Wema ci Woŋwlɛ Ðaɖa Efezitɔwo
5 Eyi taɖo ci mínyi evi veviwo nɔ Mawu ɔ, míwanɔ yitɔ han. 2 Míkpɔtɔ alɔnkɔ míwonɔnɔwo shigbe lé Kristo can lɔn mì* do nɛ yí sɔ yiɖeki na do ta nɔ mì* yí enyi enunana koɖo vɔnsa ci yí hwɛnhwɛn ete lilili nɔ Mawu.
3 Shigbe lé eɖo anɔ do le amɛkɔkɔɛwo mɛ nɛɔ, míŋgbelɔn nɔ woakpɔ mateliwawa,* enumakɔmakɔ ɖekpokpui alo enuciŋmɛnamɛ nuwana ɖe le mí mɛ o. 4 Nɛnɛke mídawanɔ ŋkpɛnnuwo alo anunɔ exlunyɔwo alo aɖɔkɔ ɖɔkwi dɔndɔnwo o; enu cɛwo desɔgbe o; vɔ míadonɔ akpe nɔ Mawu. 5 Ðo míwoŋtɔwo mínya nywiɖe mɔ le Kristo koɖo Mawu Fyɔɖuxu lɔ mɛɔ, cinɔ ɖekɛ deli nɔ mɛ ci yí wakɔ mateli* alo mɛ ci yí wakɔ enumakɔmakɔ alo mɛ ci yí enu cinɔ ŋmɛ nɔ o, voju sɛnsɛn han yí enuciŋmɛnamɛ nyi.
6 Míŋgbelɔn nɔ mɛɖe asɔ enyɔmaɖotawo ble mí o, ɖo enu cɛ hanciwo yí dɔ yí Mawu dɔmɛzi lɔ gbɔgbɔ evi tonumasetɔwo ji. 7 Eyi taɖo míŋgbewakɔ wowotɔ han o.* 8 Ðo vinvin yí mínyi sa; vɔ ecɛyɛɔ, mívanyi klɛnklɛn le Axwetɔ lɔ mɛ. Míkpɔtɔ awakɔ nu shigbe klɛnklɛn viwo nɛ. 9 Ðo eku ci yí klɛnklɛn lɔ sɛnnɔ yí nyi enywiwawa ŋmɛ ɖekpokpui, enujɔjɔɛwawa ɖekpokpui koɖo nyɔnɔnwi ɖekpokpui. 10 Mítekpɔ akpɔnɔ mɔ enu ciwo yí míwakɔ jɔkɔ ji nɔ Axwetɔ lɔ ma. 11 Mími vinvin mɛ dɔ ciwo yí desɛnnɔ ku wawa, vɔ míklo nu so wo ji. 12 Ðo enu ciwo yí wowanɔ le bebemɛ lɔwo wa ŋkpɛn keke wodatɛnŋ anu wo o. 13 Ecɛyɛɔ, klɛnklɛn lɔ kɔ do enu ciwo pleŋ ji woklo nu so* yí woze gbajɛɛ, ɖo ŋɖekpokpui ci yí ze gbajɛɛ nyi klɛnklɛn. 14 Eyi taɖo wonu mɔ: “Oo, alɔndɔntɔ, nyɔ̀ yí afɔn so amɛkukuwo mɛ yí Kristo aklɛn do eo ji.”
15 Eyi dɔ taɖo míkpɔ nywiɖe nɔ míŋgbezɔnnɔ shigbe ŋɖɛmanyatɔwo nɛ o, vɔ mízɔnnɔ shigbe ŋɖɛnyatɔwo nɛ. 16 Míwa ɖaŋ azannɔ míwo gamɛwo nywiɖe,* ɖo ŋkeke lɔwo nyina. 17 Ecɛ yí dɔ taɖo, mími enu wawa shigbe enugɔnmɛmasetɔwo nɛ, vɔ mítekpɔ amɔnɔŋje enu ci Yehowa* dro nyi mɛ. 18 Nɛnɛke, míŋgbenunɔ aha mu o, édɔnnɔ amɛ do enudɔndɔnwawa mɛ, vɔ mína nɔ gbɔngbɔn kɔkɔɛ Mawu tɔ aɖɔ lanmɛ nɔ mí. 19 Míji kanfukanfu hawo, míkanfu Mawu yí aji gbɔngbɔn mɛ hawo yí asɔ xo nuxu nɔ míwonɔnɔwo,* míji ha yí akanfu Yehowa* le míwo jiwo mɛ. 20 Mídonɔ akpe gashiagamɛ nɔ mìwo Mawu ci yí nyi mìwo Da nɔ enushianu le mìwo Xwetɔ Yesu Kristo ŋkɔ mɛ.
21 Mísɔ míwoɖekiwo hwe nɔ míwonɔnɔwo nɔ bubu gangan ci míɖo nɔ Kristo ŋci. 22 Nyɔnuwo le sɔ wowoɖekiwo hwe nɔ wowo suwo shigbe lé woawɛ nɔ Axwetɔ lɔ nɛ, 23 ɖo ŋsu yí nyi eta nɔ ashiɛ shigbe lé Kristo nyi eta nɔ hamɛ lɔ nɛ, eyi nyi hwlɛngantɔ nɔ lankpu cɛ. 24 Le nyɔnɔnwi mɛɔ, shigbe lé hamɛ lɔ sɔ yiɖeki hwe nɔ Kristo do nɛɔ, ahanke nyɔnuwo can ɖo asɔ wowoɖekiwo hwe nɔ wowo suwo le enuwo pleŋ mɛ nɛ. 25 Ŋsuwo, míkpɔtɔ alɔnkɔ míwo shiwo shigbe lé Kristo can lɔn hamɛ lɔ keke yí sɔ yiɖeki na do ta ni nɛ. 26 Éwa cɛ keŋ ana yí hamɛ lɔ ale kɔkɔɛɖe ci esɔ Mawu nyɔ lɔ ci yí nyi eshi han yí sɔ klɔɛ, 27 keŋ nɔ hamɛ lɔ anya kpɔkpɔ le ŋmɛ nɔ yiŋtɔ yí eɖyi alo ehwɛn alo enu ŋtɔ́ hanwo ɖe dale nu o, vɔ ále mɛmiɖɛ yí wodakpɔ afɛn ɖe le nu o.
28 Ahanke, ŋsuwo ɖo alɔn wowo shiwo shigbe wowoŋtɔwo* nɛ. Ŋsu ci yí lɔn ashiɛɔ, élɔn yiɖeki. 29 Ðo mɛɖe degbenɔ yiŋtɔ lankpu* malɔn gbeɖe o, vɔ énanɔ ŋɖuɖu yi yí lenɔ bu ni shigbe lé Kristo wɛni nɔ hamɛ lɔ nɛ. 30 Ðo yi lankpu ŋcinuwo yí mìnyi. 31 Enuŋwlɛŋwlɛ lɔwo nu mɔ: “Eyi taɖo ŋsu aso gbeɖe dalɔ koɖo nɔlɔ ɖɛ yí axoca* koɖo ashiɛ yí wo koɖo ve lɔ atrɔ lankpu kuɖeka.” 32 Enyɔwlawla kɔkɔɛ cɛ kpɛn. Kristo koɖo hamɛ lɔ nu yí ŋxokɔ nuxu so. 33 Vɔ mɛɖekaɖeka le mí mɛ ɖo alɔn ashiɛ shigbe lé elɔn yiɖeki nɛ, eyi ele mɔ nyɔnu can aɖo bubu gangan nɔ asuɔ.