Wema Amɛvetɔ ci Piɛ Ŋwlɛ
2 Vɔ enyɔnuɖɛtɔ ŋsukantɔwo nɔ jukɔn lɔ mɛ kpɔ shigbe lé ŋsunukplamɛtɔwo can ale mí mɛ nɛ. Mɛ cɛwo aɖoɖoɔ sɛnsɛn bu ciwo yí danahɛn nu le bebemɛ, eyi woagbe mɛ ci yí xwle wo* ŋtɔkpu. Wowo nuwana ŋtɔ́ adɔ yí woagu wo swi kaba. 2 Nɛnɛke amɛ sugbɔ akplɔ wo do yí ashin ŋta ale enudɔndɔn wakɔ* wowotɔ han, eyi woadɔ yí amɛwo axo nuxu vɔn so nyɔnɔnwi mɔ lɔ nu. 3 Eyi ŋbia adɔ yí woakpa enyɔwo asɔ tafu mí. Vɔ woɖo kojo nɔ wo daɖɛ xoxoxo, daji gamɛ o, eyi woagu dandandan.
4 Le nyɔnɔnwi mɛɔ, Mawu degbe eto madɔn nɔ mawudɔla ciwo yí wa nuvɔn o, vɔ ésɔ wo dɔŋkpe do tataro* mɛ, édo awlɛga wo do vinvin ciɖiciɖi mɛ yí kojoɖoɖo le te kpɔ wo. 5 Nɛnɛke, degbe eto madɔn nɔ xexe ci yí ni sa o, vɔ éhwlɛn Nowe ci yí nyi enujɔjɔɛwawa nyɔdratɔ gan sɔ kpe nɔ amɛ amadrɛ buwo hwenu ehɛn eshiɖɔɖɔ va amɛmavɔnmawuwo xexe lɔ ji. 6 Édo hwɛ Sodomu koɖo Gomora juwo ci esɔ wo trɔ afi yí sɔ na kpɔwɛ amɛmavɔnmawuwo so enu ciwo yí avava nu. 7 Eyi ehwlɛn amɛjɔjɔɛ Lɔti gan. Ci esejimawatɔwo shin ŋta yí le enudɔndɔn wakɔɔ,* éɖe fun nɔ Lɔti sugbɔ. 8 Ðo dada le ese ji nuwana ciwo yí amɛjɔjɔɛ cɛ kpɔkɔ yí gbesekɔ gbeɖeka duu hwenu ele wo mɛ dokɔ agbeya nɔ ese* jɔjɔɛ yitɔ. 9 Eyi taɖo, Yehowa* nya lé ahwlɛn mɛ ciwo yí nɔnɔ gbeji ni gan le tetekpɔwo mɛ do, vɔ égbenɔ enumajɔmajɔwatɔwo ɖɛ yí avagu wo swi le kojoɖogbe, 10 taŋtaŋ mɛ ciwo yí xonɔ ɖyi gbaza nɔ mɛbuwo yí wodebunɔ egawo o.*
Eji tri nɔ wo yí woshinnɔ ŋta, nuxu dɔndɔnwo xoxo so mɛ ciwo yí wokanfu nu desonɔ jika nɔ wo o. 11 Gan ci mawudɔlawo ɖo acɛ koɖo ŋsɛn sugbɔ can ɔ, bubu ci woɖo nɔ* Yehowa* dɔ yí wodexonɔ nuxu vɔnwo yí asɔ do hwɛ wo o. 12 Vɔ mɛ cɛwo le shigbe elan manyaŋɖɛ ciwo yí wanɔ nu shigbe lé wowa wo do nɛ. Woji wo keŋ nɔ woalé wo yí awu wo, woxonɔ nuxu dɔndɔn so enu ci wodejeshi ɖɛ nu. Gugu mɔ ci ji wowoŋtɔwo le akplɔ wo yi gugu mɛ. 13 Enuvevi awa wo yí anyi emɔ vɔn ci ji wowoŋtɔwo le fɛncu nɔ wo.
Wokpɔnɔ agbeɖuɖu le kede mɛ ŋtɔkpu can mɔ yɛnyi jijɔnu. Wonyi amɛxoɖyixoɖyiwo koɖo mɛ ciwo nu afɛn le, éjɔnɔ ji nɔ wo sugbɔ mɔ yewoasɔ ŋsunukplakplawo blekɔ mí hwenu woɖukɔ agɔ koɖo mí. 14 Wowo ŋkuviwo ɖɔ koɖo hashiwawa, wodesun ji yí gbenɔ nuvwinwawa o, eyi woblenɔ mɛ* ciwo yí delo do le xɔse mɛ o. Ŋbia yí wosɔ kpla eji wowotɔwo. Evi ciwo yí wosɛn kpɛn nɔ yí wonyi. 15 Ci wotashi emɔ jɔjɔɛ lɔ ɖɛɔ, wobu emɔ. Balamu ci yí nyi Beɔ vi ci enudɔndɔnwawa fɛncu jɔnɔ ji nɔ fɔ ji yí woto. 16 Vɔ wodɔn to ni, ɖo yiŋtɔ gbe mɔ yedawa enu ci yí nyɔ o. Elan maxonuxu xo nuxu shigbe agbetɔ nɛ yí cu emɔ nɔ enyɔnuɖɛtɔ lɔ yí degbewa sukunu o.
17 Mɛ cɛwo le shigbe dotɔ ciwo mɛ eshi dele o koɖo ahun ciwo yí jihɔn gangan lɔ́ hɛn yikɔ nɛ, eyi wodra vinvin ciɖiciɖi do ɖɛ nɔ wo. 18 Wonunɔ enyɔ gangan ciwo mɛ nyɔna ɖekɛ dele o. Wosɔ gbaza mɛ drowo koɖo ŋta ci woshin yí le enudɔndɔn wakɔ* blenɔ mɛ ciwo enyi yinɛ yí woshi nɔ mɛ ciwo yí nɔkɔ agbe dɔndɔn yɛ nɛ. 19 Ci woɖokɔ gbe nɔ wo mɔ woakpɔ vovo can ɔ, wowoŋtɔwo nyi hwashi nɔ enudɔndɔnwawa; ɖo nɔ woɖu mɛɖe jiɔ, hwashi enyi nɔ mɛ ci yí ɖu ji.* 20 Le nyɔnɔnwi mɛɔ, nɔ wowa ɖaŋ jeshi Axwetɔ koɖo Hwlɛngantɔ Yesu Kristo ɖɛ nywiɖe yí shi nɔ eɖyixoxo xexe lɔ tɔ gbɔxwe yí gbevayi tɔ enu cɛwo wawa ke yí enu lɔwo ɖu wo jiɔ, lé woavale do le vɔvɔnu anyina sɔwu lé wole doŋkɔ sa. 21 Nɔ wodewa ɖaŋ jeshi enujɔjɔɛwawa mɔ lɔ ɖɛ sa nywiɖeɔ, ányɔ nɔ wo sɔwu ci wojeshi gan yí trɔ gbeɖe ese kɔkɔɛ ci wodo nɔ wo ɖɛ. 22 Enu ci yí jɔ do wo ji dasɛ mɔ elo cɛ ci wodonɔ ɖyi wo nu: “Avu trɔ yi yiŋtɔ tru gbɔ yí eha ci wole eshi nɔ gbetrɔ vayi blibliɛ le baba mɛ.”