Wema ci Woŋwlɛ aɖa Rɔmatɔwo
7 Nɔviwo, mídenya mɔ nɔ amɛ le agbe gbɔxwe yí Ese kpanɔ ni ba? (Ðo mɛ ciwo yí jeshi ese lɔ yí ŋxoxoɔ nuxu nɔ.) 2 Le kpɔwɛ mɛ, nɔ nyɔnu ɖe asuɔ, ese bla yɛ koɖo asuɔ lɔ do ɖekɛ. Vɔ nɔ asuɔ kuɔ, asuɔ lɔ degbeɖo acɛ ɖe do ji o.* 3 Eyi taɖo, nɔ asuɔ le agbe gan yí evayi ɖe ŋsu buɔ, woayɔɛ mɔ hashiwatɔ. Vɔ nɔ asuɔ kuɔ, degbele yi se gɔnmɛ o; eyi taɖo nɔ éɖe ŋsu buɔ, denyi hashiwatɔ o.
4 Eyi taɖo nɔvinyɛwo, míwo can míku sa nɔ Ese lɔ to Kristo lankpu ji nɔ míatɛnŋ atrɔ mɛbu tɔ, eyi nyi mɛ ci yí wofɔn so amɛkukuwo mɛ keŋ nɔ mìatɛnŋ asɛn ku nɔ Mawu. 5 Ðo ci mìnɔnɔ agbe sa sɔgbe koɖo gbaza lɔɔ, Ese lɔ na yí evaze petii mɔ enudɔndɔn ciwo yí dronɔ gbaza lɔ na yí mìwo lankpuwo* wanɔ nuvɔn yí nuvɔn cɛ kplɔnɔ mì hɛn yi eku. 6 Vɔ ecɛyɛɔ, mìdegbele Ese lɔ gɔnmɛ o; ɖo mìku nɔ eyɛ ci yí sɔ mì wa gakpamɛnɔtɔwo keŋ nɔ mìŋgbenyi hwashiwo nɔ Mawu to ese ci woŋwlɛ ɖɛ sa ji o, vɔ mìanyi hwashiwo nɔ Mawu to gbɔngbɔn lɔ ji.
7 Enyɔ ci mìanu yɛɔ? Nuvɔn yí Ese lɔ nyia? Oo! Le nyɔnɔnwi mɛ nɔ Ese lɔ deli saɔ, ŋdanya ŋci nuvɔn nyi o. Le kpɔwɛ mɛ, ŋdanya enu ci enuciŋmɛnamɛ nyi nɔ Ese lɔ denu mɔ: “Mɛbu nu ŋgbeci ŋmɛ nɔ eo o.” 8 Vɔ nuvɔn to ese lɔ ji yí na yí enuciŋmɛnamɛ vovovowo pleŋ ɖenɔ fun nɔŋ; nɔ ese lɔ deliɔ, anyi ŋsɛn vɔ nɔ nuvɔn.* 9 Le nyɔnɔnwi mɛ ci ese deli saɔ, ŋle agbe. Vɔ ci ese vaɔ, nuvɔn gbetrɔva yí nyɛŋku. 10 Eyi ese ci womɔ yɛkplɔ amɛ yi agbe mɛɔ, nyɛŋkpɔɛ mɔ yɛkplɔ amɛ yi eku. 11 Ðo nuvɔn kpɔ emɔ to ese cɛ mɛ keŋ yí bleŋ yí wuŋ. 12 Eyi taɖo Ese lɔ ŋtɔ nyi enukɔkɔɛ yí enyɔ ci enu can nyi enukɔkɔɛ, enujɔjɔɛ koɖo enunywi.
13 Ecɛyɛ ɖe, enunywi yí anyi eku nɔŋ a? Kpɔ gbeɖe! Vɔ nuvɔn yí nyi eku nɔŋ. Enunywi yí ese lɔ nyi, vɔ éna eze petii mɔ nuvɔn yí wuwuɔŋ; eyi taɖo enyɔ ci ese lɔ nu dasɛ mɔ enubaɖa teŋ yí nuvɔn nyi. 14 Ðo Ese lɔ so Mawu gbɔ yí va to yi gbɔngbɔn ji.* Vɔ enyɛɔ, gbaza ŋnyi yí wosaŋ nɔ nuvɔn. 15 Ŋdenya enu ci ŋwakɔ o, ɖo ŋdetɛnŋ yí wanɔ ŋci ŋjinɔ mɔ mawa o. Vɔ ŋci ŋgbe koŋ ɔ, eyi ŋvawanɔ. 16 Ŋxɔ gbe mɔ Ese lɔ nyɔ, gan ŋkpɔtɔ wakɔ enu ciwo ŋdeji mɔ mawa o. 17 De nyɛŋtɔ yí xa yí wakɔ enu lɔwo o, vɔ nuvɔn ci yí le ŋmɛ yí wakɔ wo. 18 Ŋnya mɔ nunywi ɖekɛ dele nyɛŋtɔ mɛ o, nunywi ɖekɛ dele anyi gbaza mɛ o; ɖo ŋjinɔ mɔ mawa nunywi, vɔ ŋdesun ji yí wɛni o. 19 Ŋdewanɔ nunywi ci ŋjinɔ mɔ mawa o; vɔ enudɔndɔn ci ŋdeji mɔ mawaɔ, eyi ŋwanɔ. 20 Eyi taɖo ci enyi enu ci ŋdejinɔ mɔ mawa yí ŋwanɔɔ, denyi nyɛŋtɔ yí wɛwɛ o, vɔ nuvɔn ci yí le ŋmɛ yí wɛkɔ.
21 Ŋkpɔ ese cɛ le anyi nyɔ lɔ mɛ, nɔ ŋji mɔ mawa ŋci yí nyɔɔ, enudɔndɔnwawa gbedronɔŋ. 22 Le nyɔnɔnwi mɛ le anyi ji mɛɔ, Mawu se lɔ jɔnɔ ji nɔŋ. 23 Vɔ ŋkpɔ ese bu le anyi lankpu* mɛ yí ele ahwa wakɔ koɖo ese ci yí le anyi susu mɛ yí sɔŋ sɔ wakɔ hwashi nɔ nuvɔn se ci yí le anyi lankpu* mɛ. 24 Anyi nu sadɔnu kekeɖe! Mi yí ahwlɛn ŋgan le lankpu cɛ ci yí kplɔŋ yikɔ eku shiɔ? 25 Ŋdokɔ akpe nɔ Mawu to Yesu Kristo mìwo Xwetɔ ji! Eyi taɖo le anyi susu mɛɔ, ŋnyi hwashi nɔ Mawu se, vɔ le anyi gbaza mɛɔ, ŋnyi hwashi nɔ nuvɔn se.