Apotruwo Dɔwawawo
11 Apotruwo koɖo nɔvi ciwo yí le Ʒude se mɔ jukɔn bu mɛ tɔwo can xɔ Mawu nyɔ lɔ. 2 Eyi ci Piɛ va Ʒerusalɛmu ɔ, mɛ ciwo yí nunɔ mɔ woɖo aso evo tɔ enyɔ dɔndɔn koɖi. 3 Wonu mɔ: “Èyi tɔtɔnɔwo xwe mɛ yí ɖu nu koɖo wo.” 4 Eyi Piɛ dre enyɔ lɔ mɛ nɔ wo hlɛnhlɛnhlɛn yí nu mɔ:
5 “Hwenu ŋle Ʒope jugan lɔ mɛ yí dodoɔ gbe ɖaɖaɔ, ŋkpɔ ŋtegannu ɖeka. Ŋkpɔ ŋɖeka ci yí le shigbe lɛnvɔn gangan nɛ yí wolé zogui amɛnɛ lɔwo ni yí ɖyiɖyikɔ so jeŋkwi mɛ va ŋgbɔ. 6 Ci ŋglo mɛ kpɔ nywiɖeɔ, ŋkpɔ elan afɔamɛnɛnɔwo, gbemɛlanwo, elan ciwo yí sanɔ koɖo ciwo yí tanɔ to nyigban koɖo xeviwo le mɛ. 7 Eyi ŋse egbe ɖeka hɛnnɛ yí enu nɔŋ mɔ: ‘Piɛ, sò awu lan keŋ aɖu!’ 8 Vɔ ŋnu mɔ: ‘Axwetɔ, gbeɖe! Ŋdetɔ nu enuxoɖyixoɖyi alo enumakɔmakɔ ɖe kpɔ o.’ 9 Egbe lɔ gbeɖyi so jeŋkwi mɛ zevetɔ yí nu mɔ: ‘Mi ŋciwo Mawu sɔ wa enukɔkɔɛ yɔyɔ mɔ enuxoɖyixoɖyiwo.’ 10 Egbe lɔ gbenu ahan nɔŋ zetɔntɔ, eyi wogbekɔ enu lɔwo pleŋ yi jeŋkwi mɛ. 11 Hwenɔnu pɛɛ yí ŋsu amɛtɔn ɖekawo can va le te le ŋkɔ nɔ axwe ci mɛ mìle. Woɖo wo ɖaɖaŋ so Sezare. 12 Gbɔngbɔn lɔ nu nɔŋ mɔ nyɛ le yi koɖo wo, nyɛŋgbexo nu kpɔ ɖeeɖe o. Nɔviŋsu amadɛn cɛwo can kplɔ ŋdo yí mìyi ŋsu lɔ xwe mɛ.
13 “Énu nɔ mì mɔ, yekpɔ mawudɔla ɖeka le te le ye xwe mɛ yí emɔ: ‘Dɔ̀ amɛwo ɖaɖa Ʒope nɔ woayɔ Simɔ ci yí tɔ mɔ Piɛ vɛ nɔ eo. 14 Eyi anu enu ci eo koɖo ao xwemɛtɔwo pleŋ awa keŋ akpɔ hwlɛngan nɔ eo.’ 15 Vɔ ci ŋtɔ nuxu xoxoɔ, woxɔ gbɔngbɔn kɔkɔɛ lɔ shigbe lé mìwo can xɔɛ le tɔtɔmɛ nɛ. 16 Eyi ŋɖo ŋwi enyɔ ci Axwetɔ lɔ nunɔ hwenɔnu mɔ: ‘Eshi mɛ yí Ʒan ʒin amɛwo do, vɔ gbɔngbɔn kɔkɔɛ yí woasɔ wa ʒinʒindoshimɛ nɔ míwo.’ 17 Nɔ Mawu na enu ɖekɛ lɔ ke wowo can faa shigbe lé ena mìwo ciwo yí xɔ Axwetɔ Yesu Kristo ji se hɛnnɛ ɖe, mi nyɛŋnyi yí agbe nɔ Mawu ɔ?”*
18 Ci wose nyɔ cɛwoɔ, womi enyɔ dɔndɔn koɖo Piɛ* yí kanfu Mawu yí nunuɔ mɔ: “Edasɛ mɔ Mawu ji mɔ jukɔn bu mɛ tɔwo can atrɔ ji mɛ keŋ akpɔ agbe.”
19 Ci wowu Etiɛni ɔ, wotɔ yumɛ cici nɔ xɔsetɔ kpɛtɛwo, eyi taɖo wogban do yí yi Fenisi, Shipru koɖo Antiɔshi, vɔ Ʒuifuwo ɖekɛ yí wodradra eŋɛnywi lɔ nɔ. 20 Mɛɖewo le wo mɛ so Shipru koɖo Sirɛnu yí va Antiɔshi keŋ yí tɔ nuxu xoxo nɔ mɛ ciwo yí donɔ Grɛkigbe yí nunuɔ Axwetɔ Yesu ŋɛnywi lɔ nɔ wo. 21 Gbesɔwu hunnɔɔ, Yehowa* le koɖo wo yí amɛwo sugbɔ kpiŋ yí vatrɔ xɔsetɔwo yí kplɔ Axwetɔ lɔ do.
22 Hamɛ ci yí le Ʒerusalɛmu se enyɔ so wo nu yí dɔ Barnabasi ɖaɖa Antiɔshi. 23 Ci Barnabasi vaɖo yí kpɔ lé Mawu wa xomɛvu nɔ wo doɔ, ejɔ ji ni. Eyi edo ŋsɛn wo pleŋ mɔ wo le ɖui koŋ so ji mɛ keŋ akpɔtɔ anɔ gbeji nɔ Axwetɔ lɔ. 24 Amɛnywi yí Barnabasi nyi yí ɖɔ koɖo gbɔngbɔn kɔkɔɛ yí gbeɖo xɔse sɛnŋ. Eyi amɛ sugbɔ vaxɔ Axwetɔ lɔ ji se. 25 Barnabasi yi Tarsi mɔ yeaji Sɔlu kpɔ keke akpɔɛ dandan. 26 Ci evakpɔɛɔ, ékplɔɛ yi Antiɔshi, eyi wobɔnɔ doju koɖo hamɛ lɔ na nɔ exwe ɖeka blebu yí kpla nu amɛ sugbɔwo. Antiɔshi yí woyɔ enukplavi lɔwo le ŋkɔtɔ mɔ Kristotɔwo sɔgbe koɖo edro Mawu tɔ.
27 Le ŋkeke ŋtɔ́wo mɛɔ, enyɔnuɖɛtɔwo so Ʒerusalɛmu yí va Antiɔshi. 28 Enyɔnuɖɛtɔ ɖeka le wo mɛ yí tɔ mɔ Agabu. Gbɔngbɔn lɔ na yí enu ɖɛ mɔ eju gangan ɖeka ato le nyigban lɔ pleŋ ji. Eyi ejɔ ahan nyao le Klodu cɛkpakpa hwenu. 29 Eyi taɖo, enukplavi lɔwo ɖui mɔ mɛɖekaɖeka le sɔ enu ci ji esun ɖaɖa nɔviwo le Ʒude keŋ asɔ do alɔ̀ wo. 30 Eyi wowɛ ahan yí sɔ enu lɔwo jo nɔ Barnabasi koɖo Sɔlu yí wohɛn wo yi nɔ hamɛmɛshinshinwo.