Wema Amɛvetɔ ci Woŋwlɛ Ðaɖa Korɛntitɔwo
5 Ðo mìnya mɔ nɔ woagban* exɔ ci yí le mì shi le nyigban ji ci yí nyi avɔnzava cɛ can ɔ, Mawu ana exɔ mì do jeŋkwi mɛ yí exɔ cɛ ani keke asɔyi mavɔmavɔ, denyi alɔ̀wo yí wosɔ cu exɔ cɛ o. 2 Ðo le nyɔnɔnwi mɛɔ, mìle edɔ̀ nyɛkɔ le exɔ cɛ yɛ mɛ yí jijiɛ veviɖe mɔ mìasɔ ci wodra do ɖɛ nɔ mì le jeŋkwi* mɛ asɔ do,* 3 eyi nɔ mìsɔ doɔ, mìdagbele mama o. 4 Le nyɔnɔnwi mɛɔ, mìwo ciwo yí le avɔnzava cɛ mɛ le edɔ̀ nyɛkɔ yí enu cikɔ nɔ mì, ɖo mìdeji mɔ mìaɖe ecɛ daɖɛ o, vɔ mìji mɔ mìado ɖetɔ lɔ keŋ nɔ agbe asɔ enu ci yí kunɔ lɔ asɔ mi. 5 Ecɛyɛɔ, mɛ ci yí dra mì do ɖɛ nɔ enuvevi cɛ yí nyi Mawu, eyɛ yí sɔ gbɔngbɔn lɔ na mì nɔ anyi kpeɖoji nɔ enu ci yí gbɔgbɔ.
6 Eyi taɖo mìgbenɔ dɔn hweshiahwenu yí nya mɔ nɔ mìkpɔtɔ le lankpu cɛ mɛ duuɔ,* mìjinjin le Axwetɔ lɔ gbɔ. 7 Ðo xɔse mɛ yí mìzɔnkɔ le, denyi enu ciwo yí mìkpɔkɔ do yí mìkplɔ o. 8 Vɔ mìwa ɖaŋ gbenɔ dɔn yí ji mɔ mìabu so lankpu cɛ mɛ* keŋ ayi nɔ Axwetɔ lɔ gbɔ. 9 Eyi taɖo nɔ mìle gbɔ alo mìjinjin le gbɔ can ɔ, mìjenɔ agbla keŋ nɔ mìwo nu akpe ni. 10 Ðo mì pleŋ avanɔ te le Kristo kojoɖoɖo ʒinkpin ŋkɔ. Eyi woacu fɛn nɔ mɛɖekamɛɖeka sɔgbe koɖo enu ciwo yí ewa le lankpu lɔ mɛ, nɔ enyi enunywi alo enudɔndɔn yɔ can.
11 Eyi taɖo ci mìnya lé woavɔn nɔ Axwetɔ lɔ doɔ, mìkpɔtɔ wɛwɛ keke nɔ amɛwo aɖo xɔse do Axwetɔ lɔ nu, vɔ Mawu wa ɖaŋ jeshi mì ɖɛ, gan ŋkando ji mɔ míwo yexawo can jeshi mì ɖɛ nywiɖe. 12 Mìdegbetrɔ yí kanfukɔ mìwoɖekiwo nɔ mí o, vɔ mìsɔsɔ enu ci yí adɔ míasɔ mì yi go jojoɔ nɔ mí yɔ keŋ nɔ míatɛnŋ aɖo enyɔ ŋci nɔ mɛ ciwo yí sɔ agogbenuwo yiyiɛ go yí denyi enu ciwo yí le ji mɛ yí wosɔ wɛkɔ o. 13 Nɔ tamɛ desɔgbe nɔ mìɔ, Mawu taɖo yɔ, vɔ nɔ tamɛ sɔgbe nɔ mìɔ, míwo taɖo yɔ. 14 Kristo lɔnlɔn lɔ donɔ ŋsɛn mì, ɖo enyɔ ci mìvakpɔ ke, amɛ kuɖeka ku do ta nɔ wo pleŋ, eyi wo pleŋ ku. 15 Éku do ta nɔ wo pleŋ keŋ nɔ mɛ ciwo yí le agbe ŋgbenɔ agbe nɔ wowoŋtɔwo ke o, vɔ woanɔ agbe nɔ mɛ ci yí ku do ta nɔ wo yí wofuin do agbe.
16 Eyi taɖo tɔ so evyɛɔ, mìdegbejeshi mɛɖe sɔgbe koɖo enu ci mìkpɔkpɔ o. Ci mìjeshi Kristo ɖɛ le gbaza mɛ ahan sa can ɔ, mìdegbejeshi ɖɛ do ahan ji o. 17 Eyi taɖo, nɔ mɛɖekpokpui le ɖekɛ koɖo Kristo ɔ, enuwawa yoyu enyi; enu xoxwiwo vayi, míkpɔ ɖa, yoyutɔwo va. 18 Vɔ enuwo pleŋ so Mawu gbɔ, eyɛ ci yí dra mìwo koɖo yɛ gblamɛ do to Kristo ji yí gbesɔ sɛnsɛndɔ ci yí dranɔ gblamɛ do nɔ Mawu koɖo agbetɔwo sɔ na mì. 19 Sɛnsɛndɔ cɛ yí nyi mɔ, Mawu to Kristo ji yí le gblamɛ drakɔ do nɔ eyɛ koɖo xexe lɔ, degbesɔ susu ɖokɔ wowo gɔjejewo ji o, eyi esɔ ŋɛdu ci yí drakɔ gblamɛ do nɔ yɛ koɖo amɛwo sɔ jo nɔ mì.
20 Eyi taɖo, mìnyi amɛdɔdɔwo le dumɛ nɔ Kristo shigbe Mawu to mì ji yí yɔyɔ amɛwo nɛ. Mìle dumɛ nɔ Kristo yí ɖekɔ kuku nɔ mí mɔ: “Mídra gblamɛ do nɔ míwo koɖo Mawu.” 21 Kristo dewa nuvɔn kpɔ o, eyi Mawu sɔ na yí esɔ yiɖeki sa vɔn do ta nɔ mìwo nuvɔnwo keŋ nɔ mìanyi amɛjɔjɔɛwo le ŋmɛ nɔ Mawu toto eyɛ ji.