Wema ci Woŋwlɛ Ðaɖa Efezitɔwo
2 Gbesɔwu hunnɔɔ, Mawu na yí míle agbe ci míku le míwo gɔjejewo koɖo míwo nuvɔnwo mɛ sa can. 2 Agɔjeje koɖo nuvɔn cɛwo mɛ yí mínɔ sa hwenu mínɔnɔ agbe sɔ koɖo enu ciwo yí jɔnɔ ji nɔ xexe cɛ cɛkpatɔ. Xexe lɔ cɛkpatɔ kakakɔ aya ɖeka ci yí nyi gbɔngbɔn ci yí le edɔ wakɔ le evi tonumasetɔwo mɛ yɛ. 3 Ɛɛ, mì pleŋ mìnɔ wo mɛ kpɔ yí nɔ agbe sɔ koɖo enu ciwo yí jɔnɔ ji nɔ mìwo gbaza. Mìwa do edro gbaza lɔ tɔ koɖo mìwo susuwo tɔ ji yí nyi dɔmɛzi viwo kpɔ shigbe mɛkpɛtɛwo nɛ. 4 Vɔ ci Mawu kunɔ ŋshishi nɔ amɛ sugbɔ yí gbelɔn mì sugbɔ taɖoɔ, 5 éwɛ yí mìle agbe koɖo Kristo ci mìnyi amɛkukuwo le mìwo gɔjejewo mɛ sa can, éwa xomɛvu gangan nɔ mí yí hwlɛn mí gan. 6 Gbesɔ kpe niɔ, éfɔn mì do agbe koɖo Kristo Yesu yí gbesɔ mì ɖo nyinɔnɔ koɖi le texwe ciwo yí le jeŋkwi mɛ, 7 keŋ nɔ le xexe* ci yí gbɔgbɔ mɛɔ, atɛnŋ avadasɛ lé xomɛvu gangan yitɔ do manumanu do le enywi ci yí ewanɔ nɔ mì le Kristo Yesu mɛ.
8 Xomɛvu gangan cɛ wowa nɔ mí yí hwlɛn mí gan to xɔse ji, denyi egbla ci míwoŋtɔwo do yí dɔ enyi ahan o, vɔ enu enyi Mawu na mí. 9 Oo, denyi edɔ ciwo yí amɛ wa nu yí wokpɔ do o, keŋ nɔ mɛɖe ŋgbesɔ ŋɖe asɔ yi go o. 10 Mìnyi edɔ ciwo yí Mawu sɔ alɔ̀ wa, éwa mì yí mìle ju koɖo Kristo Yesu yí awa edɔ nywi ciwo yí edra do ɖɛ nɔ mì doŋkɔ mɔ mìwo le wa.
11 Eyi taɖo míɖo ŋwi mɔ hweɖekanu vayiɔ, mɛ ciwo yí wosɔ alɔ̀ “so vo” nɔ yɔnɔ míwo ciwo yí denyi Ʒuifuwo mɔ “tɔtɔnɔwo.” 12 Hwenɔnuɔ, mídejeshi Kristo ɖɛ o, míle azɔge nɔ Izraɛli jukɔn lɔ, mínyi mɛdruwo nɔ enublabla ciwo yí kuso gbeɖu lɔ nu; mídekpɔkɔ emɔ nɔ ŋɖekɛ o yí mídejeshi Mawu ɖɛ le xexe lɔ mɛ o. 13 Vɔ to Kristo hun jiɔ, míwo ciwo yí le azɔge nɔ Mawu sa vagogui yí míle ɖekɛ koɖo Kristo Yesu yɛ. 14 Ðo Kristo yí hɛn fafa vɛ nɔ mì, eyi nyi mɛ ci yí sɔ gbɛbɔbɔ amɛve lɔwo xoca yí enyi ɖeka yí gban egli ci yí le gblamɛ nɔ wo. 15 Éto yi hun ji yí ɖe enu ci yí dɔ yí manyimanyi lɔ li swi, enu lɔ yí nyi ese ciwo yí wodo do Moizi Se lɔ mɛ. Éwa ecɛ keŋ asɔ gbɛbɔbɔ amɛve lɔwo xoca yí woanyi amɛ yoyuwo* yí anɔ ɖekɛ koɖi keŋ awa fafa. 16 Ékpedo gbɛbɔbɔ amɛve lɔwo nu yí wodra gblamɛ do nɔ wowo koɖo Mawu to efuntrenamɛci* lɔ ji keŋ nɔ gbɛbɔbɔ amɛve cɛwo avatrɔ lankpu ɖeka, ɖo yiŋtɔ ɖe enu ci yí dɔ yí manyimanyi lɔ li swi. 17 Eyi eva keŋ yí dra fafa ŋɛnywi nɔ mɛ ciwo yí le azɔge nɔ Mawu koɖo mɛ ciwo yí sɔ gbɔ. 18 Ðo to eyɛ jiɔ, mìwo ciwo yí nyi gbɛbɔbɔ amɛve lɔwo yinɔ Eda gbɔ faa to gbɔngbɔn kuɖeka lɔ ji.
19 Eyi taɖo mídegbenyi mɛdruwo koɖo eju bu mɛ tɔwo o, vɔ mínyi jumɛviwo shigbe amɛkɔkɔɛwo nɛ yí gbenyi Mawu xwemɛtɔwo. 20 Eyi wosɔ mí wa exɔ yí cu do gɔnmɛɖokpe ci yí nyi apotruwo koɖo enyɔnuɖɛtɔwo ji, eyi Kristo Yesu ŋtɔ nyi zoguijikpe nɔ gɔnmɛɖokpe lɔ. 21 Le Kristo mɛɔ, exɔ lɔ pleŋ ci wocu wa ɖaŋ ca do nɔnɔnu yí vanyinyiɛ gbedoxɔ kɔkɔɛ nɔ Yehowa.* 22 Le Kristo mɛɔ, wosɔ míwo can wa exɔ yí bɔ cucuɔ do texwe ɖeka nɔ anyi fini Mawu anɔ to gbɔngbɔn lɔ ji.