Wema ci Woŋwlɛ Ðaɖa Efezitɔwo
1 Enyɛ Pɔlu, ŋnyi apotru Kristo Yesu tɔ to edro Mawu tɔ ji, ŋŋwlɛkɔ wema cɛ ɖaɖa amɛkɔkɔɛ ciwo yí le Efezi yí gbenyi Kristo Yesu nukplavi egbejinɔtɔwo:
2 Mìwo Da Mawu koɖo Axwetɔ Yesu Kristo le wa xomɛvu gangan nɔ mí yí agbena fafa mí.
3 Woakanfu Mawu ci yí gbenyi Eda nɔ mìwo Xwetɔ Yesu Kristo; ɖo ci mìnyi Kristo nukplaviwoɔ, ésɔ gbɔngbɔn mɛ shicuwo pleŋ cu shi nɔ mì le texwe ciwo yí le jeŋkwi mɛ. 4 Écan mì doŋkɔ nɔ gɔnmɛjeje nɔ xexe lɔ nɔ mìanɔ ju koɖo Kristo keŋ atɛnŋ adasɛ mɔ mìluin yí anyi amɛkɔkɔɛwo yí wodado hwɛ ɖe mì le ŋkɔ ni o. 5 Ðo enu ci eɖo ɖɛ yí nyi mɔ, woaxɔ mì yí mìanyi eviɛwo to Yesu Kristo ji sɔgbe koɖo enu ci yí jɔ ji ni koɖo edro yitɔ. 6 Ényi ahan keŋ nɔ amɛwo atɛnŋ akanfu Mawu ci eto Eviɛ vevi ji yí wa xomɛvu gangan nɔ mì. 7 Woto ji yí sɔ tafɛn lɔ hwlɛn mì gan to ehun yitɔ ji, ɛɛ, wosɔ mìwo gɔjejewo sɔ ke mì sɔgbe koɖo xomɛvu gangan Mawu tɔ ci yí do manumanu.
8 Mawu wa xomɛvu gangan cɛ nɔ mì keŋ nɔ nunya koɖo enumɛmɔŋje asugbɔ 9 ci ena yí mìjeshi enyɔwlawla kɔkɔɛ ci yí kuso edro yitɔ nu. Enyɔwlawla kɔkɔɛ cɛ jɔ ji ni yí yiŋtɔ sɔ gbeta so nu ɖɛ, 10 nɔ woakpɔ enuwo gbɔ le hwenu ci woɖo ɖɛ lɔwo vɔvɔnu keŋ abɔ enuwo pleŋ doju le Kristo mɛ, enu ciwo yí le jeŋkwi mɛ koɖo enu ciwo yí le nyigban ji. Ɛɛ, woabɔ wo pleŋ doju le Kristo mɛ, 11 eyɛ ci mìle ju koɖo yí Mawu gbesɔ mì keŋ nɔ mìaɖu cinɔ nɔ enu ci esɔ ɖo gbe nɔ mì. Ésɔ mì ɖɛ xoxoxo sɔgbe koɖo enu ci edrɔ do te, ɖo eyi nyi mɛ ci yí wakɔ enuwo pleŋ shigbe lé edrui do nɛ, 12 keŋ nɔ mìwo ciwo yí nyi amɛ ŋkɔtɔwo yí kpɔkɔ emɔ le Kristo mɛ atɛnŋ akanfui yí agbena kɔkɔ yi. 13 Vɔ ci míse nyɔnɔnwinyɔ ci yí nyi eŋɛnywi ci yí kuso hwlɛngankpɔkpɔ míwotɔ nu ɖegbɔɔ, míwo can míkpɔ emɔ le Kristo mɛ. Ci míxɔɛ se ɖegbɔɔ, woto Kristo ji yí sɔ gbɔngbɔn kɔkɔɛ ci gbe woɖo nɔ mí sɔ do jeshi mí. 14 Eyi nyi enu ci wosɔ ɖo kpe mìwo cinɔ lɔ ji ɖɛ.* Mawu wa ecɛ keŋ asɔ hwlɛn yi mɛwo gan to tafɛn ji, ecɛ adɔ yí woakanfui sugbɔ.
15 Eyi taɖo ci nyɛ can ŋse xɔse ci míɖo le Axwetɔ Yesu mɛ koɖo lé mílɔn amɛkɔkɔɛwo pleŋ doɔ, 16 ŋdemi akpe dodo nɔ Mawu do míwo ŋci gbeɖe o. Ŋkpɔtɔ yɔyɔ míwo ŋkɔwo le anyi gbedoɖawo mɛ. 17 Ŋbiɔnɔ mɔ, mìwo Xwetɔ Yesu Kristo Mawu ci yí nyi Eda nɔ kanfukanfu le na nunya gbɔngbɔn mí yí agbena míawa ɖaŋ ajeshi ɖɛ nywiɖe. 18 Éhun ejiwo mɛ nɔ mí keŋ nɔ míajeshi emɔkpɔkpɔ ci yí ena mí yí agbejeshi dɔkunu gangan ciwo yí edra do ɖɛ nɔ amɛkɔkɔɛwo. 19 Enu ci míagbejeshi yí nyi lé yi ŋsɛn gangan lɔ le ŋkɔ sesese nɔ enushianu do nɔ mìwo xɔsetɔwo. Wokpɔnɔ yi ŋsɛn gangan cɛ le enu ciwo yí ewa mɛ. 20 Ŋsɛn cɛ ezan hwenu efɔn Kristo so amɛkukuwo mɛ yí sɔ ɖo nyinɔnɔ do yi ɖushi mɛ le jeŋkwi mɛ 21 yí ele ta nɔ egaɖuɖu ɖekpokpui, acɛkpakpa ɖekpokpui, ŋsɛn ɖekpokpui, axwetɔ ɖekpokpui koɖo ŋkɔ ɖekpokpui ci woyɔnɔ; denyi xexe* cɛ mɛ ɖekɛ yí enyi ahan le o, vɔ anyi ahan le xexe ci yí avava mɛ hɛnnɛ. 22 Ésɔ enuwo pleŋ ɖo yi fɔwo gɔnmɛ hɛnnɛ yí gbesɔ ɖo eta nɔ enuwo pleŋ nɔ hamɛ lɔ. 23 Hamɛ lɔ yí nyi yi lankpu lɔ ci yí ɖɔ koɖo enu ciwo yí kuso nu yí enyi mɛ ci yí ɖɔnɔ enuwo pleŋ le enuwo pleŋ mɛ.