Wema ci Woŋwlɛ Ðaɖa Kolosetɔwo

4 Axwetɔwo, míwanɔ enu ci yí le jɔjɔɛɖe koɖo enu ci yí sɔgbe do míwo dɔwaviwo nu yí anyanya mɔ míwo can míwa Axwetɔ ɖɛ le jeŋkwi mɛ.

2 Mídonɔ gbe ɖaɖa mamimami, mínɔ zanŋte nɔ gbedoɖa wawa yí adonɔ akpe. 3 Mído gbe ɖaɖa do ta nɔ mìwo can mɔ Mawu le hun emɔ nɔ mì, nɔ mìanu yi nyɔ lɔ keŋ atɛnŋ adra enyɔwlawla kɔkɔɛ ci yí kuso Kristo nu, enyɔwlawla kɔkɔɛ cɛ ŋci yí woléŋ do gakpa mɛ. 4 Míbiɔ Mawu keŋ nɔ matɛnŋ adra enyɔ lɔ gbajɛɛ shigbe lé ŋɖo awɛ do nɛ.

5 Míkpɔtɔ awanɔ nu le nunya mɛ ɖaɖa mɛ ciwo yí denyi xɔsetɔwo gbɔ yí awa ɖaŋ azannɔ míwo gamɛwo nywiɖe.* 6 Míwo nyɔwo le vivinɔ gashiagamɛ, eje le nɔnɔ wo mɛ keŋ nɔ míanya lé míaɖonɔ nyɔ ŋci nɔ mɛɖekaɖeka do.

7 Nɔvinyɛ vevi Tishiku ci yí nyi edɔwatɔ egbejinɔtɔ yí gbenyi hwashi nɔ Axwetɔ avanu enyɔwo pleŋ nɔ mí so ŋnu. 8 Ŋdɔdɔɛ ɖaɖa mí keŋ nɔ míanya lé mìle do yí agbefa akɔn nɔ mí. 9 Onezimu ci yí so mí gbɔ yí nyi nɔvinyɛ vevi koɖo egbejinɔtɔ ava koɖi, woanu enu ciwo pleŋ yí jɔjɔ le elɛ nɔ mí.

10 Aristaki ci yí le gakpa mɛ koɖoŋ do gbe ɖaɖa mí, Maki ci yɛ koɖo Barnabasi ba* can do gbe ɖaɖa mí (eyi nyɔ yí wonu nɔ mí mɔ nɔ yɛva mí gbɔɔ, míawa ɖaŋ axɔɛ nywiɖe). 11 Yesu ci wogbeyɔnɔ mɔ Ʒutusi can do gbe ɖaɖa mí, mɛ cɛwo can so vo. Mɛ cɛwo ɖekɛ yí wakɔ edɔ koɖoŋ nɔ Mawu Fyɔɖuxu lɔ yí wovanyi akɔnfɛ soxu gangan* nɔŋ. 12 Epafrasi ci yí so mí gbɔ yí nyi hwashi nɔ Kristo Yesu do gbe ɖaɖa mí. Édonɔ gbe ɖaɖa do ta nɔ mí veviɖe gashiagamɛ keŋ nɔ le vɔvɔnuɔ, míashin vɛ pleŋ le gbɔngbɔn mɛ yí akando edro Mawu tɔ lɔ ji keŋkeŋ. 13 Ðo ŋɖeɖeɛ kunu so nu mɔ yɛjejeɛ agbla sugbɔ do ta nɔ míwo koɖo mɛ ciwo yí le Laodise koɖo Irapoli.

14 Luiki ci yí nyi doto ci amɛ sugbɔ lɔn do gbe ɖaɖa mí yí Demasi can do gbe ɖaɖa mí. 15 Mído gbe nɔ nɔviwo nɔŋ le Laodise yí agbedo gbe nɔ nɔvinyɔnu Nimfa koɖo hamɛ ci yí bɔnɔ do yi xwe mɛ. 16 Nɔ míhlɛn wema cɛ ɖegbɔɔ, mísɔɛ ɖaɖa hamɛ ci yí le Laodise nɔ woahlin le enɔ hɛnnɛ yí míaxɔ ci woŋwlɛ ɖaɖa wowo can yí ahlɛn. 17 Mínu nyɔ cɛ nɔ Ashipu hɛnnɛ: “Lè bu nɔ sɛnsɛndɔ ci yí wosɔ na eo le Axwetɔ lɔ mɛ keŋ aɖegbɔ ni.”

18 Enyɛ Pɔlu, ŋdo gbe ɖaɖa mí, nyɛŋtɔ yí ŋwlɛ egbedonamɛ cɛ yɛ. Míkpɔtɔ aɖonɔ ŋwi mɔ ŋle gakpa mɛ. Mawu le wa xomɛvu gangan nɔ mí.