Wema ci Woŋwlɛ aɖa Rɔmatɔwo
6 Ecɛyɛ ɖe, enyɔ ci mìanuɔ? Mìakpɔtɔ ale nuvɔn wakɔ keŋ nɔ xomɛvu gangan Mawu tɔ asukɔgbɔ dojia? 2 Oo, anyi ahan go! Ci mìku le nuvɔn lɔ mɛ ɖe, lé mìawɛ agbekpɔtɔ anɔkɔ agbe le mɛɔ? 3 Alo mídenya mɔ mìwo ciwo pleŋ yí wa ʒinʒindoshimɛ le Kristo Yesu mɛ wa ʒinʒindoshimɛ le eku yitɔ mɛ hɛnnɛ ba? 4 Eyi taɖo ci mìwa ʒinʒindoshimɛ le eku yitɔ mɛɔ, woɖyi mì koɖi. Eyi shigbe lé woto Eda ŋsɛn gangan lɔ ji yí fɔn Kristo so ku nɛɔ, mìwo can mìnɔkɔ agbe yoyu yɛ. 5 Nɔ mìnyi ŋɖekɛ lɔ koɖi le eku ci hanci eku mɛɔ, mìanyi ŋɖekɛ lɔ koɖi hɛnnɛ dandan le fɔnfɔnsoku yitɔ hanci mɛ. 6 Ðo mìnya mɔ wokan mɛ ci mìnyi sa do aci nu koɖi nɔ ŋsɛn avɔ nɔ mìwo gbaza nuvɔnmɛ lɔ keŋ nɔ mìami hwashi nyinyi nɔ nuvɔn. 7 Ðo nuvɔn hwɛ ɖe degbele kɔ nɔ mɛ ci yí ku o.*
8 Gbesɔ kpe niɔ, mìkando ji mɔ mìanɔ agbe koɖo Kristo hɛnnɛ nɔ mìku koɖi. 9 Mìnya mɔ ci wofɔn Kristo le amɛkukuwo mɛɔ, dagbeku o, eku degbeɖo ŋsɛn ɖe do ji o. 10 Ðo éku yí ɖe nuvɔn swi zeɖeka yí evɔ. Gan agbe ci eleɔ, Mawu ele agbe nɔ. 11 Ahanke míwo can míasɔɛ mɔ yewoku nɔ nuvɔnwawa, vɔ yí le agbe nɔ Mawu to Kristo Yesu ji.
12 Eyi taɖo, míŋgbelɔn nɔ nuvɔn akpɔtɔ akpakpa acɛ le míwo lankpu ciwo yí avaku lɔwo mɛ yí míawawa do edro wowotɔwo ji o. 13 Míŋgbesɔ míwo lankpuwo* sɔ na nuvɔn shigbe enumajɔmajɔwawa hwawanuwo nɛ o. Vɔ mísɔ míwoɖekiwo na Mawu shigbe mɛ ciwo yí wofɔn so amɛkukuwo mɛ nɛ yí agbesɔ míwo lankpuwo* can na Mawu shigbe enujɔjɔɛwawa hwawanuwo nɛ. 14 Nuvɔn deɖo akpa acɛ do mí ji o, ɖo mídele ese gɔnmɛ o, vɔ xomɛvu gangan Mawu tɔ gɔnmɛ yí míle.
15 Enyɔ ci mìagbenu yɛɔ? Ci mìdele ese gɔnmɛ o, gan yí le xomɛvu gangan Mawu tɔ gɔnmɛ taɖo yí mìale nuvɔn wakɔa? Oo! 16 Mídenya mɔ nɔ mísɔ míwoɖekiwo jo nɔ mɛɖe mɔ yewoanyi hwashi ni yí le tonu sekɔ ni ɖe, hwashi mínyi nɔ mɛ ŋtɔ́ ci mísekɔ tonu nɔ ba? Eyi taɖo, nɔ mídanyi hwashiwo nɔ nuvɔn ci yí dɔ wokunɔɔ, míanyi hwashiwo nɔ tonusese ci yí na yí wowanɔ enujɔjɔɛ. 17 Vɔ akpe nɔ Mawu mɔ ci mínyi hwashiwo nɔ nuvɔn sa can ɔ, mívasekɔ tonu so ji mɛ yí wawa do enukplakpla ciwo wosɔ na mí ji. 18 Ɛɛ, ci mídegbenyi hwashiwo nɔ nuvɔn ɔ, mívatrɔ hwashiwo nɔ enujɔjɔɛwawa. 19 Ci mígbɔjɔ le gbaza mɛ taɖo yí ŋxokɔ nuxu shigbe lé agbetɔ xonɔ nuxu nɛ. Ðo shigbe lé hanci yí mísɔ míwo ŋcinuwo sɔ wa hwashi nɔ enumamɛ́mamɛ́ koɖo nuvwin keŋ yí le nuvwin wakɔ sa nɛɔ, ahanke mísɔ míwo ŋcinuwo sɔ wa hwashi nɔ enujɔjɔɛwawa yɛ keŋ awa enu ci yí le mɛmiɖe nɛ. 20 Ðo hwenu mínyi hwashiwo nɔ nuvɔn ɔ, enujɔjɔɛwawa deɖo acɛ ɖe do mí ji o.
21 Keŋ ɖe, nyiwo yí to so enu ciwo míwanɔ sa mɛɔ? Enu lɔwo yí nyi enu ciwo yí le ŋkpɛn wakɔ nɔ mí yɛ, ɖo enu cɛwo kplɔnɔ amɛ hɛn yi eku mɛ. 22 Ecɛyɛ ci mídegbenyi hwashiwo nɔ nuvɔn ɔ, mívatrɔ hwashiwo nɔ Mawu yí le enumɛ́mi wakɔ yí enu ci yí avato so mɛ le vɔvɔnu yí nyi agbe mavɔ. 23 Efɛn ci nuvɔn cunɔ nɔ amɛ yí nyi eku. Vɔ enu ci Mawu nanɔ amɛ to Kristo Yesu mìwo Xwetɔ ji yí nyi agbe mavɔ.