Wema Amɛvetɔ ci Piɛ Ŋwlɛ
1 Enyɛ Simɔ Piɛ ci yí nyi hwashi koɖo apotru Yesu Kristo tɔ yí ŋwlɛkɔ wema cɛ ɖaɖa mɛ ciwo yí ɖo xɔse adodwi shigbe mìwo ke nɛ to enujɔjɔɛwawa mìwo Mawu koɖo Hwlɛngantɔ Yesu Kristo tɔ ji.
2 Mawu le wa xomɛvu gangan nɔ mí doji yí agbena fafa sugbɔ mí ci míwa ɖaŋ jeshi yɛ koɖo mìwo Xwetɔ Yesu ɖɛ nywiɖe. 3 Ðo Mawu ŋsɛn sɔ enu ciwo pleŋ yí dɔ mìnɔnɔ agbe yí gbenɔnɔ gbeji nɔ Mawu na mì* ci mìvawa ɖaŋ jeshi mɛ ci yí yɔ mì to kanfukanfu yiŋtɔ tɔ koɖo jijɔ nywi yitɔ ji. 4 Éto enu cɛwo ji yí sɔ gbeɖu vevi ganganwo na mì.* Eyi to gbeɖu cɛwo jiɔ, míatɛnŋ aɖo Mawu nɔnɔmɛ han ci míshi nɔ enudɔndɔn xexe lɔ tɔ ci yí edro vɔn* na yí wowanɔ.
5 Susu cɛ koŋ yí dɔ taɖo míaje agbla veviɖe nɔ nɔnɔmɛ nywi abɔdo xɔse míwotɔ nu, enumɛmɔŋje abɔdo nɔnɔmɛ nywi míwotɔ nu, 6 amɛɖekileledomɛ abɔdo enumɛmɔŋje míwotɔ nu, ejidodo abɔdo amɛɖekileledomɛ míwotɔ nu, egbejinɔnɔ nɔ Mawu abɔdo ejidodo míwotɔ nu, 7 nɔvilɔnlɔn abɔdo egbejinɔnɔ nɔ Mawu míwotɔ nu yí lɔnlɔn abɔdo nɔvilɔnlɔn míwotɔ nu. 8 Ðo nɔ enu cɛwo le mí mɛ yí wugan ɔ, woana yí mídavanyi mɛ ciwo yí gbɔjɔ alo mɛ ciwo yí desɛnnɔ ku sɔgbe koɖo enu ci mɛ míwa ɖaŋ mɔŋje kuso mìwo Xwetɔ Yesu Kristo nu o.
9 Ðo mɛɖekpokpui ci mɛ enu cɛwo dele nyi ŋkuvitɔnnɔ. Éŋwla yi ŋkuviwo keŋ nɔ ŋgbekpɔ klɛnklɛn o* yí ŋlɔbe lé woklɔ nuvɔn ciwo ewa vayi swi do. 10 Eyi taɖo nɔviwo, mído egblawo pleŋ keŋ ana yí kankandoji ale yɔyɔ ci woyɔ mí koɖo cancan ci wocan mí nu; ɖo nɔ míkpɔtɔ wakɔ enu cɛwoɔ, mídaklɛn afɔ gbeɖe o. 11 Le nyɔnɔnwi mɛ nɔ míwɛkɔ ahan ɔ, shicu gangan anyi nɔ mí yí míaɖo mìwo Xwetɔ koɖo Hwlɛngantɔ Yesu Kristo Fyɔɖuxu mavɔ lɔ mɛ.*
12 Ecɛ yí dɔ taɖo ŋɖui mɔ, naɖonɔ ŋwi enu cɛwo nɔ mí gashiagamɛ ci míjeshi wo yí lo do le nyɔnɔnwi ci mɛ míle yɛ mɛ can. 13 Vɔ ŋkpɔ mɔ ényɔ mɔ ci ŋkpɔtɔ le avɔnzava* cɛ mɛ duuɔ, naɖokɔ ŋwi enuwo nɔ mí keŋ asɔ dokɔ ŋsɛn mí. 14 Ðo ŋnya mɔ woaɖe avɔnzava anyitɔ lɔ swi sabaɖe yɛ shigbe lé mìwo Xwetɔ Yesu Kristo can dasɛ yi nɔŋ petii nɛ. 15 Nawanɔ enu ciwo ji ŋkpe gashiagamɛ keŋ nɔ ŋdevaliɔ, míasun ji aɖonɔ ŋwi enu cɛwo nɔ míwoɖekiwo.
16 Denyi druvi nyɔ ciwo yí wowa ɖaŋ kpa yí mìsɔ nu ŋsɛn koɖo trɔtrɔgbɔ mìwo Xwetɔ Yesu Kristo tɔ nyɔ nɔ mí o, vɔ mìwoŋtɔwo yí kpɔ kanfukanfu yitɔ. 17 Ðo Mawu Eda na bubu koɖo kanfukanfu yi hwenu enu enyɔ cɛwo ni le kanfukanfu gangan mɛ mɔ: “Mɛ cɛ yí nyi anyi Vi ci kɔ ŋdelɔnnɔ nu le o, yi nu kpenɔ nɔŋ.” 18 Ɛɛ, mìse enyɔ cɛwo so jeŋkwi mɛ hwenu mìle koɖi le eto kɔkɔɛ lɔ ji.
19 Eyi taɖo, mìvakando enyɔnuɖɛ nyɔ lɔ ji sɔwu yí míwɛkɔ nywiɖe ci míleleɛ ŋkuvi do nu shigbe kaɖigban ci yí klɛnklɛn le vinvin mɛ le míwo jiwo mɛ nɛ (keke ana nɔ hwenu eŋ ake yí wlecivi nyidin tɔ ato). 20 Ðo mínya ecɛ doŋkɔ mɔ enyɔnuɖɛ ɖekɛ dele Enuŋwlɛŋwlɛ lɔ mɛ yí nyi amɛ ŋtɔ susu o. 21 Ðo agbetɔ denu enyɔ ɖɛ kpɔ le yiŋtɔ dro mɛ o, vɔ gbɔngbɔn kɔkɔɛ yí na* yí agbetɔwo nu Mawu nyɔ ɖɛ.