Wema ci Woŋwlɛ Ðaɖa Galatitɔwo
3 Oo Galatitɔwo, ŋɖɛmanyatɔwo! Míwo ciwo yí wodasɛ nɔ petii mɔ wokan Yesu Kristo do aci nu, mi yí wa ɖaŋ ble mí ahan ɔ? 2 Mabiɔ nyɔ cɛ mí se: Ci míwa do ese lɔ ji taɖo yí míxɔ gbɔngbɔn lɔa, alo ci míkando enyɔ ci míse ji taɖo yɔ? 3 Ŋɖɛnyanya yí hwedo mí ahan a? Ci míkando gbɔngbɔn kɔkɔɛ lɔ ji le tɔtɔmɛ* ɖe, agbetɔ susu do mívakplɔkɔ yɛa?* 4 Míkpe fun sugbɔ ahan gbalia? Ŋkando ji mɔ datɛnŋ anyi gbali o. 5 Eyi taɖo mɛ ci yí nakɔ gbɔngbɔn lɔ mí yí gbewakɔ enujiŋwo le mí mɛ ɖe, éwɛkɔ ɖo míwakɔ do ese lɔ ji yɔa, alo ci míkando enyɔ ci míse ji taɖo yɔ? 6 Ele shigbe lé enyi nɔ Abrahamu do nɛ, “éxɔ Yehowa* ji se yí ekpɔɛ do amɛjɔjɔɛ ji.”
7 Kankandoji li mɔ, mínya mɔ mɛ ciwo yí ɖo xɔse yí nyi Abrahamu viwo. 8 Mawu nu do enuŋwlɛŋwlɛ lɔwo mɛ mɔ, yeayɔ jukɔn bu mɛ tɔwo mɔ amɛjɔjɔɛwo, ɖo woɖo xɔse yí enu eŋɛnywi cɛ nɔ Abrahamu doŋkɔ mɔ: “Nacu shi nɔ jukɔnwo pleŋ to eo ji.” 9 Eyi taɖo wocucuɔ shi nɔ mɛ ciwo yí ɖo xɔse doju koɖo Abrahamu ci yí ɖo xɔse hɛnnɛ.
10 Woasɛn kpɛn nɔ mɛ ciwo pleŋ yí gonɔ kpo do ese lɔ nu, ɖo woŋwlɛ ɖɛ mɔ: “Woasɛn kpɛn nɔ mɛɖekpokpui ci yí dewanɔ do enu ciwo pleŋ woŋwlɛ do Ese wema lɔ mɛ ji o.” 11 Gbesɔ kpe niɔ, eze gbajɛɛ mɔ wodayɔ mɛɖe mɔ amɛjɔjɔɛ le Mawu gbɔ to ese lɔ ji o, ɖo “xɔse ci yí amɛjɔjɔɛ ɖo yí adɔ anɔ agbe.” 12 Ese lɔ debiɔ dandandan mɔ woaɖo xɔse o. Vɔ “enu cɛwo ci mɛɖekpokpui awakɔɔ, wowo yí adɔ yí anɔ agbe.” 13 Kristo xwle mì yí hwlɛn mì le kpɛnsɛn Ese lɔ tɔ mɛ keŋ yí vatrɔ kpɛnsɛn do dumɛ nɔ mì, ɖo woŋwlɛ ɖɛ mɔ: “Wosɛn kpɛn nɔ mɛɖekpokpui ci wokan do aci nu.” 14 Enyi ahan keŋ nɔ jukɔnwo atɛnŋ axɔ shicu Abrahamu tɔ toto Kristo Yesu ji keŋ nɔ mìatɛnŋ axɔ gbɔngbɔn kɔkɔɛ gbe ci eɖo toto mìwo xɔse ji.
15 Nɔviwo, masɔ lé agbetɔwo wanɔ nu do sɔ na kpɔwɛ: Nɔ wovlɛ yí ɖo kpe enublabla ɖe ji, nɔ enyi agbetɔ yí wɛ can ɔ, mɛɖe datɛnŋ acuicui swi alo asɔ nyɔ buwo ta ni o. 16 Abrahamu koɖo viviɛ yí woɖo egbewo nɔ, wodemɔ “koɖo viviɛwo,” shigbe wosugbɔ nɛ o. Vɔ womɔ “koɖo vivio,” ci yí dasɛ mɔ amɛ kuɖeka yɔ, eyi nyi Kristo. 17 Ŋnukɔ hɛnnɛ mɔ: Ese ci yí vava le exwe 430 godu decucu enu ci Mawu bla alo ɖe gbeɖu lɔ swi o. 18 Ðo nɔ enyi ese lɔ ji yí Mawu to yí na cinɔnu lɔɔ, anyi degbenyi gbeɖu yɔ o; vɔ xomɛvu Mawu wa nɔ Abrahamu yí ɖo gbe ni.
19 Ecɛyɛ ɖe, nyi yí taɖo Ese lɔ liɔ? Wona Ese lɔ kpi keŋ nɔ nuvɔnwo aze keke je hwenu viviɛ ci nu gbeɖu lɔ kudo ava yí woto mawudɔlawo ji yí sɔ do alɔ̀ mɛ nɔ gblamɛdradotɔ ɖeka. 20 Nɔ enyi amɛ kuɖeka nu ekudoɔ, gblamɛdradotɔ denini o, vɔ Mawu ɖekɛ yɔ. 21 Ecɛyɛ ɖe, Ese lɔ trɔkpe Mawu gbeɖuwoa? Gbeɖe! Ðo nɔ ese ci wona atɛnŋ ana agbeɔ, anyi woatɛnŋ ato ese ji yí ayɔ amɛ mɔ amɛjɔjɔɛ hɛnnɛ. 22 Vɔ Enuŋwlɛŋwlɛ lɔ sɔ enuwo pleŋ ɖo nuvɔn gɔnmɛ keŋ nɔ mɛ ciwo yí ɖo xɔse axɔ nunywi ciwo wosɔ ɖo gbe nɔ mɛ ciwo yí xɔ Yesu Kristo ji se.
23 Vɔ gbɔxwe xɔse lɔ avaɔ, mìle gɔnmɛ nɔ ese lɔ yí ekpa cɛ do mì ji yí mìle te kpɔ xɔse ci woavadasɛ. 24 Eyi taɖo Ese lɔ vale shigbe mɛ ci yí kplɔ* mì yikɔ Kristo gbɔ nɛ keŋ nɔ woatɛnŋ ayɔ mì mɔ amɛjɔjɔɛwo to xɔse ji. 25 Vɔ ecɛyɛ ci xɔse lɔ vaɔ, mɛɖe degbekplɔkplɔ* mì o.
26 Ci mí pleŋ míxɔ Kristo Yesu ji seɔ, mínyi eviwo nɔ Mawu. 27 Ðo míwo ciwo pleŋ woʒin do shi mɛ le Kristo mɛɔ, míwakɔ Kristo tɔ han.* 28 Ʒuifu alo Grɛkitɔ deli o, hwashi alo mɛ ci yí le vovo mɛ deli o, ŋsu alo nyɔnu deli o, ɖo mí pleŋ nyi enu kuɖeka yí bɔ le ju koɖo Kristo Yesu. 29 Eyi nɔ mínyi Kristo tɔɔ, anyi mínyi Abrahamu viviɛwo nyao yí gbenyi gbeɖu lɔ cinɔɖutɔwo.