Wema ci Woŋwlɛ Ðaɖa Ebretɔwo

13 Míkpɔtɔ alɔnkɔ míwonɔnɔwo shigbe nɔjinɔwo nɛ. 2 Míŋgbeŋlɔbe mɛdruxɔxɔ* o, ɖo eyi mɛɖewo wa yí xɔ mawudɔlawo le manyamanya mɛ. 3 Míkpɔtɔ aɖoɖoɔ ŋwi mɛ ciwo yí le gakpa mɛ shigbe mɔ míle gakpa mɛ* koɖo wo nɛ yí aɖoɖoɔ ŋwi mɛ ciwo yí wotretreɛ fun nɔ, ɖo agbetɔwo míwo can mínyi.* 4 Mítekpɔ nɔ bubu anɔ alɔlele nu le amɛwo pleŋ ŋmɛ, eyi woŋgbexo ɖyi alɔleleba lɔ o, ɖo Mawu aɖo kojo nɔ matelitɔnɔwo* koɖo hashiwatɔwo. 5 Mítekpɔ nɔ agbenɔnɔ míwotɔ adasɛ mɔ mídelɔn eho o yí enu ciwo yí le mí shi kakayɛ le jeŋ nɔ mí, ɖo énu mɔ: “Ŋdatashi eo gbeɖe o, ŋdagbe eo ɖɛ gbeɖe o.” 6 Eyi taɖo mìatɛnŋ agbe dɔn keŋkeŋ yí anu mɔ: “Yehowa* yí nyi anyi kpedonutɔ; ŋdavɔn o. Nyi agbetɔ atɛnŋ awa nɔŋ ɔ?”

7 Míɖonɔ ŋwi mɛ ciwo yí le ŋkɔ nɔ mí, mɛ ciwo yí xo Mawu nuxu lɔ nɔ mí, eyi ci míkpɔkpɔ nyɔna ciwo yí tokɔ so agbenɔnɔ wowotɔ mɛɔ, míɖo xɔse wowotɔ han.

8 Mɛ ci Yesu Kristo nyi esɔ vayiɔ, eyi lɔ ke enyi gbɛ, eyi akpɔtɔ anyi tɛgbɛɛ.

9 Míŋgbelɔn nɔ woasɔ enukplakpla ciwo yí to akpo hamɛhamɛwo asɔ ble mí yí míabu emɔ o, ɖo nɔ wosɔ xomɛvu gangan do ŋsɛn ejiɔ, ényɔnɔ ni sɔwu mɔ woasɔ ŋɖuɖu* asɔ wɛ. Mɛ ciwo yí sɔ ŋɖuɖu lɔ ɖonɔ texwe ŋkɔtɔ deɖunɔ ele ɖe ni o.

10 Avɔnsakpe ɖeka le mì shi yí mɛ ciwo yí wanɔ sɛnsɛndɔ kɔkɔɛ le avɔnzava lɔ mɛ deɖo acɛ aɖu nu le ji o. 11 Ðo elan ciwo hun yí avɔnsatɔ gangantɔ lɔ hɛn yinɔ kɔkɔɛtɔxu lɔ yí enyinɔ nuvɔn vɔnsaɔ, wotɔnɔ zo wo le godu nɔ ahwakpa lɔ. 12 Eyi taɖo Yesu can kpe fun le godu nɔ jugan lɔ gbo keŋ asɔ yiŋtɔ hun asɔ trɔ amɛwo yí woanyi amɛkɔkɔɛwo. 13 Ecɛyɛɔ, mìayi ahwakpa lɔ godu keŋ nɔ woado ŋkpɛn mì shigbe lé wodo ŋkpɛn eyɛ nɛ. 14 Ðo jugan ɖe dele mì shi le lɛ ci yí ani keke asɔyi o, vɔ mìjijiɛ ci yí gbɔgbɔ veviɖe. 15 Mìato Yesu ji asɔ kanfukanfu vɔnsa asɔ nakɔ Mawu gashiagamɛ, eyi nyi mìwo nukpa ci mìsɔ xonɔ nuxu so yi ŋkɔ lɔ nu le jugbaja kusɛnsɛn. 16 Ahanke míŋgbeŋlɔbe enunywiwawa nɔ mɛbuwo koɖo enunana amɛ o, ɖo vɔnsa cɛ hanciwo yí jɔnɔ ji nɔ Mawu koŋ.

17 Mísenɔ tonu nɔ mɛ ciwo le ŋkɔ nɔ mí, eyi míasɔ míwoɖekiwo hwenɔ nɔ wo, ɖo wokpɔkpɔ mí* ji shigbe mɛ ciwo yí ajo kɔnŋta nɛ keŋ nɔ woatɛnŋ awa wowo dɔ cɛ koɖo jijɔ yí danyi koɖo vevisese o, ɖo ecɛ adahɛn nu le mí nu.

18 Míkpɔtɔ adonɔ gbe ɖaɖa do ta nɔ mì, ɖo mìkando ji mɔ mìɖo ayexa nywi* ci mìjinɔ mɔ mìanɔ agbe nywiɖe le enuwo pleŋ mɛ. 19 Vɔ ŋdokɔ ŋsɛn mí veviɖe mɔ, míwo le do gbe ɖaɖa keŋ nɔ woajoŋ nɔ mí le majinjinɖe mɛ.

20 Ecɛyɛɔ, fafa Mawu lɔ ci yí fɔn lɛngbɔkplɔtɔ gangantɔ lɔ ci yí nyi mìwo Xwetɔ Yesu so ku koɖo enublabla mavɔ hun lɔ 21 le sɔ enunywiwo pleŋ na mí keŋ nɔ míawa yi dro. Éto Yesu Kristo ji yí wanɔ enu ci yí wa ɖaŋ jɔnɔ ji ni le mì mɛ. Eyɛ yí woakanfu so mavɔ yi mavɔ. Amɛn.

22 Ecɛyɛɔ, nɔviwo, ŋdokɔ ŋsɛn mí mɔ míwo le sɔ jigbɔnɖɛ ɖo to ŋsɛndoamu nyɔ cɛ, ɖo wema ci ŋŋwlɛ ɖaɖa mí desugbɔ o. 23 Ŋji mɔ míwo le nya mɔ wojo mìwo nɔvi Timɔte yí nɔ éva blaŋ ɔ, nyɛ koɖo yɛ avayɔ mí kpɔ.

24 Mído gbe nɔ mɛ ciwo pleŋ yí le ŋkɔ nɔ mí koɖo amɛkɔkɔɛwo pleŋ. Mɛ ciwo yí le Itali can do gbe ɖaɖa mí.

25 Mawu le wa xomɛvu gangan nɔ mí pleŋ.