Wema Ŋkɔtɔ ci Woŋwlɛ Ðaɖa Tɛsalonikitɔwo

4 Le vɔvɔnuɔ, nɔviwo, mìkpla nu mí mɔ míwoɖo anɔ agbe keŋ nɔ míwo nu ajɔ ji nɔ Mawu yí mígbewɛkɔ ahan pɛɛ. Ecɛyɛ mìdokɔ ŋsɛn mí yí biɔkɔ mí le Axwetɔ Yesu ŋkɔ mɛ mɔ, míwo le kpɔtɔ awɛkɔ ahan doji. 2 Ðo míjeshi enu lɔwo ciwo yí mìkpla mí to Axwetɔ Yesu ji mɔ míwo le wa.

3 Edro Mawu tɔ yí nyi mɔ, míɖo anɔ kɔkɔɛɖe yí mídawanɔ matelinu* ɖe o. 4 Mɛɖekaɖeka le mí mɛ ɖo anya lé ale yiɖeki* domɛ do yí akpɔtɔ anɔ kɔkɔɛɖe yí bubu agbele nu. 5 Míŋgbeɖokɔ amɛgbɔdɔndɔn dro sɛnŋ ci yí adɔ míalé míwoɖekiwo domɛ aglo shigbe lé jukɔn bu mɛ tɔ ciwo yí dejeshi Mawu ɖɛ wɛni do nɛ o. 6 Mɛɖe deɖo awa enu ci yí desɔgbe yí atafu nɔviɛ do le enyɔ cɛ mɛ o, ɖo Yehowa dɔnnɔ to nɔ mɛ ciwo pleŋ yí wanɔ enu cɛwo shigbe lé mìnui nɔ mí vayi yí gbeɖo afɔ afɔta nɔ mí veviɖe nɛ. 7 Ðo Mawu deyɔ mì nɔ mìawanɔ enumakɔmakɔwo o, vɔ éyɔ mì nɔ mìawanɔ enukɔkɔɛwo. 8 Eyi taɖo, mɛ ci yí gbalikɔ enyɔ cɛɔ, denyi agbetɔ yí egbalikɔ o, vɔ Mawu ci yí nanɔ gbɔngbɔn kɔkɔɛ yitɔ mí yí egbalikɔ.

9 Éle ahan gan, degbeʒan mɔ mìaŋwlɛ nu ɖaɖa mí mɔ míwo le lɔn míwonɔnɔwo shigbe nɔjinɔwo nɛ o, ɖo Mawu kpla míwoŋtɔwo vayi vɔ mɔ, míwo le lɔn míwonɔnɔwo. 10 Le nyɔnɔnwi mɛɔ, lɔnlɔn fɔ ŋtɔ́ yí míɖekɔ ɖaɖa nɔvi ciwo pleŋ yí le Maseduani lɔ keŋkeŋ nɛ. Vɔ nɔviwo, mìdokɔ ŋsɛn mí mɔ míwo le kpɔtɔ awɛkɔ ahan doji. 11 Míɖui míwoɖekiwo ji keŋ anɔnɔ kpuu, míkpɔ míwoŋtɔwo nyɔwo gbɔ yí asɔ míwo lɔ̀wo wa dɔ shigbe lé mìkpla mí do nɛ 12 keŋ nɔ mɛ ciwo yí denyi xɔsetɔwo akpɔ mɔ agbenɔnɔ míwotɔ nyɔ yí ŋɖekɛ dahwedo mí o.

13 Gbesɔwu hunnɔɔ, nɔviwo, mìdeji mɔ míadan* ŋci yí kuso mɛ ciwo yí ku nu o, keŋ nɔ míŋgbevale gbazavi sekɔ shigbe mɛkpɛtɛ ciwo yí dekpɔkɔ emɔ nɔ ŋɖekɛ nɛ o. 14 Nɔ mìxɔɛ se mɔ Yesu ku yí wogbefuin do agbeɔ, anyi mìxɔɛ se hɛnnɛ mɔ Mawu akplɔ yi dokplɔtɔ ciwo yí ku hɛn yi koɖi. 15 Enyɔ ci mìnukɔ nɔ mí to Yehowa* nyɔ ji yí nyi mɔ, mìwo ciwo yí ale agbe keke ana nɔ hwenu Axwetɔ lɔ avaɔ, mìdadoŋkɔ nɔ mɛ ciwo yí ku ɖeeɖe o. 16 Ðo Axwetɔ lɔ ŋtɔ aɖyi so jeŋkwi mɛ yí aɖe gbe koɖo mawudɔla gangantɔ gbe koɖo ekpɛn gbeɖyiɖyi Mawu tɔ, eyi mɛ ciwo yí ku le Kristo mɛ afɔn doŋkɔ. 17 Yɛ goduɔ, woakɔ mìwo ciwo yí kpɔtɔ le agbe yi azɔwo mɛ nɔ mìanɔ koɖo wo yí ado go Axwetɔ lɔ le aya mɛ, eyi mìanɔ Axwetɔ lɔ gbɔ tɛgbɛɛ. 18 Eyi taɖo, míkpɔtɔ asɔ enyɔ cɛwo fafa akɔn nɔ míwonɔnɔwo.