Nɔ enyɔ cɛ ŋgbevakaka do amɛwo mɛ dojiɔ, mìado vɔnvɔn nɔ wo yí agbe nɔ wo mɔ woŋgbexo nuxu nɔ mɛɖe so ŋkɔ cɛ nu ke o.”
18 Eyi taɖo woyɔ wo yí do se nɔ wo mɔ woŋgbenu nyɔ ɖe alo akpla nu amɛwo so Yesu ŋkɔ nu ke o. 19 Vɔ Piɛ koɖo Ʒan ɖo ŋci nɔ wo mɔ: “Míwoŋtɔwo míkpɔɛ kpɔ mɔ esɔgbe le Mawu ŋmɛ mɔ, mìase tonu nɔ míwo sɔwu Mawu ma. 20 Vɔ mìwoɔ, mìdatɛnŋ ami nuxu xoxo so ŋciwo mìkpɔ koɖo ŋciwo mìse nu o.” 21 Eyi taɖo ci wodo vɔnvɔn nɔ wo doji ɖegbɔɔ, wotashi wo, ɖo wodekpɔ ŋɖe ci ji woado hwɛ wo do keŋ adɔn to nɔ wo o. Wovɔn nɔ jukɔn lɔ hɛnnɛ, ɖo amɛwo pleŋ kanfukɔ Mawu nɔ ŋci yí jɔ lɔ. 22 Ŋsu ci woda edɔ̀ nɔ enujiŋtɔ lɔ ɖo exwe 40 enu le ji.
23 Ci wotashi woɔ, woyi enukplavi kpɛtɛwo gbɔ yí nu enyɔ ci avɔnsatɔwo gawo koɖo jumɛgawo nu nɔ wo. 24 Ci wose enyɔ cɛɔ, wo pleŋ kɔ gbe yi ji yí nu nɔ Mawu mɔ:
“Axwetɔ Acɛkpatɔ Gangantɔ, eo yí wa jeŋkwi koɖo nyigban sɔ kpe nɔ axu koɖo enu ciwo pleŋ yí le wo mɛ. 25 Eo yí to gbɔngbɔn kɔkɔɛ ji yí na mìwo tɔgbi Davidi ci yí nyi ao dɔwavi nu mɔ: ‘Nyi yí taɖo jukɔnwo le adan ji yí amɛwo bubuɔ tamɛ kpɔ so enugbaliwo nuɔ? 26 Nyigban ji fyɔwo so je te yí ejukplɔtɔwo jɔn nu keŋ yí kpe ta koɖo Yehowa* koɖo mɛ ci eshi ami nɔ* lɔ.’ 27 Ðo le nyɔnɔnwi mɛɔ, Erodi, Pɔnsi Pilati koɖo jukɔn bu mɛ tɔwo sɔ kpe nɔ Izraɛli jukɔn lɔ jɔn nu le eju cɛ mɛ yí kpe ta koɖo Yesu, amɛkɔkɔɛ aotɔ lɔ ci èshi ami nɔ 28 keŋ awa enu ci èɖo ɖɛ mɔ yɛajɔ le ao ŋsɛn koɖo ao dro mɛ. 29 Ecɛyɛɔ, Yehowa,* mìɖe kuku, kpɔ vɔnvɔn ciwo wodokɔ nɔ mì yí ana ao hwashiwo agbe dɔn keŋ anu ao nyɔ. 30 Kpɔtɔ azanzan ao ŋsɛn asɔ dakɔ edɔ̀ nɔ amɛwo yí awakɔ enujiŋ gangan hamɛhamɛwo le ao dɔwavi kɔkɔɛ Yesu ŋkɔ mɛ.”
31 Ci wowa kwifan* ɖegbɔ ahan ɔ, texwe ci wobɔ do lɔ hunhun, eyi wo pleŋ ɖɔ koɖo gbɔngbɔn kɔkɔɛ yí nukɔ Mawu nyɔ koɖo edɔngbegbe.
32 Gbesɔ kpe niɔ, amɛ sugbɔ ciwo yí xɔ se ɖo susu ŋmɛ ɖekɛ* yí mɛɖe denunɔ le wo mɛ mɔ ŋci yí le ye shi nyi yetɔ ɖekɛ o, vɔ womanɔ wowo nuwo pleŋ koɖo wowonɔnɔwo. 33 Apotru lɔwo kpɔtɔ xoxoɔ nuxu so Axwetɔ Yesu fɔnfɔnsoku lɔ nu koɖo ŋsɛn gangan yí Mawu wa xomɛvu gangan nɔ wo pleŋ. 34 Le nyɔnɔnwi mɛɔ, ŋɖekɛ dewudo mɛɖe le wo mɛ o. Ðo mɛ ciwo pleŋ shi nyigban alo axwewo le sanɔ wo yí hɛnnɔ eho lɔ vɛ. 35 Wosɔnɔ eho lɔwo nɔ apotru lɔwo, eyi womanɔ wo nɔ mɛɖekaɖeka sɔgbe koɖo eʒan yitɔ. 36 Ŋsu ɖeka tɔ mɔ Ʒozɛfu yí apotru lɔwo gbeyɔɛni mɔ Barnabasi (ci gɔnmɛ yí nyi “Akɔnfanamɛvi”), ényi Levitɔ yí so Shipru. 37 Éwa nyigban ɖeka ɖɛ yí sɛ keŋ yí sɔ eho lɔ vɛ nɔ apotru lɔwo.