Jilawo, mína mɔnukpɔkpɔ nywitɔ míwo viwo nɔ enu aje ji nɔ wo

Jila ciwo yí shinɔ Mawu jinɔ mɔ yewoavakpɔ yewo viwo yí woavanyi Yehowa sɛntɔ egbejinɔtɔwo. Jilawo atɛnŋ akpedo wo nu yí woavanyi Yehowa sɛntɔwo, nɔ wona Bibla nukplamuwo kpɔ ŋsɛn do wowo viwo jiwo ji so vihwɛ kɛnni mɛ. (2Ese 6:7; Elo 22:6) Edɔ cɛ wawa deʒan amɛɖekisɔsɔsavɔn ba? Ɛɛ, éʒan taŋ! Vɔ, nyɔna lɔwo wugan wu agblajeje lɔwo sesese.​—3 Ʒan 4. 

Jilawo atɛnŋ akpla nu sugbɔ so Ʒozɛfu koɖo Mari gbɔ. Ʒozɛfu koɖo Mari ‘yinɔ Ʒeruzalɛmu nɔ Paki xweɖuɖu exwe ɖeshiaɖe,’ nɔ enu cɛ wawa biɔ agbla sugbɔ jeje koɖo eho sugbɔ zanzan can. (Lk 2:41) Kankandojitɔɔ, wosɔ wowo xomu gbɔngbɔnmɛ ʒanwo ɖo texwe ŋkɔtɔ. Ahanke le egbɛmɛɔ, jilawo atɛnŋ adasɛ emɔ nɔ wowo viwo, nɔ wozankɔ mɔnukpɔkpɔ ɖeshiaɖe yí kplakɔ nu wo to nuxuxoxo koɖo kpɔwɛ nywi ɖoɖo ji.​—Eha 127:3-5.

KPƆ VIDEO CI YÍ NYI WOZAN MƆNUKPƆKPƆ ÐESHIAÐE, KEŊ ANA ÐOŊCI NƆ ENYƆBIƆSE CIWO YÍ GBƆKƆ:

• Lé Jon koɖo Sharon Schiller sɔ Fyɔɖuxu lɔ nuwo ɖo texwe ŋkɔtɔ le wowo xomu lɔ hɛnhɛn mɛ doɔ?

• Nyi yí taɖo jilawo ɖo atrɔ ashi le wowo kplananawo nu nɔ asɔgbe koɖo evi ɖekaɖekaɔ?

• Lé jilawo atɛnŋ akpedo wowo viwo nu yí woaɖu xɔse tetekpɔwo ji doɔ?

• Yehowa habɔbɔ dɔwanu ciwo yí mízan yí sɔ kpedo míwo viwo nu yí woshin le gbɔngbɔnmɛɔ?