Wema ci Woŋwlɛ Ðaɖa Ebretɔwo

11 Xɔse nyi kankando enu ci wokpɔkɔ emɔ nɔ ji, ényi kpeɖoji ci yí dasɛ gbajɛɛ* mɔ enu ciwo wodekpɔkpɔɔ, woli nyao. 2 Ðo eyi dɔ woxo nuxu nywi so mɛ ciwo yí ni vayi sa* nu.

3 To xɔse jiɔ, mìmɔŋje mɛ mɔ wowa xexe* lɔ do totonu to enyɔ ci Mawu nu ji, eyi enu ciwo wokpɔnɔ jɔ so enu ciwo yí wodekpɔnɔ mɛ.

4 To xɔse jiɔ, Abɛli wa vɔnsa nɔ Mawu yí enyɔ wu Kayɛn tɔ sesese. Eyi to xɔse ŋtɔ́ jiɔ, woɖe kunu so nu mɔ yɛnyi amɛjɔjɔɛ, ɖo enu ciwo ena kpe nɔ Mawu. Eyi ci eku can ɔ, ékpɔtɔ le nuxu xokɔ to yi xɔse ji.

5 To xɔse jiɔ, wosɔ Enɔki si nɔ ŋgbeku vevisese ku o, eyi wodekpɔɛ le fiɖe o, ɖo Mawu sɔɛ si; eyi gbɔxwe woasɔɛ siɔ, woɖe kunu so nu mɔ yi nu wa ɖaŋ kpe nɔ Mawu. 6 Gbesɔ kpe niɔ, mɛɖe nu datɛnŋ akpe nɔ Mawu nywiɖe nɔ xɔse dele shi o, ɖo mɛɖekpokpui ci yí tenɔ gogo Mawu ɖo axɔɛ se mɔ yɛli yí nyi mɛ ci yí cunɔ fɛn nɔ mɛ ciwo yí jini kpɔ veviɖe.

7 To xɔse jiɔ, ci Mawu kanxle Nowe so enu ciwo yí dejɔ kpɔ nu goduɔ, édasɛ mɔ yenyi mɛ ci yí vɔnnɔ nɔ Mawu yí kpa tɔjihun daka keŋ asɔ hwlɛn yi xomu gan; eyi to xɔse ŋtɔ́ jiɔ, édo hwɛ xexe lɔ yí vanyi cinɔɖutɔ nɔ enujɔjɔɛwawa ci yí tonɔ so xɔse mɛ.

8 To xɔse jiɔ, Abrahamu se tonu hwenu woyɔɛ, ci eso yí yi fini womɔ yɛaxɔ yí anyi cinɔ yitɔ; éje mɔ ci denya fini eyikɔ can. 9 To xɔse jiɔ, ényi mɛdru yí nɔ gbeɖu nyigban lɔ ji le eju bu mɛ, énɔ avɔnzavawo mɛ koɖo Izaki sɔ kpe nɔ Ʒakɔbu, mɛ ciwo yí nyi cinɔɖutɔwo koɖi nɔ gbeɖu ɖekɛ lɔ. 10 Ðo énɔkɔ te kpɔ eju ci yí ɖo gɔnmɛɖokpe ŋtɔŋtɔwo, Mawu yí ɖe susu so eju cɛ nu yí gbesui.

11 To xɔse jiɔ, wona ŋsɛn Sara hɛnnɛ yí efɔn fu yí ji vi ci eshin le exwe mɛ can, ɖo ékpɔ Mɛ ci yí ɖo gbe lɔ mɔ yɛnyi egbejinɔtɔ.* 12 Ecɛ yí dɔ taɖo to amɛ kuɖeka ci yí kpo vɛ* jiɔ, woji evi ciwo yí sugbɔ shigbe wlecivi ciwo yí le jeŋkwi mɛ nɛ koɖo axukɔ ciwo yí do mahlɛn le axu tu nɛ.

13 Mɛ cɛwo pleŋ nɔ gbeji keke yí ku ci gbeɖu lɔwo dekpɔ vamɛ nɔ wo can; vɔ wokpɔ wo le azɔge ɖaa yí eji jɔ wo,* eyi wonu nɔ amɛwo mɔ mɛdruwo yewonyi yí le nyigban lɔ ji na nɔ hwenu kleŋ ɖe. 14 Ðo mɛ ciwo yí xokɔ nuxu ahan dasɛ yi gbajɛɛ mɔ texwe ci yí anyi yewotɔ yí yewojikɔ veviɖe. 15 Eyi nɔ wokpɔtɔ bubuɔ tamɛ kpɔ so fini woso le nuɔ, wotɛnŋ vakpɔ emɔ keŋ atrɔ yi. 16 Vɔ ecɛyɛɔ, texwe ci yí nyɔ wu yí drodroɔ wo, texwe lɔ yí nyi jeŋkwi mɛ. Eyi taɖo dewa ŋkpɛn nɔ Mawu mɔ woayɔɛ mɔ wowo Mawu o, ɖo édra jugan ɖeka do ɖɛ nɔ wo.

17 To xɔse jiɔ, Abrahamu sɔ Izaki na ci wodui kpɔ, eyɛ ci yí xɔ gbeɖu lɔwo koɖo jijɔ sɔ eviɛ akogo lɔ sa vɔn cu 18 ci wonu ni vayi mɔ: “Mɛ ciwo yí ato so Izaki kannu mɛ yí woayɔ mɔ viviowo” can. 19 Vɔ ékpɔɛ mɔ Mawu atɛnŋ afuin so eku ŋtɔkpu, eyi exɔɛ so eku le kpɔwɛnyɔnunu mɛ.

20 To xɔse jiɔ, Izaki can cu shi nɔ Ʒakɔbu koɖo Ezawu sɔgbe koɖo enu ciwo yí avajɔ.

21 To xɔse jiɔ, Ʒakɔbu cu shi nɔ Ʒozɛfu vi ŋsuviwo ɖekaɖeka hwenu ejikɔ aku yí go do ekpo ci etɔnnɔ nu yí do ŋdo nɔ Mawu.*

22 To xɔse ji hwenu eku gogokɔ nɔ Ʒozɛfu ɔ, éxo nuxu so hunhun Izraɛliviwo tɔ nu yí nu lé woavawa nɔ yi xuwo* daɖɛ.

23 To xɔse jiɔ, Moizi dalɔ koɖo nɔlɔ sɔ wla na nɔ wleci amɛtɔn le yi jiji godu, ɖo wokpɔ mɔ ɖevi lɔ nya kpɔkpɔ yí deso jika nɔ wo mɔ woada le ese ci efyɔ lɔ do ji o. 24 To xɔse ji ci Moizi vashin ɔ, égbe mɔ woŋgbeyɔ ye mɔ Faraɔn vi nyɔnuvi viɛ o, 25 élɔn mɔ yeakpe fun koɖo Mawu mɛwo sɔwu mɔ yease vivi nuvɔn tɔ ci yí nini na nɔ hwenu kleŋ ɖe, 26 ɖo ékpɔ mɔ ŋkpɛn ci woado ye shigbe Kristo nɛ le ŋkɔ nɔ Eʒipti dɔkunuwo sesese, ɖo ékpɔkɔ emɔ nɔ fɛncu lɔ truɖuɖu. 27 To xɔse jiɔ, éso le Eʒipti yí devɔn nɔ dɔmɛzi efyɔ lɔ tɔ o, ɖo ékpɔtɔ le te sɛnsinɖe shigbe ékpɔkpɔ Mɛ ci wodekpɔnɔ nɛ. 28 To xɔse jiɔ, éɖu Paki yí shishi ehun do ehɔn nu keŋ nɔ dɔdɔla Mawu tɔ ŋgbewa enuvevi koɖo* wowo vi ŋkɔtɔwo o.

29 To xɔse jiɔ, woto Axu Jin lɔ mɛ shigbe nyigban xuxu ji wozɔnkɔ nɛ, vɔ ci Eʒiptitɔwo ti kpɔɔ, woku etɔ ku.

30 To xɔse jiɔ, ci jukɔn lɔ zɔn zɔnli trɔdo Ʒeriko ju lɔ na nɔ ŋkeke amadrɛɔ, yi gliwo mu juin. 31 To xɔse jiɔ, Raxabu sakabo lɔ deku koɖo tonumasetɔwo o, ɖo éxɔ ejutrɔtɔ lɔwo le fafa mɛ.

32 Enyɔ ci nagbenu kpiɔ? Ðo gamɛ dasun nɔŋ yí naxo nuxu so Ʒedeɔn, Baraki, Samusɔn, Ʒɛfute, Davidi koɖo Samiɛli sɔ kpe nɔ enyɔnuɖɛtɔ buwo nu o. 33 To xɔse jiɔ, woɖu fyɔɖuxuwo ji yí wa enujɔjɔɛ, woɖo egbewo nɔ wo, wobɔ aglan cu nɔ janŋtanwo, 34 woci adan nɔ ezo, woshi nɔ ewi, wona ŋsɛn wo hwenu wogbɔjɔ, wovanyi ŋsɛntɔnɔ le ahwa mɛ, woɖu ahwakɔn ciwo yí tɔ ahwa koɖo wo ji. 35 Wofɔn nyɔnu ciwo amɛwo ku nɔ mɛwo nɔ wo; vɔ wodo agbeya nɔ mɛbuwo, ɖo wodelɔn yí na ta nɔ woatashi wo o. Wowɛ ahan keŋ atɛnŋ aɖu le nɔ fɔnfɔnsoku ci yí nyɔ wu. 36 Ɛɛ, efun ci mɛɖewo kpe yí nyi mɔ, wogbali wo yí ya wo; ci yí gbewu hunnɔɔ, wodo awlɛga mɛɖewo yí lé mɛɖewo cu do gakpa mɛ. 37 Woxo kpe wo, wodo wo kpɔ, wosɔ saka zɛn mɛɖewo do ve, wowu mɛɖewo koɖo ewi, wonɔnɔ lɛngbɔgbazawo alo egbɔgbazawo mɛ yí adandan hwenu wole eʒan mɛ, efunkpekpewo mɛ alo hwenu wocukɔ enu kpɔ koɖo wo. 38 Eyi xexe lɔ denyi enu kpetii sa yí mɛ cɛwo anɔ mɛ o. Woflunɔ to zogbewo mɛ koɖo etowo ji yí nɔnɔ ekpetuiwo koɖo doduwo mɛ.

39 Ci woɖe kunu nywi so mɛ cɛwo pleŋ nu do xɔse ci woɖo ŋci can ɔ, gbeɖu lɔ devamɛ yí wokpɔ o. 40 Ðo Mawu dra enu ci yí nyɔ sɔwu do ɖɛ nɔ mì keŋ nɔ woŋgbevanyi mɛ ciwo nu afɛn dele doŋkɔ nɔ mì o.