Wema Ŋkɔtɔ ci Woŋwlɛ Ðaɖa Timɔte
6 Mɛ ciwo yí nyi hwashiwo le kpɔtɔ aɖonɔ bubu gangan nɔ wowo xwetɔwo keŋ nɔ amɛwo ŋgbevanu enyɔvɔn ɖe so Mawu ŋkɔ lɔ koɖo yi nukplakpla nu gbeɖe o. 2 Nɛnɛke mɛ ciwo yí wowo xwetɔwo nyi xɔsetɔwo deɖo amɔ ci wonyi nɔviwo taɖo yewoagbe bubumaɖo nɔ wo o, vɔ woɖo ale gbesɔsɔ sɔwu yí awa dɔ nɔ wo, ɖo xɔsetɔwo koɖo amɛveviwo yí kpɔkɔ nyɔna le edɔ nywi ciwo yí wowakɔ mɛ.
Kpɔ̀tɔ akplakɔ enu cɛwo amɛwo yí adodoɔ ŋsɛn wo mɔ wo le wa do wo ji. 3 Nɔ mɛɖe le nubu kplakɔ amɛwo yí dexɔ gbe nɔ enukplamu adodwi* ci yí so mìwo Xwetɔ Yesu Kristo gbɔ alo enukplakpla ci yí sɔgbe koɖo lé woanɔ gbeji nɔ Mawu doɔ, 4 anyi egoyitɔ enyi yí demɔŋje ŋɖekɛ mɛ o. Fini woato adɔn nyɔ koɖo amɛwo yí awa vu do enyɔwo ji ɖekɛ yí xanɔ yɛ.* Ŋcɛwo hɛnnɔ ŋbia, evuwawa, eɖyixoamɛ,* enyɔvɔnbudoamɛnu vɛ. 5 Enu cɛwo na yí mɛ ciwo susu caka nɔ yí wodegbemɔŋje nyɔnɔnwi lɔ mɛ dɔnnɔ nyɔ gbɛmɛgbɛmɛ so enyɔgbaliwo nu, ele ci woakpɔ ɖekɛ yí dɔ yí wojinɔ mɔ yewoanɔ gbeji nɔ Mawu. 6 Le nyɔnɔnwi mɛɔ, nɔ enu ci yí le amɛ shi jeŋ nɔ amɛ yí wole gbeji nɔ Mawu gbɔxwe yí ele gangan tonɔ so mɛ. 7 Ðo mìdehɛn ŋɖe va xexe lɔ mɛ o, nɛnɛke mìdatɛnŋ asɔ ŋɖe le mɛ ahɛn yi nɛ. 8 Eyi taɖo, nɔ enu ci mìaɖu koɖo enu ci mìado* le mì shiɔ, wo le jeŋ nɔ mì.
9 Vɔ mɛ ciwo yí ɖui koŋ mɔ yewoanyi dɔkunɔwo jenɔ tetekpɔ koɖo fɛnca mɛ, woɖonɔ edromaɖota sugbɔ ciwo yí donɔ vevisese nɔ amɛ yí kplɔnɔ amɛ hɛn yi gugu koɖo eku mɛ yí ewanɔ nu koɖo wo. 10 Ðo eho lɔnlɔn yí nyi eke nɔ enudɔndɔnwawa alɔkpa ɖekpokpui; eyi ci mɛɖewo lɔn ehoɔ, wotrɔ gbeɖe xɔse lɔ ɖɛ yí sɔ vevisese sugbɔ sɔ trɔn wowoɖekiwo kpeɖekpeɖe.
11 Vɔ eo ci yí nyi Mawu mɛɔ, shì nɔ enu ŋtɔ́wo yí ado afɔ nɔ enujɔjɔɛwawa, egbejinɔnɔ nɔ Mawu, xɔse, lɔnlɔn, ejidodo koɖo xomɛfafa. 12 Wà xɔse hwa nywi lɔ; nà nɔ agbe mavɔ ci woyɔ eo nɔ mɔkpɔkpɔ lɔ asɛnŋ le eo mɛ, emɔkpɔkpɔ cɛ nu yí èxo nuxu nywi so le jugbaja le ŋkɔ nɔ kunuɖetɔ sugbɔ.
13 Le ŋkɔ nɔ Mawu ci yí na yí enuwo pleŋ kpɔtɔ le agbe koɖo Kristo Yesu ci yí wa ɖaŋ ɖe kunu le jugbaja le ŋkɔ nɔ Pɔnsi Pilati ɔ, ŋnukɔ nɔ eo mɔ, 14 eo le kpɔtɔ awakɔ do ese lɔ ji yí wodakpɔ afɛn ɖe alo nyɔ ɖe anu so eo nu keke ana nɔ hwenu woadasɛ mìwo Xwetɔ Yesu Kristo o, 15 mɛ ci yí jijɔtɔ koɖo Ŋsɛntɔnɔ Gangantɔ lɔ adasɛ le gamɛ ci yiŋtɔ ɖo ɖɛ ji. Eyi nyi Efyɔ nɔ efyɔwo yí gbenyi Axwetɔ nɔ axwetɔwo, 16 mɛ ci ɖekɛ kpaŋ yí dekunɔ o, énɔnɔ klɛnklɛn ci wodatɛnŋ agbosɔ mɛ, mɛɖe dekpɔɛ kpɔ o yí wodatɛnŋ akpɔɛ kpɔ hɛnnɛ o. Kanfukanfu koɖo ŋsɛn mavɔ anyi yitɔ. Amɛn.
17 Kplà nu mɛ ciwo yí nyi dɔkunɔwo le xexe* cɛ mɛ mɔ woŋgbegangannɔ wowoɖekiwo* yí aɖoɖoɔŋ do dɔkunu ciwo ji wodatɛnŋ akando nu o, vɔ wo le ɖoŋ do Mawu ci yí na enuwo pleŋ mì xomɛvutɔ nu. 18 Nù nɔ wo mɔ wo le wanɔ nunywi, anyi dɔkunɔwo le enywiwawa mɛ, anyi xomɛvunɔwo yí ale gbesɔsɔ amanɔ wowo nuwo koɖo amɛwo. 19 Nɔ wowɛkɔ ahan ɔ, woawa ɖaŋ abɔkɔ dɔkunuwo ɖɛ nɔ wowoɖekiwo yí anyi gɔnmɛɖokpe nywi nɔ esɔ mɛ keŋ nɔ agbe adodwi mɔkpɔkpɔ lɔ asɛnŋ le wo mɛ.
20 Timɔte, wà ɖaŋ ale bu nɔ enu ci wosɔ do ashi nɔ eo, ŋgbeɖonɔ to enyɔgbali ciwo yí xonɔ ɖyi enukɔkɔɛwo o. Ahanke ŋgbeɖonɔ to mɛ ciwo yí nunɔ mɔ “yewonya ŋɖɛ” gan yí wowo nyɔwo trɔkpe nyɔnɔnwi lɔ o. 21 Ci mɛɖewo ji mɔ yewoadasɛ mɔ yewonya ŋɖɛ ahantɔɔ, woklan gbeɖe xɔse lɔ ɖɛ.
Mawu le wa xomɛvu gangan nɔ mí.