Apotruwo Dɔwawawo
12 Hwehunnɔnuɔ, efyɔ Erodi tɔ xomɛ veve koɖo hamɛ lɔ mɛ tɔ ɖewo. 2 Éwu Ʒaki ci yí nyi Ʒan nɔviɛ koɖo ewi. 3 Ci ekpɔ mɔ yɛjɔ ji nɔ Ʒuifuwoɔ, élé Piɛ hɛnnɛ. (Kpɔnnɔ Majimaji xweɖuɖu hwenu yɔ.) 4 Ci eliɔ, ésɔ do gakpa mɛ yí sɔ do alɔ̀ mɛ nɔ sɔjawo gbɛbɔbɔ amɛnɛ nɔ woacɔɛni. Sɔja amɛnɛ yí le gbɛbɔbɔ ɖekaɖeka mɛ yí woɖɔnɔli nɔnɔ. Édrɔdrɔɛ mɔ yeavakplɔɛ va* jukɔn lɔ ŋkɔ le Paki xweɖuɖu lɔ godu. 5 Eyi taɖo Piɛ kpɔtɔ le gakpa mɛ, vɔ hamɛ lɔ dodoɔ gbe ɖaɖa veviɖe nɔ Mawu do ta ni.
6 Le ezan ci yí doŋkɔ nɔ gbecigbe Erodi akplɔ Piɛ vayi ŋkɔ nɔ jukɔn lɔ mɛɔ, Piɛ le alɔn dɔnkɔ. Woblɛ koɖo awlɛga amɛve yí sɔ bla do sɔja amɛve nu yí ele dodomɛ nɔ wo. Sɔja buwo le ehɔn lɔ ji yí cɔcɔ gakpa lɔ. 7 Vɔ zeɖeka tɔntɔn ɔ, Yehowa* dɔla ɖeka va nɔ te do nɔ, eyi klɛnklɛn ɖeka kɔ do gakpa lɔ mɛ. Mawudɔla lɔ xo axadamɛ nɔ Piɛ yí fuin yí nu mɔ: “Sò kaba!” Eyi awlɛga lɔwo juin le alɔ̀ ni. 8 Mawudɔla lɔ nu ni mɔ: “Dò awu* yí ado ao fɔkpawo.” Eyi edo wo. Égbenu ni mɔ: “Dò awu jitɔ hɛnnɛ yí akplɔ ŋdo.” 9 Eyi Piɛ to yí kplɔɛ do, vɔ denya mɔ enu ci mawudɔla lɔ wakɔ nyi ŋci yí jɔjɔ ŋtɔŋtɔ o. Le nyɔnɔnwi mɛɔ, ébukɔ mɔ ŋtegannu yí yekpɔkɔ. 10 Ci woto sɔja ŋkɔtɔwo koɖo amɛvetɔwo gbɔɔ, wovaɖo agbo ci wosɔ ega sɔ wa gbɔ. Agbo cɛ nu wotonɔ yí ɖonɔ jugan lɔ mɛ; eyi agbo lɔ ŋtɔ hun nɔ wo. Ci woto yí ɖedoɔ, wovaɖo emɔ ɖeka ji, eyi zeɖeka tɔntɔn ɔ, mawudɔla lɔ so le gbɔ. 11 Ci Piɛ vanya ŋci yí jɔjɔɔ, énu mɔ: “Ecɛyɛɔ, ŋkando ji mɔ Yehowa* yí dɔ yi dɔla ɖaɖa yí evaxɔŋ le alɔ̀ mɛ nɔ Erodi yí gbehwlɛnŋ gan le ŋciwo pleŋ Ʒuifuwo bukɔ mɔ woajɔ do ŋji mɛ.”
12 Ci evanya ahan ɖegbɔɔ, éyi Mari ci yí nyi Ʒan ci wogbeyɔnɔ mɔ Maki nɔlɔ xwe mɛ. Enukplavi ɖewo bɔ do nɔ yí dodoɔ gbe ɖaɖa. 13 Ci Piɛ xo agbo lɔɔ, edɔwavi nyɔnushi ɖeka ci yí tɔ mɔ Roda va mɔ yeakpɔ mɔ mi yɔ ma. 14 Ci ese gbemɛ nɔ Piɛ ɔ, eji jɔɛ keke degbehun agbo lɔ kpetii o, vɔ élɔ ju yí vayi nu nɔ amɛwo mɔ Piɛ le te le agbo lɔ ji. 15 Wonu ni mɔ: “Ètɔ suku jeje.” Vɔ ékpɔtɔ tɛkɔ gbe do ji mɔ eyɛ yɔ. Eyi wotɔ nunu mɔ: “Anyi yi dɔla yɔ.” 16 Vɔ Piɛ kpɔtɔ le nɔ yí xoxoɔ agbo lɔ. Ci wohun agbo lɔ yí kpɔɛɔ, ejiŋ nɔ wo sugbɔ. 17 Vɔ éwa alɔ̀ nɔ wo mɔ wo le bɔ nu, eyi edre lé Yehowa* ɖi ti le gakpa lɔ mɛ do nɔ wo hlɛnhlɛnhlɛn. Énu nɔ wo mɔ: “Mínu nyɔ cɛwo nɔ Ʒaki koɖo nukplavi kpɛtɛwo.” Eyi eto yí kpe fibu.
18 Ci eŋ keɔ, eʒin tɔn le sɔja lɔwo mɛ yí wobiɔbiɔ se mɔ fini Piɛ le teŋ ma. 19 Erodi ji Piɛ kpɔ kpeɖekpeɖe. Ci dekpɔɛɔ, ébiɔ nyɔ sɔja lɔwo se yí ɖe gbe mɔ wo le dɔn to nɔ wo. Eyi eso le Ʒude yí yi Sezare yí nɔ enɔ hwɛɖeka.
20 Tirutɔwo koɖo Sidɔntɔwo nu veveɛ Erodi nu. Finiwo yí Erodi kpa nɔ yí eju cɛ mɛ tɔwo xwlenɔ ŋɖuɖu so. Eyi taɖo wojɔn nu yí va ɖe kuku nɔ Blastusi ci yí kpɔnɔ efyɔxwe ji yí ekpedo wo nu woxo nuxu koɖo efyɔ lɔ keŋ awa fafa. 21 Gbeɖeka ci amɛwo va bɔɔ, Erodi do efyɔwu yí nɔ nyinɔnɔ do kojoɖoxu yí tɔ nuxu xoxo nɔ jukɔn lɔ. 22 Eyi mɛ ciwo yí bɔ do nɔ lɔ tɔ axwa dodo mɔ: “Mawu yí xoxoɔ nuxu, denyi agbetɔ yɔ o!” 23 Eyi zeɖeka tɔntɔn ɔ, Yehowa* dɔla do dɔ̀ yi. Ðo desɔ kanfukanfu lɔ jo nɔ Mawu o, eyi eŋwawo ɖui yí eku.
24 Vɔ Yehowa* nyɔ lɔ kakakɔ doji yí xɔsetɔwo sukɔgbɔ.
25 Ci Barnabasi koɖo Sɔlu sɔ nɔviwo nunana lɔwo jo do Ʒerusalɛmu ɖegbɔɔ, wotrɔ gbɔ va Antiɔshi. Wokplɔ Ʒan ci wogbeyɔnɔ mɔ Maki bɔdo wowoɖekiwo nu.