Wema Amɛvetɔ ci Woŋwlɛ Ðaɖa Korɛntitɔwo

9 Ŋkpɔɛ mɔ degbeʒan mɔ, maŋwlɛ nu ɖaɖa mí so enu ci woana asɔ kpedo amɛkɔkɔɛwo nu o. 2 Ðo ŋnya mɔ édrodroɔ mí veviɖe mɔ míawɛ yí ŋsɔ mí sɔ yikɔ go le Maseduanitɔwo gbɔ mɔ, exwe ɖeka han ke yɛ yí mɛ ciwo yí le Akayi le gbesɔsɔ yí kpakpa ci yí sɔsɔ mí dɔ yí ezo ɖo lanmɛ nɔ amɛ sugbɔ le wo mɛ. 3 Vɔ ŋdɔkɔ nɔviwo ɖaɖa mí nɔ lé mìsɔ mí sɔ yikɔ go do ŋgbevanyi enugbali le nyɔ cɛ mɛ o, vɔ nɔ míale gbesɔsɔ nyɔnɔnwitɔ shigbe lé ŋnui do nɛ. 4 Nɔ denyi ahan ɔ, nɔ Maseduanitɔwo va koɖoŋ yí vakpɔ mɔ mídele gbesɔsɔɔ, mìaɖu ŋkpɛn mɔ mìkando mí ji, vɔ ŋkpɛn awa míwo can. 5 Eyi taɖo ŋkpɔ mɔ yɛʒan mɔ manu nɔ nɔviwo nɔ woava mí gbɔ doŋkɔ nɔ mì yí abɔ ŋciwo pleŋ míɖo gbe mɔ yewoana ɖɛ keŋ nɔ woanyi enu ciwo mína so xomɛ faa, nɔ ŋgbevale shigbe mɔ wotafu mí do yí xɔ wo nɛ o.

6 Vɔ le nyɔ cɛ mɛɔ, nɔ mɛɖe do jinuku kankin ɔ, kankin avasɔ yí nɔ mɛɖe do sugbɔɔ, sugbɔ yí avasɔ. 7 Mɛɖekaɖeka le na nu shigbe lé eɖui le yiŋtɔ ji mɛ nɛ, ŋgbenyi koɖo vevisese alo ci wotɛ do ji taɖo o, ɖo Mawu lɔnnɔ mɛ ci yí nanɔ enu koɖo jijɔ.

8 Gbesɔ kpe niɔ, Mawu ɖo ŋsɛn yí awa xomɛvu gangan nɔ mí keke awugan keŋ nɔ ŋɖe ŋgbewudo mí o, vɔ míaɖo ŋciwo pleŋ míʒan yí awa edɔ nywi ɖeshiaɖe. 9 (Shigbe lé woŋwli ɖɛ nɛ mɔ: “Éna nu amɛwo xomɛvutɔ, éna nu wamɛnɔwo. Enujɔjɔɛwawa yitɔ akpɔtɔ ani tɛgbɛɛ.” 10 Mɛ ci yí nanɔ jinuku sugbɔ jinukudotɔ koɖo ŋɖuɖu amɛwo ana mí jinuku ci míado yí awɛ yí asugbɔ, ágbewɛ yí enujɔjɔɛwawa míwotɔ asɛn ku sugbɔ.) 11 Mawu cu shi nɔ mí le enuwo pleŋ mɛ keŋ nɔ míatɛnŋ awanɔ xomɛvu to emɔ ɖekpokpui ji nɔ enu ciwo mínanɔ amɛwo to mì ji adɔ yí woado akpe nɔ Mawu. 12 Ðo denyi woakpɔ ŋciwo yí wudo amɛkɔkɔɛ lɔwo gbɔ ɖekɛ taɖo yí míwakɔ sɛnsɛndɔ cɛ nɔ jugbaja o, vɔ mígbewɛkɔ hɛnnɛ keŋ nɔ amɛ sugbɔ ado akpe nɔ Mawu. 13 Nɔ míwa kpedonunanadɔ cɛɔ, ádasɛ mɛ ci ŋmɛ mínyi yí amɛwo akanfu Mawu, ɖo míwa nu esɔkɔgbe koɖo eŋɛnywi ci mídrakɔ kudo Kristo nu le jugbaja yí gbewa xomɛvu nɔ wo koɖo amɛwo pleŋ. 14 Eyi woɖeɖeɛ kuku do nu nɔ mí hɛnnɛ yí bubuɔ míwotɔ kpɔ veviɖe do xomɛvu gangan manumanu ci Mawu wa nɔ mí ŋci.

15 Enu ci Mawu na mì xomɛvutɔ lɔ wu nu nɔ mì yí mìdokɔ akpe ni.