Wema ci Woŋwlɛ Ðaɖa Ebretɔwo
4 Eyi taɖo ci egbe ci Mawu ɖo mɔ woaɖo gbɔndomɛ yetɔ lɔ mɛ gbekpɔtɔ liɔ, mìanɔ zanŋte* keŋ nɔ ŋgbevaglo mɛɖe le mí mɛ o. 2 Wonu eŋɛnywi lɔ nɔ mì shigbe lé wonui nɔ wowo can nɛ; vɔ wodeɖu ele nɔ enyɔ ci wose o, ɖo wodeɖo xɔse ci hanci yí mɛ ciwo yí wa do ji ɖo o. 3 Mìwo ciwo yí ɖo xɔse ɖoɖoɔ gbɔndomɛ yitɔ lɔ mɛ shigbe lé enui nɛ mɔ: “Eyi taɖo ŋta nu le anyi dɔmɛzi mɛ mɔ, ‘Wodaɖo anyi gbɔndomɛ lɔ mɛ o’” ci eɖegbɔ nɔ yi dɔwo so hwenu woɖo xexe* lɔ can. 4 Ðo énu so ŋkeke amadrɛtɔ lɔ nu le fiɖeka mɔ: “Eyi Mawu gbɔn le ŋkeke amadrɛtɔ lɔ ji le yi dɔwo pleŋ mɛ.” 5 Eyi egbenu le enɔ ke mɔ: “Wodaɖo anyi gbɔndomɛ lɔ mɛ o.”
6 Eyi taɖo, ci mɛɖewo kpɔtɔ yí aɖo mɛ yí mɛ ciwo wodra eŋɛnywi lɔ nɔ ŋkɔtɔ can deɖo mɛ o yí enyi tonumase wowotɔ yí dɔɔ, 7 égbeɖo azan ɖeka ɖɛ ci enu le hwenu jinjinɖe godu le Davidi hajiji ɖeka mɛ mɔ, “Egbɛ”; shigbe lé wema cɛ nui vayi nɛ mɔ, “Nɔ míse anyi gbemɛ gbɛɔ, míŋgbelɔn nɔ eji mɛ asɛnŋ nɔ mí o.” 8 Ðo nɔ Ʒozue kplɔ wo yi gbɔndomɛ tɔxu saɔ, Mawu dagbevaxo nuxu so ŋkeke bu nu le yɛ godu o. 9 Eyi dɔ taɖo, gbɔndomɛ sabati ɖeka kpɔtɔ li nɔ Mawu mɛwo. 10 Ðo mɛ ci yí ɖo Mawu gbɔndomɛ lɔ mɛ can agbɔn domɛ le yiŋtɔ dɔwo mɛ shigbe lé Mawu gbɔn domɛ le yitɔwo mɛ nɛ.
11 Eyi taɖo mìaje agbla keke aɖo gbɔndomɛ ŋtɔ́ mɛ keŋ nɔ mɛɖe ŋgbevato tonumase fɔ cɛ ji o. 12 Ðo Mawu nyɔ lɔ le agbe yí ŋsɛn le nu yí eɖa wu ewi enuvenɔ ɖekpokpui yí ɖonɔ amɛ mɛ keke yi manɔ ese* koɖo gbɔngbɔn* mɛ yí ɖenɔ kpexukpexuwo so exucumɛ nu yí sun ji yí jenɔshi susuwo koɖo enu ciwo yí le eji mɛ nɔ amɛ. 13 Eyi enuwawa ɖekpokpui deli yí wla do Mawu o, vɔ enuwo pleŋ le nuvo yí le dandanŋgbe le ŋmɛ nɔ eyɛ ci mìɖo ajo kɔnŋta nɔ.
14 Eyi taɖo ci mìɖo avɔnsatɔ gangantɔ ci eɖe desɔ koɖo o, ci yí nyi Yesu Mawu Vi lɔ ci yí yi jeŋkwi mɛɔ, mìakpɔtɔ anunuɔ lé mìɖo xɔse do nu do le jugbaja. 15 Ðo denyi avɔnsatɔ gangantɔ ci yí datɛnŋ ase vevi do mìwo gbɔjɔgbɔjɔwo nu yí le mì shi o, vɔ mɛ ci wodo kpɔ le enuwo pleŋ mɛ shigbe mìwo nɛ yí le mì shi, gan yɛdeɖo nuvɔn o. 16 Eyi taɖo mìagbosɔ xomɛvu gangan fyɔʒinkpin lɔ koɖo kankandoji* keŋ nɔ woatɛnŋ aku ŋshishi nɔ mì yí awa xomɛvu gangan nɔ mì keŋ akpedo mì nu le gamɛ nywitɔ lɔ ji.