Wema ci Woŋwlɛ Ðaɖa Galatitɔwo
6 Nɔviwo, nɔ mɛɖe ɖe afɔ dɔndɔn ɖe gbɔxwe yí vanya can ɔ, míwo ciwo yí sɛnŋ le gbɔngbɔn mɛ le tekpɔ adra mɛ ŋtɔ́ do koɖo xomɛfafa. Vɔ cɔ̀ eoɖeki nɔ woŋgbete eoŋtɔ can kpɔ o. 2 Míkpɔtɔ asɔnɔ míwonɔnɔwo gbanwo; nɔ míwɛ ahan ɔ, anyi míwakɔ do Kristo se lɔ ji. 3 Nɔ mɛɖe bukɔ mɔ yenyi ŋɖe gan yí denyi ŋɖeɔ, éblekɔ yiɖeki. 4 Vɔ mɛɖekaɖeka le bu tamɛ kpɔ so yiŋtɔ nuwanawo nu, eyi akpɔ ŋci yí adɔ akpɔ jijɔ do yiɖeki nu yí danyi mɛbu yí asɔ yiɖeki sɔ sɔnɔ kpɔ koɖo o. 5 Ðo mɛɖekaɖeka ahɛn yiŋtɔ gban.*
6 Mɛ ci wokpla nu le ma enunywi ciwo pleŋ yí le shi koɖo mɛ ci yí kpla enu lɔ yi.
7 Míŋgbelɔn nɔ woable mí domɛ o: Wodatɛnŋ atrɔ Mawu tomɛ o. Ðo ŋci mɛɖe doɔ, eyi lɔ ke asɔ. 8 Ðo nɔ mɛɖe do nu sɔgbe koɖo yi gbazaɔ, ávasɔ eku le mɛ, vɔ nɔ mɛɖe do nu sɔgbe koɖo gbɔngbɔn lɔɔ, ásɔ agbe mavɔ le mɛ. 9 Eyi taɖo mìŋgbemi enunywi wawa o, ɖo nɔ enu decikɔ nɔ mìɔ,* mìavasɔ enu ci mìdo le gamɛ nywitɔ ji. 10 Eyi nɔ emɔ vlɛ yí hun nɔ mì duuɔ,* mìawanɔ enunywi nɔ mɛshiamɛ. Vɔ taŋtaŋ ɔ, mìawɛni nɔ mìwo kpena xɔsetɔwo.
11 Nyɛŋtɔ yí sɔ anyi lɔ̀ ŋwlɛ wema cɛ ɖaɖa mí. Míkpɔ lé wemakui lɔwo klo do ɖa!
12 Mɛ ciwo pleŋ yí jikɔ mɔ yewoanyɔ le agbetɔwo gbɔɔ, wowo yí teteɛkpɔ mɔ yewoaʒin mí ji nɔ míaso vo. Ci wodejikɔ mɔ wo le ci yumɛ nɔ yewo do efuntrenamɛci* Kristo tɔ ŋci ɖekɛ yí dɔ taɖo wowɛkɔ ahan. 13 Ðo mɛ ciwo yí so vo ŋtɔkpu can dewakɔ do Ese lɔ ji o, gan wojijiɛ mɔ míwo le so vo keŋ nɔ woatɛnŋ akpɔ enu ci woasɔ yi go le míwo gbazawo nu. 14 Vɔ ŋdasɔ ŋɖe yi go gbeɖe sɔ zeto efuntrenamɛci* mìwo Xwetɔ Yesu Kristo tɔ nu o, eyɛ ci ji woto yí wu xexe lɔ doŋ nɔ nyɛ yí gbewu nyɛ can doŋ nɔ xexe lɔ. 15 Evososo dele veviɖe o, evomasomaso can dele veviɖe o, vɔ enu ci yí le veviɖe taŋ yí nyi amɛ yoyu ciwo Mawu sɔ mí sɔ wakɔ. 16 Mɛ ciwo pleŋ yí wa ɖaŋ wakɔ do enyɔ cɛwo jiɔ, woakpɔ fafa yí Mawu aku ŋshishi nɔ wo. Ɛɛ, ányi ahan nɔ Izraɛli Mawu tɔ.
17 So egbɛ jiɔ, mɛɖe ŋgbedo aya nɔŋ o, ɖo jeshidu ciwo yí dasɛ mɔ Yesu hwashi ŋnyi le gotu nɔŋ.
18 Nɔviwo, mìwo Xwetɔ Yesu Kristo le wa xomɛvu gangan nɔ mí nɔ gbɔngbɔn nywi ci mídadasɛ. Amɛn.