Wema Ŋkɔtɔ ci Woŋwlɛ Ðaɖa Korɛntitɔwo
1 Pɔlu, mɛ ci woyɔ to edro Mawu tɔ ji nɔ anyi apotru nɔ Kristo Yesu koɖo mìwo nɔvi Sosutɛnu 2 yí ŋwlɛkɔ wema cɛ ɖaɖa Mawu hamɛ ci yí le Korɛnti koɖo mɛ ciwo pleŋ yí le fishiafi yí yɔnɔ mìwo Xwetɔ Kristo Yesu ŋkɔ. Ényi Axwetɔ nɔ wo yí gbenyi Axwetɔ nɔ mìwo can. Mawu can mí nɔ míanyi enu kuɖeka koɖo Yesu Kristo. Éyɔ mí nɔ míanyi amɛkɔkɔɛwo hɛnnɛ:
3 Mìwo Da Mawu koɖo Axwetɔ Yesu Kristo le wa xomɛvu gangan nɔ mí yí agbena fafa mí.
4 Ŋdonɔ akpe nɔ anyi Mawu gashiagamɛ do ta nɔ mí nɔ xomɛvu gangan ci ewa nɔ mí le Kristo Yesu mɛ. 5 Écu shi nɔ mí sugbɔ ɖo míle koɖi, ékpedo mí nu yí mísun ji yí xonɔ nuxu yí gbewa ɖaŋ mɔnɔŋje enu mɛ nywiɖe. 6 Eyi na taɖo, eŋɛdu ci yí kuso Kristo lɔ nu do ke do mí mɛ sɛnŋsɛnŋɖe 7 keŋ nɔ Mawu nunana ɖekpokpui ŋgbehwedo mí o, ci míle te yí kpɔkɔ emɔ veviɖe nɔ hwenu woadasɛ mìwo Xwetɔ Yesu Kristo. 8 Ágbena yí míalo do gogwiɖe keke asɔyi vɔvɔnu keŋ nɔ woŋgbevado hwɛ ɖe mí le mìwo Xwetɔ Yesu Kristo ŋkeke lɔ ji o. 9 Egbejinɔtɔ yí Mawu nyi, eyi yɔ mí nɔ míanɔ ju* koɖo Eviɛ Yesu Kristo ci yí nyi mìwo Xwetɔ.
10 Nɔviwo, ŋɖeɖeɛ kuku nɔ mí le mìwo Xwetɔ Yesu Kristo ŋkɔ mɛ mɔ egbe ŋgbeklan nɔ mí o, míŋgbema o; vɔ egbe ɖo ale ju nɔ mí keŋkeŋ le susuɖeɖe koɖo gbetasɔsɔwo mɛ. 11 Ðo nɔviwo, Klowe xwemɛtɔ ɖewo va nu nɔŋ mɔ manyimanyiwo le gblamɛ nɔ mí. 12 Enyɔ ci ŋjikɔ anu yí nyi mɔ, mɛɖewo le mí mɛ yí nukɔ mɔ: “Pɔlu tɔ ŋnyi,” mɛɖewo nukɔ mɔ “Apolosu tɔ ŋnyi,” mɛɖewo nunuɔ mɔ “Sefasi* tɔ ŋnyi,” eyi mɛbuwo mɔ “Kristo tɔ ŋnyi.” 13 Kristo lɔ ma yɔa? Pɔlu yí wokan do aci nu do ta nɔ mía? Alo Pɔlu ŋkɔ mɛ míwa ʒinʒindoshimɛ lea? 14 Ŋdo akpe nɔ Mawu mɔ, ŋdeʒin mɛɖe do shi mɛ le mí mɛ sɔ zeto Krispusi koɖo Gayo nu o. 15 Eyi taɖo, mɛɖekɛ deli amɔ anyi ŋkɔ mɛ míwa ʒinʒindoshimɛ le o. 16 Ahaan, enyɛ yí ʒin Sitefanasi xwemɛtɔwo do shi mɛ hɛnnɛ, ŋdenya nɔ ŋgbeʒin mɛbu ɖe do shi mɛ o. 17 Ðo Kristo dedɔŋ mɔ nyɛ le ʒin amɛwo do shi mɛ o, vɔ énu nɔŋ mɔ nyɛ le dra eŋɛnywi lɔ yí ŋdasɔ wemanyatɔ nuxu asɔ drɛ keŋ nɔ efuntrenamɛci* Kristo tɔ lɔ atrɔ enugbali o.
18 Enyɔ ciwo yí kuso efuntrenamɛci* lɔ nu nyi sukunyɔwo nɔ mɛ ciwo yí jikɔ agu, vɔ Mawu ŋsɛn enyi nɔ mìwo ciwo yí wojikɔ ahwlɛn gan. 19 Ðo woŋwlɛ ɖɛ mɔ: “Nawɛ yí nunya abu do ŋɖɛnyatɔwo yí ate* mɛ ciwo yí susu mɛ ɖa nɔ susuwo do akpa.” 20 Fini ŋɖɛnyatɔ lɔ leɔ? Fini esekplamɛtɔ* lɔ leɔ? Fini mɛ ci yí dɔnnɔ nyɔ so xexe* cɛ mɛ nyɔwo nu leɔ? Mawu desɔ xexe cɛ mɛ nunya sɔ trɔ sukunu ba? 21 Ci mɛ ciwo yí le xexeɛ mɛ kando wowoŋtɔwo ŋɖɛnyanya jiɔ, wodejeshi Mawu o. Vɔ Mawu dasɛ yi nunya ci ehwlɛn mɛ ciwo yí kando eŋɛdu ci mìdrakɔ ji gan, ŋɛdu cɛ nyi sukunu doŋ nɔ mɛ ciwo yí le xexe cɛ mɛ.
22 Ʒuifuwo biɔkɔ enujiŋwo yí Grɛkitɔwo jikɔ ŋɖɛnyanya. 23 Vɔ mìwoɔ, mìnukɔ Kristo ci wokan do aci nu nyɔ yí enyi afɔklɛnnu nɔ Ʒuifuwo keŋ yí nyi sukunu nɔ jukɔn bu mɛ tɔwo. 24 Gan, Kristo yí nyi Mawu ŋsɛn koɖo Mawu nunya nɔ mɛ ciwo yí woyɔ le Ʒuifuwo koɖo Grɛkitɔwo pleŋ mɛ. 25 Ðo Mawu nu ci wokpɔnɔ mɔ yɛnyi exlunu nya ŋɖɛ wu agbetɔwo yí Mawu nu ci wokpɔnɔ mɔ yɛdeɖo ŋsɛn ɖo ŋsɛn wu agbetɔwo.
26 Nɔviwo, míkpɔ míwo ciwo yí woyɔ ɖa, amɛ sugbɔ le mí mɛ denyi ŋɖɛnyatɔ le agbetɔ nukpɔkpɔ mɛ o, amɛ sugbɔ deɖo ŋsɛn o, amɛ sugbɔ deso xomu kpɛnkpin mɛ o. 27 Vɔ Mawu can enu ciwo yí xexe lɔ kpɔnɔ mɔ wonyi exlunuwo yí sɔ do ŋkpɛn ŋɖɛnyatɔwo. Écan enu ciwo yí xexe lɔ kpɔnɔ mɔ wodeɖo ŋsɛn ɖe o yí sɔ do ŋkpɛn enu ciwo yí ɖo ŋsɛn. 28 Mawu can enu ciwo yí xexe lɔ kpɔnɔ mɔ wodenyi ŋɖe o koɖo enu ciwo yí amɛwo kpɔnɔ do enugbaliwo, enumaɖotawo ji yí sɔ ɖe enu ciwo yí amɛwo kpɔnɔ mɔ wonyi enuveviwo kpɔtɔ hɛnnɛ, 29 keŋ nɔ mɛɖekɛ* ŋgbeyi go le ŋmɛ nɔ Mawu o. 30 Vɔ eyɛ yí dɔ yí míle ju koɖo Kristo Yesu ci yí hɛn nunya ci yí so Mawu gbɔ vɛ nɔ mì. Éna hɛnnɛ yí woyɔ mì mɔ amɛjɔjɔɛwo, wosɔ mì sɔ wa amɛkɔkɔɛwo yí gbena vovo mì to tafɛn lɔ ji, 31 keŋ nɔ ale shigbe lé Enuŋwlɛŋwlɛ lɔwo nui ɖɛ nɛ mɔ: “Mɛ ci yí yikɔ goɔ, le yi go mɔ yejeshi Yehowa.”*