Apotruwo Dɔwawawo
18 Yi goduɔ, Pɔlu so le Atɛni yí va Korɛnti. 2 Ékpɔ Ʒuifu ɖeka ci yí tɔ mɔ Akilasi, ényi Pɔn vijiji. Yinɛ yɛ koɖo ashiɛ Prisila so Itali yí va yɛ nɛ, ɖo Klodu ɖe gbe mɔ Ʒuifuwo pleŋ lé so le Rɔma. Eyi Pɔlu yi wo gbɔ. 3 Ci enyi edɔ ɖekɛ lɔ wowanɔɔ, éze wo gbɔ yí wa edɔ koɖo wo, ɖo avɔnzavawatɔwo yí wonyi. 4 Éxonɔ nuxu* le Ʒuifuwo nukplaxu sabatigbe duu. Éwɛni keke Ʒuifuwo koɖo Grɛkitɔwo kannɔdo enyɔ lɔ ji.
5 Ci Silasi koɖo Timɔte so Maseduani yí vaɔ, enyɔ lɔ nunu yí nyi ŋci yí vabia ŋkuvi nɔ Pɔlu koŋ. Éɖekɔ kunu nɔ Ʒuifuwo yí ɖoɖoɔ kpe yi ji mɔ Yesu yí nyi Kristo lɔ. 6 Vɔ ci Ʒuifuwo kpɔtɔ fɔnfɔn gu do Pɔlu ji yí nunuɔ enyɔmanyɔmanyɔwo so nuɔ, éxuxu yi wuwo yí nu nɔ wo mɔ: “Míwo hun le nɔ kɔ nɔ míwoŋtɔwo, nyɛŋdele mɛ o. Tɔ so evyɛɔ, nayi jukɔn bu mɛ tɔwo gbɔ.” 7 Eyi eso le enɔ.* Éyi ŋsu ɖeka ci yí tɔ mɔ Titiusu Ʒutusi xwe mɛ, ényi Mawu sɛntɔ yí yi xwe le axa nɔ Ʒuifuwo nukplaxu lɔ. 8 Vɔ Krispusi ci yí nyi Ʒuifuwo nukplaxu lɔ jikpɔtɔ koɖo yi xwemɛtɔwo pleŋ xɔ Axwetɔ lɔ ji se. Korɛntitɔ sugbɔ ciwo yí se nyɔ lɔ trɔ xɔsetɔwo yí woʒin wo do eshi mɛ. 9 Gbesɔ kpe niɔ, Axwetɔ lɔ nu nɔ Pɔlu le ŋtegannukpɔkpɔ ɖeka mɛ le zanmɛ mɔ: “Ŋgbevɔn o, kpɔtɔ anukɔ enyɔ lɔ, ŋgbebɔ nu o. 10 Ŋle koɖo eo yí mɛɖekpokpui dafɔn do eo ji yí awa ŋɖe nɔ eo o. Ðo amɛwo sugbɔ le ŋshi le eju cɛ mɛ.” 11 Eyi taɖo eci nɔ yí wa exwe ɖeka koɖo wleci amadɛn yí kplakpla Mawu nyɔ lɔ wo.
12 Hwenu Galiɔn nyi Akayi jujikpɔtɔɔ, Ʒuifuwo jɔn nu yí fɔn do Pɔlu ji yí kplɔɛ va ehwɛ ŋkɔ. 13 Wonu mɔ: “Ŋsu cɛ dodoɔ to nɔ amɛwo mɔ wo le sɛn Mawu to akpo nɔ lé ese lɔ mɔ wo le sin do.” 14 Vɔ ci Pɔlu jikɔ axo nuxuɔ, Galiɔn nu nɔ Ʒuifu lɔwo mɔ: “Oo Ʒuifuwo, nɔ enyi enudɔndɔn alo nuvɔn gangan ɖe yí ewa nyaoɔ, anyɔ mɔ mado ʒinxo aɖo to mí. 15 Vɔ nɔ enyi enyɔ mídɔndɔn so enyɔgbewo, ŋkɔwo koɖo míwoŋtɔwo sewo nuɔ, míwoŋtɔwo míkpɔ gbɔ. Nyɛŋdejikɔ aɖo kojo so ŋtɔ́wo nu o.” 16 Eyi enya wo ti le kojoɖoxu lɔ. 17 Eyi taɖo wo pleŋ lé Sosutɛnu ci yí nyi Ʒuifuwo nukplaxu jikpɔtɔ lɔ yí tɔ xuixui le kojoɖoxu lɔ ŋkɔ. Vɔ Galiɔn dedo nu enyɔ cɛwo mɛ ɖeeɖe o.
18 Ci Pɔlu gbenɔ hunnɔ na nɔ ŋkeke ɖewo ɖegbɔɔ, éklan nɔvi lɔwo yí ɖo tɔjihun yí yi Siri. Prisila koɖo Akilasi yi koɖi. Ékpa yi ɖa le Sankre nɔ egbe ci eɖo ŋci. 19 Ci wovaɖo Efezi ɔ, éso gbeɖe wo ɖɛ le nɔ, vɔ éyi Ʒuifuwo nukplaxu yí dre nu mɛ nɔ Ʒuifuwo. 20 Ci woɖe kuku ni mɔ yɛ le ci yewo gbɔ can ɔ, delɔn o. 21 Vɔ éklan wo yí nu nɔ wo mɔ: “Nɔ édro Yehowa* ɔ, nagbetrɔ va mí gbɔ.” Eyi eɖo tɔjihun so Efezi 22 yí vaci te do Sezare. Éyi* do gbe nɔ nɔvi ciwo yí le hamɛ lɔ mɛ, yi goduɔ, évayi Antiɔshi.
23 Ci enɔ hunnɔ hwɛɖekaɔ, éso yí dan to afiwo-afiwo nɔ Galati ju lɔ koɖo Friʒi yí dodoɔ ŋsɛn enukplavi lɔwo pleŋ.
24 Ʒuifu ɖeka ci yí tɔ mɔ Apolosu yí nyi Alɛsandri vijiji va Efezi. Ényi nuxuxotɔ bibi ɖeka yí wa ɖaŋ jeshi Enuŋwlɛŋwlɛ lɔwo ɖɛ nywiɖe. 25 Wokpla Yehowa* mɔ lɔ ŋsu cɛ.* Eyi Mawu gbɔngbɔn na yí kpakpa sɔɛni nɔ éle nuxu xokɔ. Éxokɔ nuxu yí kplakpla nu amɛwo so Yesu nu yí esɔkɔgbe pɛpɛpɛ. Vɔ ʒinʒindoshimɛ nyɔ ci Ʒan nu nɔ amɛwo ɖekɛ yí ejeshi ɖɛ. 26 Ésɔ edɔngbegbe yí tɔ nuxu xoxo le Ʒuifuwo nukplaxu lɔ. Eyi ci Prisila koɖo Akilasi ɖo to yiɔ, wokplɔɛ bɔdo wowoɖekiwo nu yí wa ɖaŋ dre Mawu mɔ lɔ mɛ ni nywiɖe doji. 27 Vɔ ci eji mɔ yeayi Akayi ɔ, nɔvi lɔwo ŋwlɛ nu ɖaɖa enukplavi lɔwo yí nu nɔ wo mɔ wo le xɔɛ nywiɖe. Ci evayi ɖo nɔɔ, ékpedo mɛ ciwo Mawu wa xomɛvu nɔ nu sugbɔ yí wotrɔ xɔsetɔwo. 28 Ðo édasɛ le jugbaja koɖo ŋsɛn mɔ, Ʒuifuwo nyɔ dɔn yí zan Enuŋwlɛŋwlɛ lɔwo yí sɔ ɖoɖoɔ kpe yi ji nɔ wo mɔ Yesu yí nyi Kristo lɔ.