Wema ci Woŋwlɛ Ðaɖa Filipitɔwo
2 Mítekpɔ adonɔ ŋsɛn míwonɔnɔwo le Kristo mɛ yí afanɔ akɔn nɔ míwonɔnɔwo koɖo lɔnlɔn, míbunɔ míwonɔnɔwo tɔ kpɔ yí alɔn míwonɔnɔwo yí agbesenɔ vevi do míwonɔnɔwo nu. 2 Nɔ míwɛ ahan ɔ, eji ajɔnɔŋ sugbɔ. Mínɔ fafa mɛ koɖo míwonɔnɔwo yí alɔn míwonɔnɔwo yí asɔ egbe ɖo ju keŋkeŋ le enuwana koɖo susu mɛ. 3 Míŋgbesɔ evu alo egoyiyi wa ŋɖekɛ o, vɔ mísɔ míwoɖekiwo hwenɔ yí akpɔnɔ mɛkpɛtɛwo mɔ wowugan yewo. 4 Denyi míwoŋtɔwo nyɔna ɖekɛ yí míajinɔ o, vɔ míjinɔ nyɔna nɔ mɛbuwo hɛnnɛ.
5 Míɖonɔ susu ci hanci yí le Kristo Yesu shi. 6 Ci eɖo nɔnɔmɛ ci han yí le Mawu shi can ɔ, deva susu mɛ ni kpɔ kpetii mɔ yeawɛ nɔ ye koɖo Mawu asɔ ta o. 7 Oo, vɔ étashi enuwo pleŋ ɖɛ yí lɔn mɔ yeanyi hwashi yí woji enyi agbetɔ. 8 Gbesɔ kpe niɔ, ci evanyi agbetɔ can ɔ, ésɔ yiɖeki hwe yí se tonu keke yi eku mɛ, ɛɛ, keke yí ku do efuntrenamɛci* nu. 9 Eyi taɖo Mawu sɔɛ da do texwe ci yí gangan wu yí wa xomɛvu ni keŋ yí sɔ ŋkɔ ci yí le eta nɔ ŋkɔwo pleŋ sɔ ni 10 keŋ nɔ mɛ ciwo pleŋ yí le jeŋkwi mɛ, nyigban ji koɖo nyigban cu mɛ aje klo ji le Yesu ŋkɔ mɛ. 11 Eyi aɖe ɖeshiaɖe anu mɔ Yesu Kristo nyi Axwetɔ yí enyi kanfukanfu nɔ Mawu Eda.
12 Eyi taɖo anyi xlɔ veviwo, denyi ci ŋle mí gbɔ ɖekɛ yí mísenɔ tonu o, vɔ mígbesekɔ tonu sɔwu ci ŋdele mí gbɔ o. Míkpɔtɔ asɔ bubu koɖo vɔnvɔn yí asɔ le egbla dokɔ nɔ hwlɛngankpɔkpɔ míwotɔ. 13 Ðo Mawu yí nyi mɛ ci yí donɔ ŋsɛn mí yí nanɔ mí edro koɖo ŋsɛn nɔ míasɔ wa enu ci yí ajɔ ji ni. 14 Míkpɔtɔ awanɔ enuwo pleŋ enyɔmato yí mídadɔnnɔ nyɔ o 15 keŋ nɔ míanyi mɛ ciwo yí mɛ́ koɖo mɛ ciwo yí wodedo hwɛ o yí anyi Mawu vi ciwo nu afɛn dele o, hwenu míkpɔtɔ le egbɛvi nyinashu dɔndɔnwo mɛ yí míaklɛnklɛn le wo mɛ shigbe kaɖigban nɛ nɔ xexe lɔ. 16 Mílé agbenyɔ lɔ do ashi gogwiɖe keŋ nɔ matɛnŋ akpɔ jijɔ le Kristo ŋkeke lɔ ji yí anyanya mɔ eju ci ŋlɔ alo edɔ sɛnsin ci ŋwa denyi gbali o. 17 Vɔ, nɔ wosɔŋ kɔkɔ ɖɛ shigbe vɛn ci wosɔ wa vɔnsa koɖo sɛnsɛndɔ kɔkɔɛ* ci gbɔ yí míwo xɔse kplɔ mí va hannɛ can ɔ, evivikɔ nɔŋ yí ŋkpɔkɔ jijɔ koɖo mí pleŋ. 18 Eɖo avivikɔ nɔ míwo can ahan yí míakpɔkɔ jijɔ koɖoŋ.
19 Ecɛyɛɔ, edrodroɔŋ le Axwetɔ Yesu mɛ mɔ, madɔ Timɔte ɖaɖa mí le majinjinɖe mɛ keŋ nɔ enyɔnywi ciwo yí agbɔ avanu so mí nu ado ŋsɛnŋ. 20 Ðo mɛɖe degbeli nɔŋ yí ɖo jijɔ shigbe eyɛ hannɛ yí ale bu nɔ mí nyɔnɔnwitɔ o. 21 Ðo mɛ ciwo pleŋ yí kpɔtɔɔ, wowotɔ ɖekɛ yí wonyanya, wodenyanya Yesu Kristo tɔ o. 22 Vɔ mínya mɔ Timɔte ŋtɔ dasɛ mɔ yedele ahan o, éwa edɔ koɖoŋ sɛnsinɖe evi koɖo eda tɔ han keŋ nɔ eŋɛnywi lɔ ayi ŋkɔ. 23 Eyi taɖo, eyɛ yí ŋnunuɔ mɔ nadɔ ɖaɖa nɔ ŋvlɛ yí nya lé enuwo ayi do nɔŋ. 24 Le nyɔnɔnwi mɛɔ, ŋkando ji le Axwetɔ lɔ mɛ mɔ nyɛŋtɔ can nava mí gbɔ sabaɖe.
25 Vɔ kakacɛɔ, ŋkpɔ mɔ ŋɖo adɔ Epafroditi ɖaɖa mí, ényi nɔvinyɛ ci yí wanɔ edɔ koɖoŋ yí gbenyi Kristo sɔja, eyɛ ci mídɔ ɖaɖa yí eva kpedo ŋnu le anyi ʒanwo mɛ. 26 Ecɛyɛɔ, éjijiɛ mɔ yeakpɔ mí pleŋ. Ci míse mɔ yɛbleɔ, éxa le yiɖeki mɛ. 27 Éble nyao keke yí ku cu; vɔ Mawu ku ŋshishi ni. Le nyɔnɔnwi mɛɔ, denyi yiɖekɛ yí eku ŋshishi nɔ o, vɔ éku ŋshishi nɔ nyɛ can keŋ nɔ nyɛŋgbele gbazavi sekɔ kplɔ nɔnɔ do o. 28 Eyi taɖo ŋɖe blɛ yí dɔdɔɛ ɖaɖa mí keŋ nɔ míkpɔɛɔ, míagbekpɔ jijɔ ke yí nyɛ can mavo le nyɛɖeki mɛ. 29 Míwa ɖaŋ axɔɛ le Axwetɔ lɔ mɛ koɖo jijɔ gangan shigbe lé míwɛni nɛ. Amɛwo shigbe mɛ cɛ hanciwo nɛ le kpɔtɔ anyinɔ amɛveviwo nɔ mí. 30 Ðo, éku do ta nɔ Kristo dɔ* lɔ cu yí sɔ yi gbe ke eku* keŋ yí nɔ míwo dumɛ yí do alɔŋ.