Wema ci Woŋwlɛ Ðaɖa Ebretɔwo
6 Eyi taɖo, ecɛyɛ ci mìkpla gɔnmɛjejenu ciwo yí kudo Kristo nu ɖegbɔɔ, mìayi ŋkɔ yí ashin le gbɔngbɔn mɛ yí mìdagbeɖo gɔnmɛɖokpe ke o, eyi nyi jimɛtrɔtrɔ so edɔwawa kukuwo mɛ koɖo woaxɔ Mawu ji se, 2 enukplakpla so ʒinʒindoshimɛwawa nu koɖo alɔ̀wo sɔsɔ da do amɛ ji, amɛkukuwo fɔnfɔn koɖo kojoɖoɖo mavɔ. 3 Eyi nɔ édro Mawu ɔ, ŋci mìawa nɛ.
4 Ðo mɛ ciwo yí klɛnklɛn lɔ klɛn nɔ yí wota jeŋkwi mɛ nunana faa lɔ kpɔ yí xɔ gbɔngbɔn kɔkɔɛ 5 yí ta Mawu nyɔnywi lɔ koɖo xexe* ci yí gbɔgbɔ ŋsɛnwo kpɔ 6 gan yí trɔ gbeɖe xɔse lɔ ɖɛɔ, ágbɔnnu mɔ woagbetrɔ asɔ wo wa amɛ yoyuwo nɔ jimɛtrɔtrɔ, ɖo wogbekan Mawu Vi lɔ do aci nu ke nɔ wowoɖekiwo yí dodoɔ ŋkpɛn yi le jugbaja. 7 Nyigban xɔnɔ shicu so Mawu gbɔ nɔ énukɔ eshi ci yí jakɔ blaŋblaŋ kɔ do ji yí minɔ nunywiwo nɔ mɛ ciwo yí dikɔ. 8 Vɔ nɔ émi ŋjaci koɖo aŋwakanwoɔ, wotanɔshi, eyi Mawu asɛn kpɛn ni le majinjinɖe mɛ yí woatɔ zo yi le vɔvɔnu.
9 Vɔ amɛveviwo, ci mìxokɔ nuxu ahan can ɔ, mìkando ji mɔ míwotɔ nyɔ wu, míwakɔ enu ciwo yí adɔ míakpɔ hwlɛngan. 10 Ðo Mawu denyi amɛmajɔmajɔ yí aŋlɔbe edɔ ciwo míwa koɖo lé mídasɛ do mɔ yewolɔn yi ŋkɔ ci míkpedo amɛkɔkɔɛwo nu yí kpɔtɔ kpekpeɛdo wo nu o. 11 Vɔ mìji mɔ mɛɖekaɖeka le mí mɛ adokɔ vevi nu ahan nɔ míakpɔtɔ akankando emɔkpɔkpɔ lɔ ji pleŋpleŋ keke yi vɔvɔnu 12 keŋ nɔ míŋgbevatrɔ ɖyiɖɔnɔwo o, vɔ míawa mɛ ciwo yí to xɔse koɖo jigbɔnɖɛxɔxɔ wowotɔ ji yí ɖu cinɔ nɔ gbeɖu lɔwo tɔ han.
13 Ðo ci mɛɖe deli yí gangan wu Mawu yí ata hwecinu eɖo gbe nɔ Abrahamu ɔ, éta yiɖeki 14 yí nu mɔ: “Nacu shi nɔ eo dandan yí awɛ yí ao viwo asugbɔ dandan.” 15 Eyi taɖo, ci Abrahamu do ʒinxoɔ, éxɔ gbeɖu cɛ. 16 Ðo nɔ agbetɔwo jikɔ ata nuɔ, wotanɔ mɛ ci yí gangan wu wo yí enu ci wota nyinɔ kpeɖoji mɔ enyɔ ci wonu nyi nyɔnɔnwi yí ena yí wodegbevadɔnnɔ nyɔ ɖe so nu o. 17 Ahanke ci Mawu ɖui mɔ yeadasɛ yi petii nɔ gbeɖu lɔ cinɔɖutɔwo doji mɔ enu ci yedrɔ do te* datrɔ gbeɖeɔ, éta nu yí sɔ ɖo kpe yi ji. 18 Enu amɛve cɛwo* ciwo yí Mawu wa datɛnŋ atrɔ gbeɖe o, Mawu datɛnŋ akan ŋsu gbeɖe o yí enu cɛwo donɔ ŋsɛn mìwo ciwo yí shi be do Mawu gbɔ keŋ atɛnŋ akpɔkɔ emɔ veviɖe nɔ enu ci yí le ŋkɔ nɔ mì. 19 Mìɖo emɔkpɔkpɔ cɛ ci yí le shigbe sege nɛ nɔ agbe* mìwotɔwo, kankandoji le nu yí elo do yí yi godu nɔ xɔmɛsovɔn lɔ, 20 fini Yesu doŋkɔ yí yi do ta nɔ mì, eyɛ ci yí vanyi avɔnsatɔ gangantɔ shigbe Mɛlkisedɛki nɛ tɛgbɛɛ.