Wema ci Woŋwlɛ Ðaɖa Efezitɔwo
3 Eyi taɖo enyɛ Pɔlu, ŋle gakpa mɛ ci ŋnyi Kristo Yesu tɔ yí gbekpekɔdo míwo ciwo yí nyi jukɔn bu mɛ tɔwo nu . . . 2 Míse nyɔnɔnwimɛtɔ mɔ, Mawu wa xomɛvu gangan yí sɔ axwejikpɔkpɔdɔ naŋ do míwo nyɔna ŋci 3 shigbe lé ŋŋwli vayi le kleŋ mɛ nɛ mɔ, da wodasɛ enyɔwlawla kɔkɔɛ lɔ nɔŋ yí ŋvajeshi ɖɛ. 4 Eyi taɖo nɔ míhlinkɔɔ, míakpɔ lé ŋmɔŋje enyɔwlawla kɔkɔɛ Kristo tɔ lɔ mɛ do. 5 Le hwenu ciwo yí vayi mɛɔ, wodedasɛ enyɔwlawla kɔkɔɛ cɛ nɔ agbetɔviwo shigbe lé wovadasɛ yi nɔ apotru kɔkɔɛ yitɔwo koɖo enyɔnuɖɛtɔwo to gbɔngbɔn lɔ ji yɛ nɛ o. 6 Eyi nyi mɔ, jukɔn bu mɛ tɔwo aɖu cinɔ koɖo Kristo yí anyi lankpu lɔ ŋcinuwo yí aɖu ele nɔ egbe ci woɖo nɔ mì le Kristo Yesu mɛ to eŋɛnywi lɔ ji. 7 Ŋvanyi edɔwavi nɔ enyɔwlawla kɔkɔɛ cɛ, ɖo Mawu wa xomɛvu gangan nɔŋ. Éto yi ŋsɛn ji yí na enu cɛŋ gbali.
8 Wowa xomɛvu gangan cɛ nɔ enyɛ ci yí hwe wu amɛ hwɛhwɛtɔ le amɛkɔkɔɛ lɔwo pleŋ mɛ nɔ madra eŋɛnywi ci yí kuso shicu Kristo tɔ ciwo yí do mahlɛn nu nɔ jukɔnwo 9 keŋ nɔ mɛshiamɛ akpɔ lé wole edɔ wakɔ so enyɔwlawla kɔkɔɛ lɔ nu do. Wosɔ enyɔwlawla kɔkɔɛ cɛ wla so gbeɖegbe le Mawu ci yí wa enuwo pleŋ mɛ. 10 Wowa cɛ keŋ atɛnŋ ato hamɛ lɔ ji yí adasɛ lé Mawu nunya lɔ li hamɛhamɛ do nɔ acɛkpakpa koɖo ega ciwo yí le jeŋkwi mɛ. 11 Wowa cɛ sɔgbe koɖo edro mavɔ ci eto Kristo Yesu mìwo Xwetɔ ji yí ɖo ɖɛ. 12 Eyi lɔ ji mìto yí xonɔ nuxu koɖo edɔngbegbe yí tenɔ gogo Mawu koɖo kankandoji, ɖo mìxɔɛ ji se. 13 Eyi taɖo ŋnukɔ nɔ mí mɔ, efun ciwo ŋkpekɔ do ta nɔ mí ŋgbedɔ míana ta o, ɖo ŋcɛwo nyi kanfukanfu nɔ mí.
14 Ecɛ yí dɔ taɖo ŋle klo ji le ŋkɔ nɔ Eda 15 ci gbɔ yí xomu ɖekpokpui ci yí le jeŋkwi mɛ koɖo nyigban ji xɔ yi ŋkɔ so. 16 Ŋbiɔkɔ Mawu mɔ, le to yi gbɔngbɔn ji yí ana ŋsɛn mí nɔ míanyi edɔngbetɔwo le kanfukanfu gangan yitɔ mɛ. 17 Xɔse ci míɖo le dɔ yí Kristo axɔ texwe do míwo jiwo mɛ koɖo lɔnlɔn. Mído ke yí alo do sɛnsinɖe le gɔnmɛɖokpe lɔ ji, 18 keŋ nɔ míwo koɖo amɛkɔkɔɛwo asun ji awa ɖaŋ amɔŋje lé nyɔnɔnwi lɔ keke bonu do, lé ejinjin do, lé eyi ji do koɖo lé ecito do mɛ keŋkeŋ. 19 Eyi míajeshi Kristo lɔnlɔn ci yí wugan nunyanya keŋ nɔ míatɛnŋ aɖɔ koɖo enu ciwo pleŋ yí le blebu yí Mawu nanɔ amɛ.
20 Mawu atɛnŋ awa nu yí awugan sesese sɔwu enu ciwo pleŋ mìbiɔɛni alo vanɔ susu mɛ nɔ mì to yi ŋsɛn ci yí le edɔ wakɔ le mì mɛ ji. 21 Woato hamɛ lɔ koɖo Kristo Yesu ji yí akanfui le hwenuwo pleŋ mɛ so mavɔ yi mavɔ mɛ. Amɛn.