Wema Amɛvetɔ ci Woŋwlɛ Ðaɖa Korɛntitɔwo

6 Ci mìle edɔ wakɔ doju koɖo Mawu ɔ, mìdokɔ ŋsɛn mí hɛnnɛ mɔ míwo le xɔ xomɛvu gangan Mawu tɔ lɔ yí míŋgbexɔɛ do gbali mɛ o. 2 Ðo énu mɔ: “Ci ega xo yí nawa xomɛvu nɔ eoɔ, ŋɖo to eo yí le hwlɛngan ŋkeke lɔ jiɔ, ŋkpedo eo nu.” Kpɔ ɖa! Xomɛvu wawa hwenu lɔ koŋ ke. Kpɔ ɖa! Hwlɛngan ŋkeke lɔ ke.

3 Mìdewakɔ ŋɖekpokpui ci yí adɔ mɛɖe aklɛn afɔ o, keŋ nɔ woŋgbevakpɔ afɛn ɖe le sɛnsɛndɔ mìwotɔ lɔ nu o. 4 Vɔ le enushianu mɛɔ, mìdanasɛ mɔ mìnyi Mawu dɔwatɔwo, mìdonɔ ji le tetekpɔ vovovowo mɛ, le efunkpekpewo mɛ, le hwenu gbɔnnugbɔnnuwo mɛ koɖo le cukaɖawo mɛ. 5 Woxo mì, wocu mì do gakpa mɛ, tamɛsɛntɔwo je mì ji, mìwa edɔ sɛnŋsɛnŋwo, mìcinɔ alɔnmadɔn ezan ɖewo mɛ, mìnɔnɔ shive hweɖewonu. 6 Mìnɔnɔ agbe mɛmi, mìnɔnɔ agbe sɔ koɖo enu ci mìjeshi, mìgbɔnnɔ ji ɖɛ, mìfanɔ xomɛ, gbɔngbɔn kɔkɔɛ yí danasɛ emɔ nɔ mì, ayemɛnuwawa denɔnɔ lɔnlɔn ci mìɖo nɔ amɛwo mɛ o. 7 Mìnunɔ nyɔnɔnwi, mìkannɔdo Mawu ŋsɛn ji; mìhɛnnɔ jɔjɔɛnyinyi hwawanuwo do ɖushi lɔ̀* koɖo emiɔ lɔ̀ mɛ,* 8 wokannɔfu mì, woɖenɔ mì kpɔtɔ, wonunɔ enyɔvɔnwo koɖo enyɔnywiwo so mì nu. Wokpɔnɔ mì do ŋsukantɔwo ji gan yí enyi nyɔnɔnwi mìnukɔ. 9 Wokpɔnɔ mì do amɛmajeshiɖɛwo ji gan wotrɔgbɔ jeshi mì ɖɛ. Wokpɔnɔ mì do mɛ ciwo yí jikɔ aku* ji, gan mìle agbe ceɖeceɖe. Wokpɔnɔ mì shigbe mɛ ciwo wodɔn to nɔ nɛ, vɔ wodesɔ mì jo mɔ wo le wu o. 10 Amɛwo bunɔ mɔ mìwo le ŋshishi mɛ gan eji trɔgbɔ jɔnɔ mì, wokpɔnɔ mì do wamɛnɔwo ji, vɔ enyi mìwo yí do dɔku axwe nɔ amɛ sugbɔ, wokpɔnɔ mì mɔ mìdeɖo ŋɖe o, gan yí enuwo pleŋ le mì shi.

11 Korɛntitɔwo, mìnu enyɔwo pleŋ nɔ mí,* mìhun mìwo jiwo nɔ mí gbajaa. 12 Mìdegble eka kpɔtɔ nɔ lɔnlɔn ci mìɖo nɔ mí o, vɔ míwo gble eka kpɔtɔ nɔ lɔnlɔn ci míɖo nɔ mì. 13 Eyi taɖo ŋxokɔ nuxu nɔ mí shigbe vinyɛwo nɛ mɔ, míwo can míhun míwo jiwo nɔ mì gbajaa.

14 Míŋgbeca gbɛ koɖo maxɔsetɔwo o,* ɖo ekacaca ci yí le gblamɛ nɔ enujɔjɔɛwawa koɖo esejimawamawaɔ? Alo fini klɛnklɛn koɖo vinvin ba doɔ? 15 Gbesɔ kpe ni ɖe, ekacaca ci yí le gblamɛ nɔ Kristo koɖo Beliali ɔ?* Alo nyi yí le gblamɛ nɔ xɔsetɔ* koɖo maxɔsetɔɔ? 16 Eyi ekacaca ci yí le gblamɛ nɔ Mawu gbedoxɔ koɖo vojuwoɔ? Ðo mìwo yí nyi Mawu agbuagbu lɔ gbedoxɔ shigbe lé Mawu nui nɛ mɔ: “Nanɔ gblamɛ nɔ wo, nazɔn koɖo wo, nanyi wowo Mawu yí woanyi anyi jukɔn.” 17 “Yehowa* nu mɔ: ‘Eyi taɖo, míto so wo mɛ, míte le wo nu, míŋgbetɔ alɔ̀ enumakɔmakɔ ke o’”; “‘eyi naxɔ mí.’” 18 “‘Eyi natrɔ eda nɔ mí yí míatrɔ vinyɛ ŋsuviwo koɖo vinyɛ nyɔnuviwo,’ Yehowa* Ŋsɛnwopleŋtɔ lɔ yí nui.”