Wema ci Woŋwlɛ Ðaɖa Ebretɔwo
12 Eyi taɖo, ci kunuɖetɔwo sugbɔ kpiŋ* yí trɔdo mìɔ, mìwo can mìaɖe agban kpɛnkpɛn ɖekpokpui koɖo nuvɔn ci yí lénɔ mì ɖɛ fafɛɖe swi, eyi mìasɔ ejidodo lɔ ju ci yí le ŋkɔ nɔ mì, 2 ci mìwo ŋkuviwo le Yesu Amɛkplɔtɔ Vevitɔ koɖo Mɛ ci yí na yí mìwo xɔse le blebu ji truɖuɖu. Ðo jijɔ ci avakpɔ na yí edo ji le efuntrenamɛci* lɔ nu; ci wodo ŋkpɛn yiɔ, dewa ɖe ni o, eyi enɔ nyinɔnɔ do ɖushi mɛ nɔ Mawu fyɔʒinkpin lɔ. 3 Ɛɛ, mɛ ŋtɔ́ ci nu amɛvɔnwo xo nuxu kpotuwo so yí sɔ dahɛn nu nɔ wowoɖekiwo yí edo ji le mɛɔ, míbunɔ tamɛ kpɔ nywiɖe so nu keŋ nɔ enu ŋgbecikɔ nɔ mí yí míana ta o.
4 Le egbla ci yí mídokɔ koɖo nuvɔn ŋtɔ́ mɛɔ, mídekpɔ ɖo fini aje yí woakɔ míwo hunwo ɖɛ hɔɖo o. 5 Eyi míŋlɔbe enukplamu ci wona mí shigbe eviwo nɛ keŋkeŋ mɔ: “Vinyɛ, ŋgbekpɔ etodɔndɔn Yehowa* tɔ do enugbali ji o; eyi nɔ édɔn to nɔ eoɔ, ŋgbegbɔjɔ o; 6 ɖo mɛ ciwo yí Yehowa* lɔn yí edɔnnɔ to nɔ. Le nyɔnɔnwi mɛɔ, éxonɔ* mɛɖekpokpui ci exɔ shigbe evi nɛ.”
7 Mído ji le efun ciwo míkpekpeɛ mɛ keŋ akpɔɛ mɔ yɛ can le ekpla* ci míxɔxɔ mɛ. Mawu wakɔ nu do mí nu shigbe eviwo nɛ. Ðo evi ɖe li yí edalɔ dedɔnnɔ eto nia? 8 Vɔ nɔ mídelɔn ɖeeɖe yí xɔ etodɔndɔn cɛɔ, anyi tomɛviwo mínyi nyao yí mídenyi evi ŋtɔŋtɔwo o. 9 Gbesɔwu hunnɔɔ, mìwo dawo* dɔnnɔ to nɔ mì yí mìbunɔ wo. Mìdeɖo ale gbesɔsɔ sɔwu yí asɔ mìwoɖekiwo hwenɔ nɔ mɛ ci yí nyi Eda nɔ gbɔngbɔn mɛ gbe mìwotɔwo yí anɔ agbe ba? 10 Ðo wowodɔnnɔ to nɔ mì na nɔ hwenu kleŋ ɖe sɔgbe koɖo enu ci wokpɔ mɔ yɛnyɔ, vɔ yɛwɛni nɔ mì nɔ mìwo nyɔna keŋ nɔ mìatɛnŋ anyi amɛkɔkɔɛwo shigbe eyɛ nɛ. 11 Nyɔnɔnwi yɔ, etodɔndɔn ɖe devivinɔ kaka lɔ o, vɔ évenɔ* gan le yi goduɔ, évasɛnnɔ fafa ku enujɔjɔɛwawa tɔ nɔ mɛ ciwo yí lɔn yí xɔɛ.
12 Eyi taɖo, mído ŋsɛn alɔ̀ ciwo yí gbɔjɔ koɖo eklo ciwo yí enu cikɔ nɔ, 13 eyi míkpɔtɔ aɖekɔ emɔ jɔjɔɛ nɔ míwo fɔwo keŋ nɔ mɛ ci yí tɔnkɔ bu ŋgbevatɔn bu doji o, vɔ edɔ̀ ami ni. 14 Míje agbla anɔnɔ fafa mɛ koɖo mɛshiamɛ yí adokɔ afɔ nɔ enu ci yí le kɔkɔɛɖe;* ɖo nɔ yɛdɛn le mɛɔ, mɛɖe dakpɔ Axwetɔ lɔ o. 15 Míkpɔ nywiɖe nɔ xomɛvu gangan Mawu tɔ ŋgbeyi te mɛɖe o, keŋ nɔ eke ci yí nyi aɖyiwuamɛ ɖe ŋgbevato yí ahɛn cukaɖa vɛ yí axo ɖyi amɛ sugbɔ o. 16 Míkpɔ nywiɖe nɔ matelitɔnɔ* ɖe ŋgbenɔ mí mɛ alo mɛ ci yí deyɔnɔ enukɔkɔɛwo mɔ ŋɖe shigbe Ezawu ci yí sɔ evi ŋkɔtɔ nyinyi cɛ yitɔ ɖɔli koɖo ŋɖuɖu zeɖeka tɔ nɛ o. 17 Míwoŋtɔwo mínya mɔ ci evaji mɔ yeaxɔ shicu lɔ can ɔ, wogbi, ɖo ci eje agbla yí fan avin veviɖe mɔ wo le trɔ susu* can ɔ, dekpɛ o.
18 Ðo mídegbosɔ enu ci woatɛnŋ akpɔ yí atɔ alɔ̀, enu ci yí jejeɛ zo gɛgɛgɛ, azɔ ci yí bla kpiŋ, enu ci yí do vinvin ciɖiciɖi koɖo jihɔnshi gangan o. 19 Denyi ekpɛn gbeɖyiɖyi koɖo nuxu ciwo woxoxoɔ yí jukɔn lɔ se yí ɖe kuku mɔ, woŋgbexo nuxu koɖo yewo ke yɔ o. 20 Ðo wodatɛnŋ awa do ese cɛ ji o: “Nɔ elan ɖe ŋtɔkpu sɔ afɔ tɔ eto lɔɔ, woɖo axo ekpe yi.” 21 Gbesɔ kpe niɔ, enu ci wokpɔkpɔ lɔ ɖyi vɔnvɔn keke Moizi nu mɔ: “Ŋvɔn yí hunhun kpikpikpi.” 22 Vɔ enu ci mígogo yí nyi Siɔn To koɖo Mawu agbuagbu jugan lɔ ci yí nyi Ʒerusalɛmu jeŋkwi mɛ tɔ koɖo mawudɔla kotokun amɛ́wo donu nɛniɖe 23 ciwo yí bɔ doju, evi ŋkɔtɔ ciwo ŋkɔwo woŋwlɛ le jeŋkwi mɛ hamɛ lɔ, Mawu ci yí nyi Kojoɖotɔ nɔ enuwo pleŋ koɖo gbɔngbɔn mɛ gbe amɛjɔjɔɛ ciwo wosɔ wa amɛmaɖonuvɔnwo tɔwo 24 koɖo Yesu ci yí nyi gblamɛdradotɔ nɔ enublabla yoyu lɔ sɔ kpe nɔ ehun ci wowú yí exoxoɔ nuxu nywiɖe sɔwu Abɛli hun.
25 Míkpɔ nywiɖe nɔ míŋgbegbe mɔ yewodase tonu nɔ mɛ ci yí xokɔ nuxu nɔ mí o. Ðo nɔ mɛ ciwo yí gbe mɔ yewodase tonu nɔ mɛ ci yí xo Mawu nuxu nɔ wo yí sɔ ɖo afɔ afɔta nɔ wo le nyigban ji desun ji yí shi nɔ etodɔndɔn ɖe, lé mìwoawɛ ashi nɔ etodɔndɔn nɔ mìtrɔ gbeɖe mɛ ci yí xoxoɔ nuxu nɔ mì so jeŋkwi mɛ ɖɛɔ? 26 Hwehunnɔnuɔ, yi gbemɛ hunhun nyigban lɔ; vɔ ecɛyɛɔ, éɖo gbe mɔ: “Nagbehunhun nyigban lɔ zeɖeka ke, denyi yiɖekɛ yɔ o, vɔ nahunhun jeŋkwi hɛnnɛ.” 27 Enyɔgbe “zeɖeka ke” dadasɛ mɔ woaɖe enu ciwo yí wohunhun swi, enu ciwo yí wowa keŋ nɔ enu ciwo yí wodehunhun akpɔtɔ ani. 28 Eyi taɖo, ci mìkpɔ mɔ mìjikɔ axɔ Fyɔɖuxu ci wodatɛnŋ ahunhun ɔ, mìaje agbla keŋ nɔ woakpɔtɔ awakɔ xomɛvu gangan nɔ mì ci yí ana mìawakɔ sɛnsɛndɔ kɔkɔɛ ci yí ajɔ ji nɔ Mawu yí awɛkɔ koɖo Mawu vɔnvɔn koɖo bubu gangan. 29 Ðo mìwo Mawu nyi ezo ci yí fiɔnnɔ nu.