Wema ci Woŋwlɛ Ðaɖa Filipitɔwo
3 Le vɔvɔnuɔ, nɔvinyɛwo, míkpɔtɔ akpɔkɔ jijɔ le Axwetɔ lɔ mɛ. Deɖe fun nɔŋ ɖeeɖe mɔ magbeŋwlɛ enyɔ ɖekɛ lɔwo ɖaɖa mí o, míwo nyɔna ŋci yɔ.
2 Mínya wawa nɔ mɛ ciwo yí wanɔ nu shigbe avuwo nɛ; mínya wawa nɔ mɛ ciwo yí danahɛn nu le amɛ nu; mínya wawa nɔ mɛ ciwo yí donɔ akpa gbaza nu. 3 Ðo mìwo yí nyi mɛ ciwo yí so vo ŋtɔŋtɔ lɔwo, mɛ ciwo yí wakɔ sɛnsɛndɔ kɔkɔɛ to Mawu gbɔngbɔn lɔ ji yí yinɔ go le Kristo Yesu mɛ yí denyi gbaza lɔ ji yí mìkannɔdo o. 4 Gan nɔ mɛɖe li yí ɖo susu ciwo yí dɔ akando gbaza lɔ jiɔ, enyɛ anyi.
Nɔ mɛɖe bukɔ mɔ yeɖo susu ciwo yí dɔ yeakando gbaza lɔ jiɔ, nyɛŋɖo wui: 5 woso vo nɔŋ le ŋkeke amɛnyitɔ lɔ gbe, ŋso Izraɛli le Bɛnʒamɛ kɔta mɛ, ŋnyi Ebre vijiji, ŋnyi Farizitɔ yí ŋdesɔ ese lɔ munɔ munu o; 6 ŋsɔ kpakpa ci yumɛ nɔ hamɛ lɔ, ŋwa do enu ci yí ese lɔ mɔ yɛnyi enujɔjɔɛ ji yí sɔ dasɛ mɔ ŋnyi mɛ ci nu yí afɛn ɖe dele o. 7 Gan, enu ciwo yí le ŋshi saɔ, ŋkpɔ wo do enugbaliwo ji* do Kristo ŋci. 8 Gbesɔwu hunnɔɔ, ŋgbekpɔnɔ enuwo pleŋ nyɔnɔnwimɛtɔ mɔ wonyi enugbaliwo, ɖo enu ci ŋvakpla so anyi Xwetɔ Kristo Yesu nu nyɔ wu wo sesese. Ŋlɔn mɔ enu lɔwo pleŋ le laŋ do Kristo ŋci yí woɖyi nukplɔ* doŋ nɔŋ keŋ nɔ matɛnŋ axɔ Kristo 9 yí woakpɔŋ mɔ ŋnyi yi dokplɔtɔ. Ŋdenukɔ mɔ ci ŋwakɔ do Ese lɔ ji taɖo ŋnyi amɛjɔjɔɛ o, vɔ ci ŋxɔ Kristo ji se taɖo wokpɔŋ do amɛjɔjɔɛ ji. Le nyɔnɔnwi mɛɔ, Mawu kpɔnɔ mɛ ciwo yí xɔ Kristo ji se do amɛjɔjɔɛwo ji. 10 Enu ci ŋjikɔ yí nyi mɔ, majeshi mɛ ci yí enyi koɖo ŋsɛn ci yí le fɔnfɔnsoku yitɔ nu yí akpe fun yitɔ han yí aku shigbe eyɛ hannɛ 11 keŋ akpɔ mɔ natɛnŋ anɔ amɛ ŋkɔtɔ ciwo yí woafɔn so eku mɛ ma.
12 Ŋdexɔ fɛncu cɛ hɔɖo o, ŋdenyi mɛ ci nu afɛn ɖe dele hɔɖo o, vɔ ŋwakɔ ci ji ŋkpe keŋ aɖegbɔ nɔ enu ci koŋ Kristo Yesu sɔŋ nɔ. 13 Nɔviwo, ŋdekpɔɛ hɔɖo mɔ ŋxɔ fɛncu lɔ o; vɔ enu ci ji ŋkando ke: Ŋŋlɔŋlɔbe enu ciwo yí le godu keŋ yí nyanya enu ciwo yí le ŋkɔ tiin. 14 Ŋle egbla ji mɔ maxotɔ fɛncu ci yí nyi jeŋkwi mɛ yiyi ci yí Mawu yɔŋ nɔ to Kristo Yesu ji. 15 Eyi taɖo ele mɔ, mìwo ciwo pleŋ yí shin aɖo susu cɛ hanci. Eyi nɔ míɖo susu bu ɖeɔ, Mawu akpedo mí nu yí míamɔŋje enyɔ ci ŋnu vayi mɛ. 16 Eɖekpokpuiɖe ci anyiɔ, nɔ mìyi ŋkɔ ɖeeɖe can ɔ, mína nɔ mìakpɔtɔ ale ji ahan.
17 Nɔviwo, mí pleŋ ɖo aje agbla awa anyitɔ han, míwo ŋkuviwo le nɔ mɛ ciwo yí wawa nu sɔgbe koɖo kpɔwɛ ci yí mìɖo ɖɛ nɔ mí ji. 18 Amɛ sugbɔ li yí le enu wakɔ shigbe ketɔnɔwo yí wonyi nɔ efuntrenamɛci* Kristo tɔ lɔ nɛ. Ŋyɔnɔ wowo ŋkɔwo gbɛmɛgbɛmɛ sa; vɔ ecɛyɛɔ, ŋvayɔkɔ wowo ŋkɔwo koɖo ɖashi. 19 Gugu yí le te kpɔ wo, wowo xoduwo yí nyi wowo mawu, wosɔ ŋkpɛnnuwo yikɔ go, nyigban ji nuwo ɖekɛ yí wobunɔ kpɔ. 20 Vɔ mìwoɔ, jeŋkwi mɛ jumɛviwo yí mìnyi yí mìle te veviɖe kpɔ hwlɛngantɔ ɖeka ci yí aso enɔ, eyi nyi Axwetɔ Yesu Kristo. 21 Ázan yi ŋsɛn gangan lɔ ci esɔ kpanɔ nɔ enuwo pleŋ yí asɔ trɔ mìwo lankpu ci yí gbɔjɔ lɔ yí avale shigbe* yi lankpu ci nu kanfukanfu le hannɛ.