Wema ci Woŋwlɛ Ðaɖa Kolosetɔwo
1 Enyɛ Pɔlu, ŋnyi apotru Kristo Yesu tɔ to edro Mawu tɔ ji, nyɛ koɖo mìwo nɔvi Timɔte 2 yí ŋwlɛkɔ wema cɛ ɖaɖa amɛkɔkɔɛwo koɖo Kristo dokplɔtɔ egbejinɔtɔ ciwo yí le Kolose:
Mawu ci yí nyi mìwo Da le wa xomɛvu gangan nɔ mí yí agbena fafa mí.
3 Gashiagamɛɔ, mìdonɔ akpe nɔ Mawu ci yí nyi Eda nɔ mìwo Xwetɔ Yesu Kristo nɔ mìdokɔ gbe ɖaɖa do ta nɔ mí 4 ci mìse xɔse ci míɖo do Kristo Yesu nu koɖo lé mílɔn amɛkɔkɔɛ lɔwo pleŋ do, 5 ɖo míkpɔkɔ emɔ nɔ enu ci wodra do ɖɛ nɔ mí le jeŋkwi mɛ. Míse enyɔ so emɔkpɔkpɔ cɛ nu hwenu wonu nyɔnɔnwi ci yí le eŋɛnywi lɔ mɛ ŋɛdu nɔ mí 6 yí mísi. Shigbe lé eŋɛnywi lɔ sɛnkɔ eku yí kakakɔ do xexe lɔ pleŋ mɛ nɛɔ, ahanke ewawa le míwo can mɛ so gbecigbe mísi hɛnnɛ nɛ yí míjeshi xomɛvu gangan Mawu tɔ ci yí le nyɔnɔnwi lɔ mɛ kitokito. 7 Eyi lɔ yí míkpla le Epafrasi gbɔ, ényi mìwo xlɔ vevi koɖo edɔwatɔ egbejinɔtɔ ci yí nyi hwashi nɔ Kristo do mìwo dumɛ. 8 Énu lɔnlɔn ci yí gbɔngbɔn kɔkɔɛ lɔ kpedo mí nu yí míɖo nyɔ nɔ mì hɛnnɛ.
9 Eyi taɖo so gbecigbe mìsiɔ, mìdemi egbe dodo ɖa do ta nɔ mí gbeɖe o. Mìkpɔtɔ biɔbiɔ Mawu mɔ yɛ le wɛ nɔ míawa ɖaŋ ajeshi edro yitɔ yí aɖo nunya adodwi koɖo enugɔnmɛsese ci gbɔngbɔn lɔ nanɔ. 10 Eyi míawakɔ enu ci yí jenɔ Yehowa* tɔ ji keŋ nɔ míwo nu akpe ni keŋkeŋ ci míkpɔtɔ yí sɛnsɛn eku le edɔ nywi ɖekpokpui ci míwakɔ mɛ yí gbewa ɖaŋ jejeɛshi Mawu ɖɛ nywiɖe doji. 11 Mìbiɔkɔ Mawu hɛnnɛ mɔ yɛ le zan yi ŋsɛn gangan lɔ yí asɔ do ŋsɛnwo pleŋ mí keŋ nɔ míatɛnŋ asɔ ʒinxododo koɖo jijɔ asɔ do ji keŋkeŋ 12 ci míle akpe dokɔ nɔ Eda ci yí wɛ yí mísun ji yí aɖu cinɔ koɖo amɛkɔkɔɛ ciwo yí le klɛnklɛn mɛ.
13 Éhwlɛn mì ti le acɛ vinvin tɔ mɛ yí sɔ mì ɖaɖa Eviɛ vevi fyɔɖuxu lɔ mɛ. 14 Eviɛ cɛ ji woto yí hwlɛn mì gan to tafɛn lɔ ji yí sɔ mìwo nuvɔnwo ke mì. 15 Eyi nyi Mawu ci wodekpɔnɔ lɔ nɔnɔmɛ, evi ŋkɔtɔ nɔ enuwawawo pleŋ; 16 ɖo eyɛ ji woto yí wa enu kpɛtɛ ciwo pleŋ yí le jeŋkwi mɛ koɖo nyigban ji, enu ciwo wokpɔnɔ koɖo enu ciwo wodekpɔnɔ o, étɛnŋ nyi mɛ ciwo yí le efyɔʒinkpinwo ji alo mɛ ciwo yí nyi axwetɔwo, acɛkpakpawo alo egawo. Wowa enu kpɛtɛwo pleŋ to eyɛ ji yí wa wo pleŋ ni. 17 Éli doŋkɔ nɔ enu kpɛtɛwo pleŋ hɛnnɛ; eyi to yɛ jiɔ, enu kpɛtɛwo pleŋ vali. 18 Eyi nyi eta nɔ lankpu lɔ ci yí nyi hamɛ lɔ, eyi nyi tɔtɔmɛ yí nyi amɛ ŋkɔtɔ ci yí wofɔn so amɛkukuwo mɛ keŋ nɔ atɛnŋ anyi amɛ ŋkɔtɔ le enuwo pleŋ mɛ; 19 ɖo jijɔ enyi nɔ Mawu mɔ, yeawɛ keŋ nɔ enuwo pleŋ asɔgbe le eyɛ mɛ vɛ. 20 Eyɛ ji yí Mawu to yí wakɔ fafa koɖo enu ciwo pleŋ yí le jeŋkwi mɛ koɖo nyigban ji, ehun ci yí ekɔ ɖɛ do efuntrenamɛci* lɔ nu ji yí eto yí tɛnŋ yí wakɔ fafa cɛ.
21 Le nyɔnɔnwi mɛɔ, míwo can míle azɔge nɔ Mawu sa, mínyi yi ketɔnɔwo, ɖo enuvwinwo ɖekɛ yí míbunɔ kpɔ sa. 22 Vɔ ecɛyɛɔ, édra gblamɛ do nɔ míwo koɖo yɛ to amɛ ŋtɔ́ ku ci eku ji keŋ nɔ míatɛnŋ anyi amɛkɔkɔɛwo, mɛ ciwo nu afɛn ɖe dele o koɖo mɛ ciwo wodedo hwɛ ɖe o le ŋkɔ ni. 23 Le nyɔnɔnwi mɛɔ, ele mɔ míakpɔtɔ anɔ xɔse lɔ mɛ yí alo do gogwiɖe.* Míŋgbelɔn nɔ ŋɖekɛ axɔ eŋɛnywi cɛ ci míse mɔkpɔkpɔ lɔ le mí shi o, woɖe kunu so eŋɛnywi cɛ nu nɔ enuwawawo pleŋ le xexeɛ keŋkeŋ mɛ. Enyɛ Pɔlu, ŋvanyi edɔwavi nɔ eŋɛnywi lɔ.
24 Ecɛyɛɔ, eji jɔkɔŋ le efun ciwo ŋkpekɔ do ta nɔ mí mɛ, eyi ŋnya mɔ ŋɖo akpɔtɔ akpekpeɛ fun nɔ Kristo do yi lankpu ci yí nyi hamɛ lɔ ŋci. 25 Ŋle edɔ wakɔ nɔ hamɛ lɔ sɔgbe koɖo edɔ ci Mawu ɖo nɔŋ do míwo nyɔna ŋci, ecɛ yí dɔ taɖo ŋle Mawu nyɔ lɔ drakɔ koɖo eji pleŋ. 26 Wosɔ enyɔwlawla kɔkɔɛ lɔ sɔ wla so gbeɖegbe yí wlɛ do mɛ ciwo yí ni vayi sa xoxoxo. Vɔ ecɛyɛɔ, wovanui nɔ yi mɛkɔkɔɛwo. 27 Jijɔ enyi nɔ Mawu mɔ yeawɛ nɔ woajeshi dɔkunu gangan cɛ le jukɔnwo mɛ, eyi nyi enyɔwlawla kɔkɔɛ yitɔ lɔ, enyɔwlawla cɛ yí nyi mɔ Kristo anɔ ɖekɛ koɖo mí yí míale emɔ kpɔkɔ mɔ yewoaxɔ kanfukanfu ɖekɛ lɔ koɖi. 28 Eyi nyi mɛ ci nyɔ mìnunuɔ nɔ amɛwo, mìkankanxle amɛwo pleŋ yí kplakpla nu wo le ŋɖɛnyanyawo keŋkeŋ mɛ keŋ nɔ mìatɛnŋ akpedo mɛɖekpokpui ci yí nyi Kristo dokplɔtɔ nu nɔ ashin le gbɔngbɔn mɛ yí mìadasɛ yi nɔ Mawu. 29 Ecɛ yí dɔ taɖo ŋle edɔ wakɔ sɛnsinɖe yí kpɔtɔ le egbla ji to yi ŋsɛn ci enanaŋ ji.