Wema Ŋkɔtɔ ci Woŋwlɛ Ðaɖa Korɛntitɔwo

8 Ecɛyɛɔ, enyɔ ci ŋɖo yí anu so enu ciwo wosɔ sa vɔn nɔ vojuwo nu ke: Mì pleŋ mìnya ŋɖe so nyɔ cɛ nu. Enunyanya na yí woyinɔ go, vɔ lɔnlɔn donɔ ŋsɛn amɛ. 2 Nɔ mɛɖe bukɔ mɔ yejeshi ŋɖe ɖɛ can ɔ, dejeshi ɖɛ shigbe lé eɖo ajeshi ɖɛ do nɛ o. 3 Vɔ nɔ mɛɖe lɔn Mawu ɔ, Mawu jeshi ɖɛ.

4 Kuso enu ciwo wosɔ sa vɔn nɔ vojuwo ɖuɖu nuɔ, mìnya mɔ voju denyi ŋɖekɛ le xexe lɔ mɛ o, vɔ Mawu kuɖeka kpaŋ yí li. 5 Ðo enu sugbɔ le jeŋkwi mɛ alo nyigban ji yí woyɔnɔ mɔ mawu. Nɔ “mawuwo” sugbɔ li yí “axwetɔwo” sugbɔ li can ɔ, 6 Mawu kuɖeka yí li nɔ mìwo, eyi nyi Eda ci yí wa enuwo pleŋ yí mìle agbe ni yí Axwetɔ kuɖeka yí li, eyi nyi Yesu Kristo ci ji woto yí wa enuwo pleŋ yí mìle agbe to ji.

7 Ele ahan gan, denyi mɛshiamɛ yí mɔŋje mɛ ahan o. Mɛɖewo sɛnnɔ vojuwo sa, eyi taɖo nɔ woɖu ŋci wosɔ sa vɔn nɔ vojuwoɔ, wobuini mɔ yewokpɔtɔ le voju lɔwo sɛnkɔ; eyi wowo yexa ɖenɔ fun nɔ wo, ɖo wowo yexa gbɔjɔ. 8 Vɔ ŋɖuɖu dana yí mìate gogo Mawu o; ŋɖe dala mì nɔ mìdeɖui o; ahanke nɔ mìɖuiɔ, dana yí mìanyɔ wu o. 9 Míkpɔ nywiɖe nɔ acɛ ci míɖo yí asɔ gbeta ŋgbevanyi afɔklɛnnu nɔ mɛ ciwo yí gbɔjɔ o. 10 Ðo nɔ mɛɖe ci yí ayexa gbɔjɔ nɔ kpɔ eo ci yí mɔŋje nu mɛ yí èle enu ɖukɔ le vojuxɔ mɛ ɖe, ecɛ dado ŋsɛn yi keke atɔ enu ci wosɔ sa vɔn nɔ vojuwo ɖuɖu ba? 11 Eyi taɖo enunyanya aotɔ lɔ adahɛn nu le mɛ ci yí xɔse gbɔjɔ nɔ nu; ɖo ŋwi mɔ nɔvio ci Kristo ku do ta nɔ yɔ. 12 Nɔ míwakɔ nuvɔn do míwo nɔviwo nu ahan keŋ yí dodoɔ akpa wowo yexa ci yí gbɔjɔ nuɔ, Kristo yí míwawa nuvɔn do. 13 Eyi taɖo nɔ ŋɖuɖu ado fɔbli nɔvinyɛɔ, ŋdagbeɖu elan kpɔ gbeɖe o keŋ nɔ nyɛŋgbena yí nɔvinyɛ xɔse agbɔjɔ o.