Wema ci Woŋwlɛ Ðaɖa Kolosetɔwo
2 Ðo ŋji mɔ míwo le nya lé ŋdodoɔ egbla gangan do ta nɔ míwo koɖo mɛ ciwo yí le Laodise sɔ kpe nɔ mɛ ciwo pleŋ yí dekpɔ nyɛŋtɔ lɔ kpɔ o.* 2 Ŋwɛkɔ ahan keŋ nɔ woatɛnŋ akpɔ akɔnfɛ yí ate gogo wowonɔnɔwo le lɔnlɔn mɛ yí axɔ shicuwo pleŋ ci wokando enumɛmɔŋje adodwitɔ lɔ ji. Ecɛ adɔ yí woamɔŋje enyɔwlawla kɔkɔɛ Mawu tɔ lɔ ci yí nyi Kristo mɛ keŋkeŋ. 3 Eyi mɛ yí Mawu wa ɖaŋ wla nunya koɖo enumɛmɔŋje dɔkunuwo pleŋ do. 4 Ŋnukɔ nyɔ cɛ keŋ nɔ mɛɖekɛ ŋgbevable mí koɖo ŋsukankan nyɔwo o. 5 Ci nyɛŋtɔ ŋdele mí gbɔ can ɔ, ŋle mí gbɔ le gbɔngbɔn mɛ. Éjɔkɔ ji nɔŋ mɔ ŋnya lé míwa ɖaŋ wanɔ nuwo do totonu koɖo lé xɔse míwotɔ sɛnŋ le Kristo mɛ do.
6 Eyi taɖo, ci míxɔ Axwetɔ Kristo Yesu ɔ, míŋgbetrɔ le godu ni o. 7 Mído ke yí alo do le mɛ, míwo xɔse le sɛnŋ shigbe lé wokpla mí do nɛ yí míadonɔ akpe nɔ Mawu sugbɔsugbɔ.
8 Míkpɔ nywiɖe nɔ mɛɖe ŋgbeto xexeɛ mɛ nunya koɖo amɛbleble gbaliwo ji yí asɔ mí sɔ wa hwashi* nɔ agbetɔ kɔnuwo koɖo xexe lɔ susuwo o, ɖo xexe lɔ susuwo* yí kplɔkɔ wo yí denyi Kristo susu yí kplɔkɔ wo o; 9 ɖo eyi mɛ yí Mawu jijɔwo ze le pleŋ. 10 Eyi ena yí ŋɖekɛ dehwedo mí o, eyɛ ci yí le eta nɔ acɛkpakpa koɖo egaɖuɖuwo pleŋ. 11 Ci mídodoɔ gbɛ koɖiɔ, woso vo nɔ míwo can yí denyi alɔ̀ yí wosɔ sui nɔ mí o, woɖe nuvɔn gbaza lɔ swi nɔ mí yɔ, ahan yí wosonɔ vo nɔ mɛ ciwo yí nyi Kristo tɔ nɛ. 12 Ðo woɖyi mí koɖi ci míwa ʒinʒindoshimɛ yitɔ han. Eyi ci mídodoɔ gbɛ koɖiɔ, wofɔn míwo can so ku koɖi ci míkando enujiŋ ciwo Mawu wa ji, eyi fuin so amɛkukuwo mɛ.
13 Gbesɔwu hunnɔɔ, ci míku sa, ɖo mínyi agɔjetɔwo koɖo tɔtɔnɔwo can ɔ, Mawu fɔn mí do agbe koɖi. Ésɔ mìwo gɔjejewo pleŋ ke mì xomɛvutɔ, 14 eyi ecucu* ese ci yí wosɔ alɔ̀ ŋwlɛ swi, ese cɛ na yí wokpɔnɔ afɛnwo nɔ mì. Éɖi swi ci ekin do efuntrenamɛci* lɔ nu. 15 Éto efuntrenamɛci* lɔ ji yí klo nu so acɛkpakpawo koɖo egawo ji yí dasɛ wo le jugbaja keŋ nɔ woakpɔ mɔ woɖu wo ji yí kplɔ wo vayikɔ shigbe mɛ ciwo yí wolé le ahwagbemɛ nɛ.
16 Eyi taɖo míŋgbelɔn nɔ mɛɖe aɖo kojo nɔ mí so enu ci míɖukɔ koɖo enu ci mínukɔ nu o, míŋgbelɔn nɔ woaɖo kojo nɔ mí so exwe ɖe ci míɖukɔ alo wleci yoyu alo sabati nu o. 17 Enu cɛwo nyi kpɔli nɔ enu ciwo yí gbɔkɔ, vɔ enuŋtɔŋtɔ lɔ yí nyi Kristo. 18 Míŋgbelɔn nɔ mɛ ci yí amɛɖekisɔsɔhwe ayemɛtɔ koɖo mawudɔlawo sɛnsɛn jɔnɔ ji nɔ axɔ míwo fɛncu le mí shi o, enu ciwo ekpɔ ɖekɛ ji “ehlanɔ do.”* Agbetɔ susu dɔ yí egangannɔ yiɖeki gbali. 19 Dekunɔ do Kristo ci yí nyi eta nɔ mì nu o, Kristo yí trɔgbɔ nyi mɛ ci yí nanɔ ŋɖuɖu ci yí ʒan lankpu lɔ pleŋ nɔ awa ɖaŋ awanɔ dɔ nywiɖe shigbe lé kpexukpexuwo koɖo lanmɛkanwo dɔ yí lankpu lɔ wa ɖaŋ wanɔ dɔ doju nɛ yí eshinnɔ shigbe lé Mawu ŋtɔ ji do nɛ.
20 Ci míku koɖo Kristo yí gbe xexe lɔ susuwo* ɖe, nyi yí taɖo míkpɔtɔ nɔkɔ agbe shigbe mɔ mígbenyi xexe lɔ tɔ nɛ yí wakɔ do ese ciwo yí nyi: 21 “Ŋgbesɔɛ o, ŋgbetɔ aɖe yi o, ŋgbetɔ alɔ̀ yi o” jiɔ? 22 Enu ciwo pleŋ avayi nɔ wozanzan wo nu yí ese cɛwo kuso, wonyi agbetɔwo sewo koɖo wowo nukplakplawo. 23 Ci enu cɛwo zenɔ shigbe nunya le wo mɛ nɛ yí nyi sɛnsɛn gbɛmu ci amɛ ŋtɔ ɖo nɔ yiɖeki yí tonɔ amɛɖekisɔsɔhwe ayemɛtɔ ji yí wanɔ enuvevi koɖo lankpu lɔ can ɔ, wodekpenɔdo amɛ nu yí woɖunɔ gbaza lɔ drowo ji o.