Wema Amɛvetɔ ci Piɛ Ŋwlɛ
3 Amɛveviwo, ecɛ yí nyi wema amɛvetɔ ci ŋŋwlɛkɔ ɖaɖa mí yí aɖo ŋwi enuwo nɔ mí keŋ asɔ do ŋsɛn míwo susuwo nɔ woakpɔtɔ ale te shigbe lé ŋwɛ le wema ŋkɔtɔ mɛ nɛ 2 keŋ nɔ míaɖonɔ ŋwi enyɔ ciwo yí enyɔnuɖɛtɔ kɔkɔɛwo nu vayi* koɖo ese ci yí Axwetɔ lɔ koɖo Hwlɛngantɔ lɔ do to apotru míwotɔwo ji. 3 Ŋkɔŋkɔtɔɔ, mínya mɔ le ŋkeke kpɛtɛkpɛtɛwo mɛɔ, amɛkotɔwo ava koɖo amɛkoko nyɔ wowotɔwo yí awakɔ enu ciwo yí dro wo 4 yí anukɔ mɔ: “Ci woɖo gbe mɔ yɛatrɔ agbɔ ɖe, fini eleɔ? So hwenu mìwo tɔgbiwo kuɔ, enuwo pleŋ gbekpɔtɔ le ahan pɛpɛpɛ shigbe lé wole so gɔnmɛjeje nɔ enuwawawo nɛ.”
5 Ðo wowoŋtɔwo xa ɖui yí gbe mɔ yewodanya mɔ jeŋkwiwo li xoxoxo yí nyigban to so eshi mɛ yí lo do gogwiɖe le dodomɛ nɔ eshi lɔ to enyɔ ci Mawu nu ji o. 6 Eyi ŋcɛwo ji woto yí gu xexe lɔ hwenɔnu ci wona yí eshi xɔ nyigban lɔ. 7 Vɔ enyɔ ɖekɛ lɔ ji woto yí gbe jeŋkwi koɖo nyigban ciwo yí li yɛ ɖɛ nɔ ezo yí woakpɔtɔ ani keke aje ŋkeke ci ji woaɖo kojo le yí agu amɛmavɔnmawuwo.
8 Gan amɛveviwo, míŋgbeŋlɔbe enyɔ cɛ o, ŋkeke kuɖeka le Yehowa* gbɔ le shigbe exwe kotokun ɖeka nɛ yí exwe kotokun ɖeka le shigbe ŋkeke kuɖeka nɛ. 9 Yehowa* dedɔndɔn gamɛ le wawa do egbe ci eɖo ji mɛ shigbe lé mɛɖewo buikɔ do nɛ o, vɔ égbɔnkɔ ji ɖɛ nɔ mí, ɖo dejijiɛ mɔ mɛɖekɛ agu o, vɔ éjijiɛ mɔ mɛshiamɛ atrɔ ji mɛ. 10 Vɔ Yehowa* ŋkeke lɔ ava shigbe flafinɔ nɛ; le ŋkeke ŋtɔ́ jiɔ, jeŋkwiwo avayi koɖo egbeɖyiɖyi sɛnŋsɛnŋ,* gan enu ciwo yí xɔ zo gbogbogbo alolo, eyi nyigban lɔ koɖo edɔ ciwo yí wowa le ji aci dandanŋgbe.
11 Ci enu cɛwo pleŋ alolo ahan ɔ, míbunɔ mɛ ci ŋmɛ míɖo anyi kpɔ yí anɔnɔ agbe mɛmi yí agbewanɔ enu ciwo yí adɔ míanɔ gbeji nɔ Mawu. 12 Míanɔkɔ te kpɔ Yehowa* ŋkeke lɔ vava hɛnnɛ, le kpɔtɔ anɔ susu mɛ nɔ mí truɖuɖuɖu; le ŋkeke ŋtɔ́ jiɔ, woagu jeŋkwiwo le ezojejewo mɛ yí woalolo enuwo le ezoxɔxɔ gangan mɛ. 13 Vɔ mìnɔkɔ te kpɔ egbe ci eɖo mɔ yeawa jeŋkwi yoyu koɖo nyigban yoyu ciwo mɛ woawanɔ enujɔjɔɛ le.
14 Eyi taɖo amɛveviwo, ci mínɔkɔ te kpɔ enu cɛwoɔ, míje agbla keke nɔ le vɔvɔnuɔ, akpɔ mí mɔ eɖyi koɖo afɛn ɖe dele mí nu o yí míle fafa mɛ. 15 Nɛnɛkeɔ, míkpɔ jigbɔnɖɛxɔxɔ mìwo Xwetɔ lɔ tɔ mɔ yɛnyi hwlɛngan shigbe lé mìwo nɔvi vevi Pɔlu can ŋwli ɖaɖa mí sɔgbe koɖo nunya ci woni nɛ. 16 Éxo nuxu so enu cɛwo nu le yi wemawo pleŋ mɛ, vɔ ŋɖewo gɔnmɛ sese gbɔnnu le wo mɛ. Eyi mɛ ciwo yí denya ŋɖe o* koɖo mɛ ciwo yí delo do le xɔse lɔ mɛ trokɔ fi ŋcɛwo shigbe lé wowɛkɔ nɔ Enuŋwlɛŋwlɛ lɔ kpaxwe kpɛtɛwo can nɛ yí sɔ dradra gugu wowotɔ do ɖɛ.
17 Eyi taɖo amɛveviwo, ci mínya enu cɛ doŋkɔɔ, mínya wawa keŋ nɔ afɛn ci esejimawatɔwo wakɔ ŋgbena míabu emɔ yí ecɛ adɔ mídagbenɔ te gogwiɖe o.* 18 Vɔ míje agbla keŋ nɔ mìwo Xwetɔ koɖo Hwlɛngantɔ Yesu Kristo awakɔ xomɛvu gangan nɔ mí doji yí míagbejejeɛshi ɖɛ doji. Woakanfui so kakacɛ keke asɔyi mavɔmavɔ. Amɛn.