Wema Amɛvetɔ ci Woŋwlɛ Ðaɖa Korɛntitɔwo
4 Eyi taɖo ci woku ŋshishi nɔ mì yí sɔ sɛnsɛndɔ cɛ na mìɔ, mìdana ta o. 2 Vɔ mìtashi ŋkpɛnnuwana ciwo yí wowanɔ le wlawlamɛ, mìdewanɔ ayemɛnu alo trɔnɔ ta do gu nɔ Mawu nyɔ lɔ o, vɔ mìna nyɔnɔnwi lɔ zenɔ petii yí mìnyi kpɔwɛ nɔ ayexa amɛwo pleŋ tɔ le Mawu ŋmɛ. 3 Le nyɔnɔnwi mɛ, nɔ wosɔ enu cɔn eŋɛnywi ci mìdrakɔ jiɔ, wosɔ enu cɔn ji nɔ mɛ ciwo yí agu. 4 Xexe* cɛ mɛ mawu tɔn ŋkuvi nɔ maxɔsetɔwo susu nɔ woŋgbemɔŋje eŋɛnywi lɔ mɛ keŋ nɔ Kristo ci yí ɖo Mawu nɔnɔmɛ han ŋɛnywi gangan lɔ ŋgbeklɛn nɔ wo o. 5 Ðo mìdexokɔ nuxu so mìwoɖekiwo nu o, vɔ Yesu Kristo nu mìxokɔ nuxu so mɔ eyi nyi Axwetɔ lɔ yí mìwo nyi míwo hwashiwo do Yesu ŋci. 6 Mawu yí nu mɔ: “Ezo le klɛn so vinvin mɛ.” Eyi ena mìwo jiwo klɛn to Kristo ŋmɛ ji koɖo nunya gangan Mawu tɔ.
7 Gan mìɖo dɔkunu cɛ le esuzewo mɛ, eyi edasɛ mɔ mìxɔ ŋsɛn ci yí wugan agbetɔ tɔ, ŋsɛn cɛ deso mìwoŋtɔwo gbɔ o, vɔ Mawu gbɔ yí eso. 8 Wojan mì to afishiafi, vɔ dena yí mìahwan yí eglo o; mìdan ta nɔ mìwoɖekiwo, vɔ dena yí mìdan ŋci mìawa o.* 9 Woci yumɛ nɔ mì, vɔ Mawu degbe mì ɖɛ o; wosɔ mì ya gu do nyigban, gan mìdeku o. 10 Hweshiahwenuɔ, mìkpenɔ fun yí mìwo gbe nɔnɔ afɔku mɛ shigbe Yesu tɔ hannɛ keŋ nɔ Yesu gbe aze petii le mìwo lankpu mɛ. 11 Ðo mìwo ciwo yí le agbeɔ, mìkpannɔŋkɔ eku hweɖekpokpuinu do Yesu ŋci keŋ nɔ Yesu gbe atɛnŋ aze le mìwo gbaza ci yí aku mɛ. 12 Eyi taɖo eku le edɔ wakɔ le mìwo mɛ yí agbe le míwo mɛ.
13 Enu ci woŋwlɛ ɖɛ ke: “Ŋɖo xɔse, eyi taɖo ŋxokɔ nuxu”; mìwo can mìdasɛ mɔ mìɖo xɔse ŋtɔ́ han, eyi taɖo mìxokɔ nuxu. 14 Mìnya mɔ Mɛ ci yí fɔn Yesu so ku afɔn mìwo can hɛnnɛ keŋ asɔ ta nɔ Yesu nɔ woadasɛ mìwo koɖo míwo doju. 15 Ðo míwo ŋci yí wowa ŋcɛwo pleŋ, nɔ xomɛvu gangan lɔ asukɔgbɔ doji keŋ nɔ amɛ sugbɔ akanfu Mawu yí ado akpe ni.
16 Eyi taɖo mìdana ta o, vɔ nɔ mɛ ci mìnyi le agogbe dadahɛn can ɔ, kankandoji li mɔ mɛ ci mìnyi le xomɛ trɔtrɔ yoyu ŋkeŋke. 17 Ci efunkpekpe* lɔ nyi hwenu kleŋ ɖe nu yí desɛnŋ can ɔ, éhɛnnɔ kanfukanfu mavɔ ci yí gangan wu* enuwo pleŋ vɛ; 18 eyi mìdesɔ mìwo ŋkuviwo ɖonɔ ŋciwo yí wokpɔnɔ ji o, vɔ mìsɔ susu ɖonɔ enu ciwo yí wodekpɔnɔ ji, ɖo ŋciwo yí wokpɔnɔ nini na nɔ hwenu kleŋ ɖe, vɔ enu ciwo yí wodekpɔnɔ nini tɛgbɛɛ.