Wema Ŋkɔtɔ ci Woŋwlɛ Ðaɖa Timɔte
1 Enyɛ Pɔlu ci Mawu ci yí nyi mìwo Hwlɛngantɔ koɖo Kristo Yesu ci yí nyi mìwo mɔkpɔkpɔ na gbe yí ŋnyi apotru Kristo Yesu tɔ 2 yí ŋwlɛkɔ wema cɛ ɖaɖa eo Timɔte,* ci yí nyi evi vevi nɔŋ le xɔse mɛ:
Mawu Eda koɖo Kristo Yesu mìwo Xwetɔ le wa xomɛvu gangan nɔ eo yí aku ŋshishi nɔ eo yí agbena fafa eo.
3 Shigbe lé ŋdo ŋsɛn eo mɔ eo le ci Efezi hwenu ŋjikɔ aso kpe Maseduani nɛɔ, ahanke ŋgbedokɔ ŋsɛn eo yɛ nɛ nɔ nàci hunnɔ keŋ agbe nyɔ nɔ mɛɖewo mɔ woŋgbekpla nubu amɛwo o. 4 Woŋgbeɖonɔ to ŋsukankan xolɔlɔwo koɖo tɔgbitɔgbiwo ŋkɔwo hlɛnhlɛn o; ele ɖekɛ dele enu ŋtɔ́wo mɛ o, vɔ wodɔ yí wohwlɛnnɔ enyɔgbaliwo, wodenyi enu ciwo yí Mawu na nɔ mìasɔ do ŋsɛn mìwo xɔse o. 5 Le nyɔnɔnwi mɛɔ, enu ci yí taɖo ŋnakɔ enukplamu* cɛwo yí nyi mɔ, mìalɔn amɛwo koɖo eji mɛmi, ayexa nywi koɖo xɔse ci mɛ ayemɛnuwawa dele o. 6 Ci mɛɖewo tashi enu cɛwoɔ, wovayi do ta enyɔmaɖotawo mɛ. 7 Wojinɔ mɔ yewoakpla ese lɔ amɛwo, vɔ wodemɔŋje enyɔ ciwo yí wonukɔ alo enu ciwo ji wohlanɔ do koɖo ŋsɛn mɛ o.
8 Vɔ mìnya mɔ Ese lɔ nyɔ nɔ mɛɖe wawa do ji nywiɖe 9 yí nyanya mɔ denyi amɛjɔjɔɛ yí wodo se lɔ nɔ o, vɔ wodui nɔ mɛ ciwo yí dewanɔ do ese ji o, egufɔntɔwo, mɛ ciwo yí devɔnnɔ nɔ Mawu o, nuvɔnwatɔwo, egbejimanɔtɔwo,* mɛ ciwo yí gbanɔli enukɔkɔɛwo, amɛdawutɔwo, amɛnɔwutɔwo, amɛwutɔwo, 10 mɛ ciwo yí wanɔ mateli,* ŋsu ciwo yí dɔnnɔ koɖo ŋsuwo, agbetɔ fitɔwo, ŋsukantɔwo, mɛ ciwo yí ɖonɔ gbe yí ata nu xu ji gbali koɖo mɛ ciwo yí wanɔ ŋɖekpokpui ci yí trɔkpe enukplakpla nywi* lɔ 11 ci yí sɔgbe koɖo eŋɛnywi gangan ci jijɔ Mawu lɔ sɔ do ashi nɔŋ.
12 Ŋdokɔ akpe nɔ Kristo Yesu mìwo Xwetɔ ci yí na ŋsɛnŋ, ɖo ékpɔŋ do egbejinɔtɔ ji yí sɔ sɛnsɛndɔ lɔ do ashi nɔŋ 13 ci ŋnunɔ enyɔkpotu do Mawu nu yí cinɔ yumɛ nɔ amɛwo yí ŋdebunɔ amɛ sa can. Vɔ woku ŋshishi nɔŋ, ɖo eɖemanya koɖo xɔsemaɖo yí dɔ ŋwa nu ahan. 14 Mìwo Xwetɔ wa xomɛvu gangan nɔŋ keke ewugan, eyi ŋvaɖo xɔse koɖo lɔnlɔn ci yí so Kristo Yesu gbɔ. 15 Enyɔ cɛ nyi nyɔnɔnwi yí woɖo alɔn do ji keŋkeŋ: Kristo Yesu va xexe lɔ mɛ yí ahwlɛn agɔjetɔwo gan. Enyɛ yí nyi amɛ ŋkɔtɔ le wo mɛ. 16 Éle ahan gan, woku ŋshishi nɔ enyɛ ci yí nyi nuvɔnwatɔ gangantɔ keŋ nɔ Kristo Yesu atɛnŋ adasɛ jigbɔnɖɛ ci exɔnɔ keŋkeŋ to ŋji nɔ anyi kpɔwɛ nɔ mɛ ciwo yí jikɔ avaxɔɛ ji se nɔ agbe mavɔ kpɔkpɔ.
17 Efyɔ mavɔmavɔ ci yí dekunɔ o, ci wodekpɔnɔ o yí nyi Mawu ɖekɛ kpaŋ yí woabu yí akanfu so mavɔ sɔyi mavɔ. Amɛn.
18 Evinyɛ Timɔte, ŋna nukplamu* cɛ eo sɔgbe koɖo enyɔ ciwo yí wonu ɖɛ so eo nu nɔ woakpedo eo nu nàkpɔtɔ awakɔ ahwa nywi lɔ, 19 akpɔtɔ asɛnsɛnŋ le xɔse mɛ, aɖokɔ ayexa nywi; eyi mɛɖewo te do akpa yí wowo xɔse nu shi shigbe tɔjihun ci yí gban nɛ. 20 Imene koɖo Alɛsandru can wa ahan, eyi ŋsɔ wo sɔ do alɔ̀ mɛ nɔ Satana keŋ nɔ anyi etodɔndɔn nɔ wo nɔ woakpla nu le mɛ mɔ enyɔkpotu nunu do Mawu nu denyɔ o.