Wema ci Woŋwlɛ Ðaɖa Galatitɔwo
5 Vovo cɛ ŋci yí Kristo na yí mìvo. Eyi taɖo mínɔ te gogwiɖe, míŋgbelɔn nɔ woasɔ mí sɔ wa hwashi ke o.
2 Míkpɔ ɖa! Enyɛ Pɔlu yí nukɔ nɔ mí mɔ, nɔ mílɔn yí woso vo nɔ míɔ, anyi Kristo degbenyi ŋɖewanu nɔ mí o. 3 Ŋgbenukɔ nɔ mí mɔ, ŋsu ɖekpokpui ci yí alɔn yí woaso vo niɔ, ele dandan mɛ mɔ éɖo awa do Ese lɔ pleŋ ji. 4 Míwo ciwo yí le agbla jekɔ mɔ woato ese lɔ ji yí ayɔ yewo mɔ amɛjɔjɔɛwoɔ, míle azɔge nɔ Kristo yí mídele xomɛvu gangan yitɔ lɔ mɛ o. 5 Vɔ mìwoɔ, mìkpɔkpɔ emɔ veviɖe mɔ, mìavanyi amɛjɔjɔɛwo le ŋmɛ nɔ Mawu toto gbɔngbɔn kɔkɔɛ koɖo mìwo xɔse ɖekɛ ji. 6 . Le Kristo Yesu mɛɔ, evososo alo evomasomaso denyi ŋɖe o, vɔ xɔse ci yí wakɔ edɔ toto lɔnlɔn ji yí nyi enuvevitɔ lɔ.
7 Mílɔkɔ ju nywiɖe sa. Mi yí gbe nɔ mí mɔ míwoŋgbekpɔtɔ asekɔ tonu nɔ nyɔnɔnwi lɔɔ? 8 De mɛ ci yí yɔ mí yí gbe nɔ mí mɔ míwo le mi tonu sese nɔ nyɔnɔnwi lɔ o. 9 Kpɔnnɔcike kankin dɔ yí kpɔnnɔɣɔ nyanya lɔ pleŋ honɔ. 10 Ŋkando ji mɔ míwo ciwo yí le ekacaca mɛ koɖo Axwetɔ lɔ davaɖo susu bu ɖe o; vɔ woadɔn to nɔ mɛ ci yí dodoɔ aya nɔ mí yí asɔgbe, nɔ mɛ lɔ gbenyi mɛɖekpokpui can. 11 Nɔviwo, nɔ ŋkpɔtɔ dradra evososo nyɔ lɔ ɖe, nyi yí taɖo wokpɔtɔ ciciɛ yumɛ nɔŋ ɔ? Nɔ enyi ahan yɔɔ, anyi efuntrenamɛci* lɔ degbenyi afɔklɛnnu o. 12 Naji mɔ mɛ ciwo yí teteɛkpɔ mɔ yewoatrɔ míwo susuwo ata wowoɖekiwo.*
13 Nɔviwo, woyɔ mí keŋ nɔ míakpɔ vovo, gan míŋgbezan vovo ŋtɔ́ yí asɔ kplɔ enu ciwo yí dronɔ gbaza lɔ do o, vɔ lɔnlɔn le dɔ yí míanyi hwashi nɔ míwonɔnɔwo. 14 Ðo woatɛnŋ asɔ Ese lɔ pleŋ xoca do ɖekɛ yí amɔ: “Èɖo alɔn ao kpena shigbe eoŋtɔ nɛ.” 15 Vɔ nɔ míle míwonɔnɔwo ɖukɔ yí drɛnkɔ míwonɔnɔwoɔ, míkpɔ nywiɖe, nɔ míŋgbevagu míwonɔnɔwo swi o.
16 Gan ŋnukɔ nɔ mí mɔ, nɔ míkpɔtɔ yí zɔnkɔ le gbɔngbɔn mɛɔ, mídawa enu ciwo yí dronɔ gbaza lɔ ɖe o. 17 Ðo enu ci yí dronɔ gbaza lɔ trɔkpe gbɔngbɔn lɔ yí gbɔngbɔn lɔ can trɔkpe gbaza lɔ; wotrɔkpe nɔnɔ keŋ nɔ míŋgbewa enu ci teŋ yí dro mí o. 18 Gbesɔ kpe niɔ, nɔ enyi gbɔngbɔn lɔ yí kplɔkplɔ míɔ, anyi mídele ese gɔnmɛ o.
19 Gbaza lɔ nuwanawo zenɔ petii, wowo yí nyi mateliwawa,* enumakɔmakɔwawa, woashin ŋta yí ale enudɔndɔn wakɔ,* 20 voju* sɛnsɛn, gbɔngbɔnyɔyɔ,* ekewawa, evuwawa, ŋhwan, dɔmɛzi sugbɔ dodo, aɖehwlɛnhwlɛnwo, mamawo, sɛnsɛnklandoakpowo, 21 ŋbia, ahanumu, agɔɖuxu* ciwo wowanɔ enudɔndɔnwo le koɖo enu cɛ han buwo. Ŋɖokɔ afɔ afɔta nɔ mí shigbe lé ŋwɛ do nɔ mí vayi sa nɛ mɔ, mɛ ciwo yí wakɔ enu cɛ hanwo daɖu Mawu Fyɔɖuxu lɔ cinɔ o.
22 Vɔ gbɔngbɔn lɔ kusɛnsɛn yí nyi lɔnlɔn, jijɔ, fafa, jigbɔnɖɛxɔxɔ,* xomɛvuwawa, enywiwawa, xɔse, 23 xomɛfafa, amɛɖekileledomɛ. Ese ɖekɛ degbe enu cɛwo o. 24 Gbesɔ kpe niɔ, mɛ ciwo yí nyi Kristo Yesu tɔwo kan edro sɛnŋ koɖo edro vɔn gbaza lɔ tɔwo do aci nu.
25 Nɔ mìle agbe nɔkɔ sɔgbe koɖo gbɔngbɔn lɔɔ, mìalɔn nɔ gbɔngbɔn lɔ akpɔtɔ adadasɛ emɔ nɔ mì hɛnnɛ. 26 Mìŋgbelɔn avatrɔ egoyitɔnɔwo yí awakɔ ehwlɛn koɖo mìwonɔnɔwo alo mɛɖe nu aci ŋmɛ nɔ yi kpena o.