Wema Ŋkɔtɔ ci Woŋwlɛ Ðaɖa Timɔte
4 Gan gbɔngbɔn mɛ nyɔ* lɔ nu petii mɔ le hwenu ciwo yí avava mɛɔ, mɛɖewo atrɔ gbeɖe xɔse lɔ ɖɛ yí avasɔ susu ɖokɔ amɛbleble nyɔ ciwo yí womɔ woso gbɔngbɔn mɛ* koɖo gbɔngbɔnvɔnwo nukplakplawo ji. 2 Woagbeɖokɔ to ayemɛnuwatɔ ciwo yí kannɔ ŋsu nyɔwo yí wowo yexa ku wikpaa shigbe ega zozu wosɔ mi nɛ. 3 Wogbenɔ nɔ amɛwo mɔ woŋgbele alɔ̀ o, eyi ŋɖuɖu ciwo yí Mawu wa yí mɛ ciwo yí ɖo xɔse yí wa ɖaŋ mɔŋje nyɔnɔnwi lɔ mɛ donɔ akpe keŋ yí ɖunɔɔ, wogbenɔ nɔ amɛwo mɔ woŋgbeɖu wo o. 4 Enu ciwo pleŋ Mawu wa nyɔ yí nɔ woxɔ eɖe duu yí do akpeɔ, wodeɖo agbi o. 5 Mawu nyɔ lɔ koɖo gbedodoɖa na yí ŋɖuɖu nɔnɔ kɔkɔɛɖe.
6 Nɔ èkplakɔ enu cɛwo nɔviwoɔ, ànyi Kristo Yesu dɔwavi nywi, eyi gbɔngbɔn mɛ nyɔwo koɖo enukplakpla nywi ciwo ji èwakɔ do pɛpɛpɛ ana yí àshinkɔ le gbɔngbɔn mɛ yí aɖokɔ ŋsɛn doji. 7 Vɔ gbè ŋsukankan xolɔlɔ ciwo yí denanɔ bubu Mawu o, nyɔnu shinshinwo yí lɔnɔ xo cɛ hanciwo. Nà kpla eoɖeki keŋ nɔ egbejinɔnɔ nɔ Mawu anyi enutajitɔ nɔ eo. 8 Ðo nyɔna hwɛɖeka yí le kanmɛtete* mɛ, vɔ egbejinɔnɔ nɔ Mawu nyinɔ nyɔna le enuwo pleŋ mɛ. Éna yí woxɔnɔ shicuwo le agbe mɛ kakayɛ, koɖo le esɔ ci yí gbɔgbɔ mɛ. 9 Enyɔ cɛ nyi nyɔnɔnwi yí woɖo alɔn do ji keŋkeŋ. 10 Ecɛ yí dɔ taɖo mìle edɔ wakɔ sɛnsinɖe yí le egbla ji veviɖe, ɖo Mawu agbuagbu lɔ ji yí mìsɔ mìwo mɔkpɔkpɔ da do, eyɛ yí nyi Hwlɛngantɔ nɔ amɛ hamɛhamɛwo pleŋ, taŋtaŋ ɔ, nɔ egbejinɔtɔwo.
11 Kpɔ̀tɔ anana ese cɛwo yí akplakɔ wo amɛwo. 12 Ŋgbelɔn gbeɖe nɔ mɛɖe agbali jajɛ ci ènyi o, vɔ nyì kpɔwɛ nɔ egbejinɔtɔwo le nuxuxoxo mɛ, le wana mɛ, le lɔnlɔn mɛ, le xɔse mɛ, le agbemɛminɔnɔ mɛ. 13 Kpɔ̀tɔ adokɔ vevi nu le jugbaja nuhlɛnhlɛn mɛ, le ŋsɛndodo amɛwo mɛ koɖo le enukplakpla amɛwo mɛ keke ana nɔ hwenu nava. 14 Ŋgbegbe ebumale nɔ enu ci wona eo to enyɔnunuɖɛ ji yí ele eo mɛ hwenu yí hamɛmɛshinshinwo sɔ wowo lɔ̀wo da do eo ji o. 15 Bùnɔ tamɛ kpɔ so enu cɛwo nu yí asɔ wo sɔ wa aotɔ keŋ nɔ amɛshiamɛ akpɔ lé èyikɔ ŋkɔ do petii. 16 Lènɔ ŋkuvi do eoɖeki koɖo enu ci èkplakɔ amɛwo nu hweɖekpokpuinu. Kpɔ̀tɔ adonɔ vevi nu le enu cɛwo mɛ, nɔ èwɛkɔ ahan ɔ, àhwlɛn eoɖeki koɖo mɛ ciwo yí ɖokɔ to eo gan.