Wema Ŋkɔtɔ ci Woŋwlɛ Ðaɖa Tɛsalonikitɔwo

5 Ecɛyɛɔ, nɔviwo, deʒan mɔ woaŋwlɛ ŋɖe ɖaɖa mí so gaxoxowo koɖo hwenuwo nu o. 2 Ðo míwoŋtɔwo mínya nywiɖe mɔ Yehowa* ŋkeke lɔ gbɔgbɔ pɛɛ shigbe lé flafinɔ vanɔ zanmɛ nɛ. 3 Hwenu woanunuɔ mɔ, “Ecɛyɛɔ, mìle fafa mɛ, ŋɖe ajɔ go!” ɔ, eyi gugu ava wo ji zeɖeka le avomɛ shigbe lé evidɔmɛ tɔnɔ nyɔnu funɔ ɖuɖu nɛ yí wodatɛnŋ ashi ni o. 4 Vɔ nɔviwo, míwoɔ, mídele vinvin mɛ yí eŋ avake do mí shigbe lé ekenɔ do flafinɔwo nɛ o, 5 ɖo klɛnklɛn koɖo kede viwo yí mí pleŋ mínyi, mìdenyi ezan alo vinvin tɔ o.

6 Eyi taɖo míŋgbelɔn nɔ mìadɔnkɔ alɔn shigbe lé mɛkpɛtɛwo wɛkɔ nɛ o, vɔ mìakpɔtɔ anɔ zanŋte yí akpɔtɔ abukɔ tamɛ kpɔ nywiɖe. 7 Ðo mɛ ciwo yí dɔnnɔ alɔn ɔ, zanmɛ yí wodɔnnɔ alɔn yí mɛ ciwo yí nunɔ aha muɔ, zanmɛ yí wonunɔ aha mu. 8 Vɔ ci mìnyi kede viwoɔ, mìakpɔtɔ abukɔ tamɛ kpɔ nywiɖe yí asɔ egawu xɔse koɖo lɔnlɔn lɔ tɔ asɔ do yí asɔ hwlɛngan mɔkpɔkpɔ lɔ asɔ cɔn shigbe egakuku nɛ. 9 Ðo Mawu decan mì keŋ adɔn to nɔ mì o, vɔ écan mì keŋ nɔ woahwlɛn mì gan to enu ci mìwo Xwetɔ Yesu Kristo wa ji. 10 Éku do ta nɔ mì keŋ nɔ mìle zanŋte alo mìdɔn alɔn* can ɔ, mìanɔ agbe koɖi. 11 Eyi taɖo, míkpɔtɔ afafa akɔn nɔ míwonɔnɔwo yí adodoɔ ŋsɛn míwonɔnɔwo shigbe lé míwɛwɛ do pɛɛ nɛ.

12 Ecɛyɛɔ, nɔviwo, mìbiɔkɔ mí mɔ míwo le bu mɛ ciwo yí le edɔ wakɔ sɛnsinɖe le mí mɛ yí dadasɛ emɔ nɔ mí le Axwetɔ lɔ mɛ yí ɖokɔ afɔ afɔta nɔ mí; 13 eyi míaɖo bubu gangan nɔ wo le lɔnlɔn mɛ do wowo dɔ ci wowakɔ ŋci. Mínɔ fafa mɛ koɖo míwonɔnɔwo. 14 Nɛnɛke nɔviwo, mìdokɔ ŋsɛn mí mɔ, míwo le ɖo afɔ afɔta nɔ* mɛ ciwo yí wanɔ nu yakayaka, míxo nuxu asɔ fa akɔn nɔ mɛ ciwo yí le ŋshishi mɛ,* mído ŋsɛn mɛ ciwo yí gbɔjɔ yí axɔ jigbɔnɖɛ nɔ mɛshiamɛ. 15 Míŋgbelɔn nɔ mɛɖe asɔ evɔn ɖo evɔn tɔxu nɔ mɛɖe o, vɔ míjinɔ enywi nɔ míwonɔnɔwo koɖo mɛkpɛtɛwo pleŋ gashiagamɛ.

16 Eji le jɔnɔ mí hweɖekpokpuinu. 17 Mídonɔ gbe ɖaɖa mamimami. 18 Mídonɔ akpe do enuwo pleŋ ŋci, eyi nyi edro Mawu tɔ nɔ mí le Kristo Yesu mɛ. 19 Míŋgbeci gbɔngbɔn lɔ zo o. 20 Míŋgbegbali enyɔnuɖɛwo o. 21 Mídonɔ enuwo pleŋ kpɔ, míwanɔ enu ci yí nyɔ tiin. 22 Mígbe nuvwin alɔkpa ɖekpokpui.

23 Fafa Mawu lɔ ŋtɔ le wɛ nɔ míamɛ́ vɛ keŋkeŋ. Eyi nɔviwo, míwo gbɔngbɔn, míwo lankpu koɖo míwoŋtɔ lɔwo pleŋ asɔgbe le enushianu mɛ yí wodakpɔ afɛn ɖe le mí nu le mìwo Xwetɔ Yesu Kristo vava hwenu o. 24 Egbejinɔtɔ yí mɛ ci yí yɔkɔ mí nyi yí awɛ dandandan.

25 Nɔviwo, míkpɔtɔ adokɔ gbe ɖaɖa do ta nɔ mì.

26 Mísɔ lɔnlɔn ki shi* nɔ nɔvi lɔwo pleŋ yí asɔ do gbe nɔ wo.

27 Ŋɖekɔ kuku nɔ mí le Axwetɔ lɔ ŋkɔ mɛ mɔ, míwo le hlɛn wema cɛ nɔ nɔvi lɔwo pleŋ.

28 Mìwo Xwetɔ Yesu Kristo le wa xomɛvu gangan nɔ mí.