Wema Ŋkɔtɔ ci Woŋwlɛ Ðaɖa Tɛsalonikitɔwo
2 Nɔviwo, míwoŋtɔwo mínya nywiɖe mɔ ci mìva mí gbɔɔ, denyi gbali o. 2 Ðo ci mìkpe fun ŋkɔtɔ yí wodo ŋkpɛn mì le Filipi shigbe lé mínyi nɛ can ɔ, mìwo Mawu kpedo mì nu yí mìgbe dɔn* yí nu eŋɛnywi yitɔ lɔ nɔ mí ci wofɔn gu do mì ji sugbɔ* can. 3 Enu ci mìnukɔ nɔ mí mɔ míwo le wa denyi ŋsu nyɔ, susu vɔn alo amɛbleble nyɔ ɖe o. 4 Vɔ ci mìwo nu kpe nɔ Mawu ɔ, ésɔ eŋɛnywi lɔ jo nɔ mì. Eyi taɖo mìdexokɔ nuxu keŋ nɔ mìwo nu ajɔ ji nɔ agbetɔwo o, vɔ mìwɛkɔ keŋ nɔ mìwo nu ajɔ ji nɔ Mawu, eyi glonɔ mìwo jiwo mɛ kpɔ.
5 Le nyɔnɔnwi mɛɔ, mínya mɔ mìdexo awo nɔ mí kpɔ alo ŋɖe ci ŋmɛ nɔ mì kpɔ yí mìkan ŋsu yí xɔɛ le mí shi o; Mawu ŋtɔ nya mɔ nyɔnɔnwi yɔ! 6 Ahanke mìdejijiɛ kanfukanfu agbetɔwo tɔ o, mìdeji kanfukanfu so mí gbɔ alo mɛbuwo gbɔ o; ci mìnyi apotru Kristo tɔwoɔ, mìhɛn mìanyi agban kpɛnkpin nɔ mí sa dru. 7 Vɔ mìwanɔ nu do mí nu koɖo xomɛfafa shigbe lé vinɔ lenɔ bu nɔ* eviɛwo nywiɖe nɛ. 8 Eyi taɖo ci mìlɔn mí sugbɔɔ, mìɖui mɔ* denyi eŋɛnywi Mawu tɔ lɔ ɖekɛ yí mìanu nɔ mí o, vɔ mìasɔ mìwo gbewo* jo do ta nɔ mí hɛnnɛ, ɖo mívatrɔ amɛveviwo nɔ mì.
9 Nɔviwo, kankandoji li mɔ míɖonɔ ŋwi edɔ ciwo mìwa koɖo egbla ciwo mìdo. Mìwanɔ dɔ ezan koɖo kede hwenu mìdradra Mawu ŋɛnywi lɔ nɔ mí, ɖo mìdeji mɔ mìanyi agban nɔ mɛɖe le mí mɛ o. 10 Hwenu yí mìle koɖo míwo xɔsetɔwoɔ, mìnɔ gbeji yí wanɔ enujɔjɔɛ yí afɛn ɖekɛ dele mìwo nuwanawo mɛ o, míwoŋtɔwo mínya mɔ nyɔnɔnwi yɔ yí Mawu can nya ahan. 11 Mínya nywiɖe mɔ mìkpɔtɔ kplanɔ nu mí yí fanɔ akɔn nɔ mí yí xonɔ nuxu nɔ mɛɖekaɖeka le mí mɛ shigbe lé vida xonɔ nuxu nɔ eviɛwo nɛ, 12 keŋ nɔ míakpɔtɔ anɔkɔ agbe shigbe lé Mawu ji do nɛ, eyɛ ci yí yɔ mí va yi Fyɔɖuxu lɔ koɖo kanfukanfu yitɔ mɛ.
13 Le nyɔnɔnwi mɛɔ, eyi taɖo mìdokɔ akpe nɔ Mawu hɛnnɛ mamimami, ɖo hwenu míse Mawu nyɔ ci mìnu nɔ míɔ, mídexɔɛ shigbe agbetɔwo nyɔ nɛ o, vɔ míxɔɛ shigbe enu ci enyi nyɔnɔnwimɛtɔ nɛ, ényi Mawu nyɔ ci yí le edɔ wakɔ hɛnnɛ le míwo xɔsetɔwo mɛ. 14 Nɔviwo, Mawu hamɛ ciwo yí nyi Kristo Yesu tɔ yí le Ʒude tɔ han yí mívawakɔ, ɖo míkpe fun le míwoŋtɔwo jumɛtɔwo lɔ̀ mɛ shigbe lé wowo can kpe fun le alɔ̀ mɛ nɔ Ʒuifuwo nɛ. 15 Ʒuifu cɛwo yí wu Axwetɔ Yesu koɖo enyɔnuɖɛtɔwo yí ci yumɛ nɔ mì. Gbesɔwu hunnɔɔ, wowo nu dekpenɔ nɔ Mawu o yí wodejinɔ nyɔna nɔ mɛɖekɛ o. 16 Wotekpɔ keŋ agbe nɔ mì nɔ mìŋgbenu enyɔ lɔ nɔ jukɔn bu mɛ tɔwo nɔ woakpɔ hwlɛngan o. Ci wowɛkɔ ahan ɔ, wowo nuvɔnwo fɔn yí sukɔgbɔ doji. Vɔ Mawu dɔmɛzi lɔ ava wo ji le vɔvɔnu.
17 Nɔviwo, ci mìso le mí gbɔ* yɛ dejinjin can ɔ, (mìdele mí gbɔ ŋtɔŋtɔ o, vɔ míwo nu le eji mɛ nɔ mì) mìdo gblawo pleŋ keŋ akpɔ mí ŋmɛŋmɛ, ɖo míwo kpɔkpɔ drodroɔ mì keke. 18 Ecɛ yí dɔ taɖo mìji mɔ mìava mí gbɔ, ɛɛ, enyɛ Pɔlu, ŋtikpɔ mɔ nava mí gbɔ, denyi zeɖeka o, vɔ zeve blebu, gan yí Satana cu emɔ nɔ mì. 19 Le mìwo Xwetɔ Yesu vava hwenu ɖe, nyi yí anyi emɔkpɔkpɔ alo jijɔ alo ejiɖuɖukuku ci yí mìasɔ yi go le ŋkɔ niɔ? Denyi míwo yɔ ba? 20 Míwo yí nyi kanfukanfu koɖo jijɔ mìwotɔ nyao.