Wema ci Woŋwlɛ Ðaɖa Ebretɔwo
5 Ðo avɔnsatɔ gangantɔ ɖekpokpui ci wosɔ le agbetɔwo mɛɔ, wosɔɛni nɔ awa sɛnsɛndɔ nɔ Mawu do ta nɔ wo keŋ atɛnŋ asɔnɔ enunanawo jo yí agbewanɔ vɔnsawo do ta nɔ nuvɔnwo. 2 Ésun ji yí senɔ vevi do* mɛ ciwo yí wanɔ nu le manyamanya mɛ koɖo mɛ ciwo yí bu emɔ nu, ɖo énya mɔ yeɖo gbɔjɔgbɔjɔwo hɛnnɛ. 3 Ecɛ yí dɔ taɖo eɖo awanɔ vɔnsawo do ta nɔ yiŋtɔ nuvɔnwo shigbe lé ewɛni do ta nɔ jukɔn lɔ tɔwo nɛ.
4 Mɛɖe datɛnŋ anyi avɔnsatɔ gangantɔ le yiŋtɔ dro mɛ o, vɔ Mawu ɖekɛ yí sɔnɔ amɛ shigbe lé esɔ Arɔn nɛ. 5 Ahanke Kristo can degangan yiɖeki yí sɔ yiɖeki wa avɔnsatɔ gangantɔ o, vɔ Mɛ ci yí gingin yí nu ni mɔ: “Anyi vi ènyi; egbɛɔ, ŋtrɔ dao.” 6 Égbenu le fibu mɔ: “Avɔnsatɔ ènyi tɛgbɛɛ shigbe Mɛlkisedɛki nɛ.”
7 Hwenu Kristo le nyigban lɔ jiɔ,* éwa kwifanwo yí ɖe kuku koɖo axwa sɛnŋsɛnŋwo koɖo ɖashiwo nɔ Mɛ ci yí atɛnŋ ahwlin gan le eku mɛ; eyi woɖo to yi, ɖo évɔnnɔ nɔ Mawu. 8 Ci enyi evi can ɔ, ékpla tonusese le efun ciwo yí ekpe mɛ. 9 Eyi ci ewa ɖaŋ se tonu le enushianu mɛ* ɖegbɔɔ, évatrɔ mɛ ci yí ana yí mɛ ciwo pleŋ yí senɔ tonu ni akpɔ hwlɛngan mavɔ. 10 Ðo Mawu sɔɛ yí enyi avɔnsatɔ gangantɔ shigbe Mɛlkisedɛki nɛ.
11 Enyɔ sugbɔ li mìanu so nu, vɔ wowo mɛ dredre agbɔnnu, ɖo enugɔnmɛsese vagbɔnkɔnu nɔ mí. 12 Nɔ anyɔɔ, enukplamɛtɔwo míanyi yɛ* sa, vɔ éle mɔ woagbekpla nu mí so Mawu nyɔ kɔkɔɛ gɔnmɛjejenuwo nu so tɔtɔmɛ, eyi mígbevatrɔ mɛ ciwo yí ʒan anɔshu yí denyi ŋɖuɖu sɛnŋsɛnŋ o. 13 Mɛɖekpokpui ci yí kpɔtɔ le anɔshu nukɔ dejeshi enujɔjɔɛwawa nyɔ lɔ o, ɖo vihwɛ yí enyi. 14 Vɔ mɛ ciwo yí shin ɖunɔ ŋɖuɖu sɛnŋ yí wonyi mɛ ciwo yí na kpla enugɔnmɛsese* wowotɔ yí zinni keŋ yí sɔ donɔ vovototo enywi koɖo evɔn mɛ.