Wema ci Woŋwlɛ aɖa Rɔmatɔwo
15 Vɔ mìwo ciwo shi ŋsɛn le ɖo abunɔ mɛ ciwo shi ŋsɛn dele tɔ kpɔ yí mìdawawa enu ci yí jɔnɔ ji nɔ mìwoŋtɔwo o. 2 Mɛɖekaɖeka le mì mɛ le wakɔ enu ci yí ajɔ ji nɔ yi kpena nɔ nyɔna yitɔ keŋ asɔ do ŋsɛn yi. 3 Kristo ŋtɔkpu dewa enu ci yí jɔ ji nɔ yiŋtɔ o, shigbe lé woŋwli ɖɛ so nu nɛ mɔ: “Enyɔ ciwo yí amɛwo nu yí sɔ zu eoɔ, wowo lɔwo ke wonu yí sɔ zu nyɛ can.” 4 Ðo enu ciwo pleŋ woŋwlɛ ɖɛ saɔ, woŋwlɛ wo ɖɛ yí asɔ kpla nu mì keŋ nɔ ejidodo koɖo akɔnfafa ciwo mìkpɔnɔ le Enuŋwlɛŋwlɛ lɔwo mɛ atɛnŋ ana emɔkpɔkpɔ mì. 5 Mawu ci yí nanɔ ejidodo koɖo akɔnfafa amɛ le na míwo ɖekaɖeka aɖo susu ci hanci yí le Kristo Yesu shi, 6 keŋ nɔ míabɔ asɔ gbe ɖo ju akanfu Mawu ci yí nyi Eda nɔ mìwo Xwetɔ Yesu Kristo.
7 Eyi taɖo, míxɔ míwonɔnɔwo shigbe lé Kristo can xɔ mí nɛ nɔ kanfukanfu anyi Mawu tɔ. 8 Ðo ŋnukɔ nɔ mí mɔ Kristo vawa dɔ nɔ Ʒuifuwo* yí adasɛ mɔ Mawu tonɔ nyɔnɔnwi keŋ asɔ ɖo kpe egbe ciwo yí Mawu ɖo nɔ wowo tɔgbiwo ji. 9 Ecɛ ana yí jukɔnwo akanfu Mawu nɔ ŋshishikuku yitɔ shigbe lé woŋwli ɖɛ nɛ mɔ: “Eyi na taɖo nakanfu eo le jugbaja le jukɔnwo mɛ, naji ha akanfu ao ŋkɔ.” 10 Eyi egbenu mɔ: “Míwo ciwo yí nyi jukɔn bu mɛ tɔwo, míkpɔ jijɔ koɖo yi jukɔn.” 11 Égbenu mɔ: “Jukɔnwo pleŋ le kanfu Yehowa,* mɛshiamɛ le kanfui.” 12 Eyi Ezai gbenu mɔ: “Eke Ʒɛse tɔ ava keŋ akpa nɔ jukɔnwo; eyi nu jukɔnwo aɖoŋ do.” 13 Mawu ci yí nanɔ emɔkpɔkpɔ le na nɔ míakpɔkpɔ jijɔ koɖo fafa sugbɔ ci míkando ji keŋ nɔ emɔkpɔkpɔ míwotɔ asɛnsɛnŋ doji le gbɔngbɔn kɔkɔɛ lɔ ŋsɛn mɛ.
14 Nɔvinyɛwo, nyɛŋtɔ ŋkando mí ji mɔ míwo can míwanɔ nunywi sugbɔ, mígbejeshi enu sugbɔ yí atɛnŋ akpla nu míwonɔnɔwo. 15 Vɔ ŋŋwlɛ nu ɖaɖa mí yí xa yi enyɔ ɖewo ji nɔ mí tiin keŋ asɔ ɖo ŋwi enyɔ cɛwo nɔ mí do xomɛvu gangan ci Mawu wa nɔŋ ŋci. 16 Ŋnyi Kristo Yesu dɔwavi nɔ jukɔnwo. Ŋje agbla yí nunuɔ Mawu ŋɛnywi lɔ yí sɔ le edɔ kɔkɔɛ wakɔ keŋ nɔ jukɔn cɛwo atɛnŋ anyi enunana ci yí jɔ ji nɔ Mawu, wosɔ enunana cɛ wa enukɔkɔɛ ni to gbɔngbɔn kɔkɔɛ ji.
17 Eyi taɖo eji jɔkɔŋ mɔ ŋnyi Kristo Yesu nukplavi yí gbele Mawu dɔ wakɔ. 18 Ðo ŋdaxo nuxu so ŋɖekpokpui ci nyɛŋtɔ ŋwa nu o, vɔ ŋci ɖekɛ nu naxo nuxu so yí nyi ŋci Kristo to ŋji yí wa keŋ nɔ jukɔnwo atɛnŋ ase tonu ni. Éwa ecɛ to anyi nuxuwo koɖo anyi nuwanawo ji. 19 Égbewɛ to enujiŋ gangan hamɛhamɛwo koɖo Mawu gbɔngbɔn lɔ ŋsɛn ji hɛnnɛ. Ecɛ na yí ŋdra eŋɛnywi ci yí kuso Kristo nu kitokito so Ʒerusalɛmu keke vayi kɔdo Iliri. 20 Le nyɔnɔnwi mɛɔ, ecɛ na yí ŋɖui mɔ ŋdadra eŋɛnywi lɔ le fini wojeshi Kristo ŋkɔ le vɔ o, keŋ nɔ nyɛŋgbevacu exɔ do gɔnmɛɖokpe ci mɛbu ɖo ji o. 21 Vɔ shigbe lé woŋwli ɖɛ nɛɔ, “Mɛ ciwo yí dese nyɔ ɖe so nu akpɔɛ yí mɛ ciwo yí dese nyɔ ɖe ase gɔnmɛ ni.”
22 Eyi dɔ hɛnnɛ yí ŋdrɔɛ zenɛniɖe mɔ mava mí gbɔ, vɔ deje ji o. 23 Vɔ enyɔ lɔ yí gbenyi mɔ, fiɖe dekpɔtɔ le eju cɛwo mɛ yí ŋdegɔnma yi o. Éwa exwe sugbɔ yɛ yí edrodroɔŋ veviɖe mɔ mava mí gbɔ. 24 Eyi taɖo nɔ ŋvayikɔ Ɛspanyi ɔ, ájɔ ji nɔŋ mɔ navayɔ mí kpɔ. Eyi nɔ ŋva yí nɔ ju koɖo mí hwɛɖeka ɖegbɔɔ, míavayi ɖoŋ do mɔ ji. 25 Vɔ ecɛyɛɔ, ŋjikɔ aso kpe Ʒerusalɛmu keŋ akpedo amɛkɔkɔɛwo nu. 26 Ðo ejɔ ji nɔ nɔvi ciwo yí le Maseduani koɖo Akayi mɔ, yewoajɔ enu ciwo yí le yewo shi keŋ asɔ wo ɖaɖa nɔvi ciwo yí nyi wamɛnɔwo le amɛkɔkɔɛwo mɛ le Ʒerusalɛmu. 27 Nyɔnɔnwi yɔ, jijɔ enyi nɔ wo mɔ yewoawɛ ahan. Wokpɔɛ mɔ efɛn enyi yí yewoɖu do wo, ɖo wowo ciwo yí nyi jukɔn bu mɛ tɔwo kpɔkɔ nyɔna so gbɔngbɔn mɛ dɔ ciwo yí nɔvi cɛwo wakɔ mɛ. Eyi taɖo wokpɔɛ mɔ yewo can ɖo azan enu ciwo yí le yewo shi yí asɔ do alɔ̀ wo. 28 Eyi taɖo nɔ ŋwa edɔ cɛ ɖegbɔ yí sɔ enunana* lɔwo jo nɔ woɔ, navato mí gbɔ keŋ ayi Ɛspanyi. 29 Gbesɔ kpe niɔ, ŋnya mɔ nɔ ŋgbɔgbɔ mí gbɔɔ, nava koɖo Kristo shicu gɔɖɔɔ.
30 Ecɛyɛɔ, nɔviwo, ŋɖeɖeɛ kuku nɔ mí to mìwo Xwetɔ Yesu Kristo koɖo lɔnlɔn ci gbɔngbɔn lɔ nanɔ ji mɔ, míabɔdo ŋnu yí ado gbe ɖaɖa nɔ Mawu do ta nɔŋ veviɖe. 31 Míbiɔ Mawu mɔ yɛ le wɛ nɔ woahwlɛnŋ gan le alɔ̀ mɛ nɔ amɛmaɖoxɔse ciwo yí le Ʒude keŋ nɔ sɛnsɛndɔ ci wagbe ŋyikɔ le Ʒerusalɛmu ajeŋ nɔ amɛkɔkɔɛ lɔwo. 32 Eyi nɔ edro Mawu ɔ, nava mí gbɔ koɖo jijɔ yí mìado ŋsɛn mìwonɔnɔwo. 33 Mawu ci yí nanɔ fafa le nɔ koɖo mí pleŋ. Amɛn.