Wema ci Woŋwlɛ Ðaɖa Galatitɔwo
1 Enyɛ Pɔlu ci yí nyi apotru, denyi agbetɔwo alo mɛɖe yí sɔŋ o, vɔ Yesu Kristo koɖo Mawu Eda ci yí fuin so eku yí sɔŋ yí ŋnyi apotru. 2 Enyɛ koɖo nɔvi ciwo pleŋ yí le koɖoŋ yí ŋwlɛkɔ wema cɛ ɖaɖa hamɛ ciwo pleŋ yí le Galati:
3 Mìwo Da Mawu koɖo Axwetɔ Yesu Kristo le wa xomɛvu gangan nɔ mí yí agbena fafa mí. 4 Yesu sɔ yiɖeki na do ta nɔ mìwo nuvɔnwo keŋ atɛnŋ ahwlɛn mì gan le xexe* vwin cɛ mɛ sɔgbe koɖo mìwo Mawu ci yí gbenyi mìwo Da dro. 5 Woakanfu Mawu sɔyi mavɔmavɔ. Amɛn.
6 Ékpacaŋ mɔ míɖe blɛ trɔ le godu nɔ Mɛ ci yí sɔ xomɛvu gangan Kristo tɔ sɔ yɔ mí keŋ yí vatɔ eŋɛnywi bu sese. 7 Denyi kpɔ mɔ eŋɛnywi bu ɖe vali yɔ o; vɔ mɛɖewo yí cakakɔ mí yí jikɔ mɔ yewoatro fi Kristo ŋɛnywi lɔ. 8 Vɔ nɔ enyi mìwo alo mawudɔla ɖe yí so jeŋkwi mɛ ŋtɔkpu can yí va nu eŋɛnywi ɖe nɔ mí yí eto akpo nɔ eŋɛnywi ci mìnu nɔ míɔ, wo le sɛn kpɛn ni. 9 Shigbe lé mìnui vayi nɛɔ, nagbetrɔ anui ke. Nɔ mɛɖe nu eŋɛnywi ɖe nɔ mí yí eto akpo nɔ ci míxɔ seɔ, wo le sɛn kpɛn ni.
10 Agbetɔwo yí ŋjijiɛ mɔ anyi nu le kpe nɔa alo Mawu yí ŋjijiɛ mɔ anyi nu le kpe nɔ? Nɔ ŋjijiɛ mɔ anyi nu le kpe nɔ agbetɔwoɔ, anyi ŋdegbenyi hwashi nɔ Kristo o. 11 Nɔviwo, ŋji mɔ míanya mɔ de agbetɔ gbɔ yí eŋɛnywi ci ŋdra nɔ mí so o. 12 De agbetɔ ɖe gbɔ ŋxɔɛ so o yí denyi mɛɖe yí kplaŋ hɛnnɛ o, vɔ Yesu Kristo yí dasɛ yi nɔŋ.
13 Nyɔnɔnwi yɔ, míse lé ŋnɔ agbe do sa le Ʒuifuwo sɛnsɛn mɛ, ŋdonɔ aya nɔ Mawu hamɛ lɔ veviɖe* yí tenɔkpɔ mɔ magui swi. 14 Ŋyi ŋkɔ sugbɔ le Ʒuifuwo sɛnsɛn lɔ mɛ wu anyi hamɛtɔ sugbɔtɔ le anyi ju mɛ, ɖo ŋsɔ kpakpa wanɔ do tɔgbinyɛwo kɔnuwo ji. 15 Vɔ hwenu yí Mawu ci yí ɖeŋ ti le nɔnyɛ dɔmɛ, wa xomɛvu gangan nɔŋ yí yɔŋ kpɔ mɔ yɛnyɔ mɔ, 16 yeadasɛ Eviɛ toto ŋji nɔ matɛnŋ adra eŋɛnywi ci yí kuso nu nɔ jukɔnwoɔ, ŋdevayi li kpɔ koɖo mɛɖe* kaka lɔ o. 17 Nɛnɛke ŋdeyi mɛ ciwo yí nyi apotruwo doŋkɔ nɔŋ gbɔ le Ʒerusalɛmu o, vɔ ŋyi Arabi; yi goduɔ, ŋtrɔyi Damasi.
18 Exwe amɛtɔn goduɔ, ŋvayi Ʒerusalɛmu yí vayi ji Sefasi* kpɔ yí nɔ gbɔ na nɔ ŋkeke 15. 19 Ŋdegbekpɔ apotru bu ɖe o, Ʒaki ci yí nyi Axwetɔ nɔviɛ ɖekɛ ŋkpɔ. 20 Ecɛyɛɔ, ŋnukɔ nɔ mí le Mawu ŋmɛ mɔ, ŋdekankɔ ŋsu do enu ciwo ŋŋwlɛkɔ ɖaɖa mí mɛ o.
21 Le yɛ goduɔ, ŋvayi Siri koɖo Silisi juwo mɛ. 22 Vɔ Kristotɔwo hamɛ ciwo yí le Ʒude dekpɔŋ kpɔ o. 23 Wosenɔ sa kpoŋ mɔ: “Ŋsu ci yí cinɔ yumɛ nɔ mì sa vale xɔse ŋɛnywi ci eji mɔ yeadahɛn sa lɔ drakɔ yɛ.” 24 Eyi taɖo wovakanfukɔ Mawu do enyɛ ŋci.