Jajɛwo: ‘Mído vevi nu le edɔ nywiwo wawa mɛ’

Le gbɔngbɔnmɛ lɛta ci apostolo Pɔlu ŋwlɛn nɔ Titu mɛɔ, éŋwlɛn nu nɔ jajɛwo, ciwo mɛ Titu can le mɔ woɖo awa ci ji wokpe keŋ anyi “kpɔwɛ . . . toto [edɔ] nywiwo wawa mɛ le emɔ ɖeshaɖe nu.” (Tit 2:​6, 7) Le yiyimɛ le eta lɔ ke mɛɔ, énu mɔ Yesu akɔ Yehowa mɛwo ŋci. Eyi taɖo woɖo ‘ado vevi nu le edɔ nywiwo wawa mɛ.’ (Tit 2:14) Mawu Fyɔɖuxu lɔ dradra koɖo enukplakpla amɛwo so nu nyi ɖeka le edɔ nywi lɔwo mɛ. Nɔ jajɛ ènyi ɖe, àtɛnŋ azan jajɛmɛ ŋsɛn ao tɔ asɔ sumɔ shigbe kpedonu mɔɖetɔ abi gashiagamɛ mɔɖetɔ hannɛa?​—Elo 20:29.

Nɔ èji mɔ yeanyi emɔɖetɔɔ, wa toto ŋtɔŋtɔ ci yí akpedo eo nu nɔ nasun ji awɛ. (Lk 14:​28-30) Le kpɔwɛ mɛ, nɔ èvawakɔ gashiagamɛ sumɔsumɔdɔ lɔ ɖe, lé àwɛ akpɔ eoŋtɔ hozanzan nyɔwo gbɔɔ? Lé àwɛ akpɔ gaxoxo ci wobiɔ mɔ emɔɖetɔwo le nanɔɔ? Do gbe ɖaɖa nɔ Yehowa mɔ yi le kpedo ye nu. (Eha 37:5) Kan seŋ so ao toto lɔ nu koɖo ao jilawo koɖo mɛ ciwo yí wakɔ emɔɖeɖedɔ lɔ nywiɖe. Le yi goduɔ, tɔ enu ciwo yí ana àɖo ao tajinu lɔ gbɔ wawa. Yehowa acu shi do egbla ciwo èdokɔ veviɖe le sumɔsumɔdɔ yi tɔ lɔ mɛ ji dandan!

KPƆ VIDEO CI YÍ NYI JAJƐ CIWO YÍ KANFUKƆ YEHOWA, KEŊ ANA ÐOŊCI NƆ ENYƆBIƆSE CIWO GBƆGBƆ:

• Cukaɖa ciwo ji mɛɖewo ɖu gbɔxwe yí vanyi emɔɖetɔwoɔ, yí lé wowɛ doɔ?

• Lé jilawo atɛnŋ akpedo wowo viwo nu do nɔ woavanyi gashiagamɛ mɔɖetɔwoɔ?

• Nyi yí taɖo totowawa nɔ kunuɖeɖedɔ lɔ le veviɖeɔ?

• Lé hamɛ lɔ mɛ tɔwo atɛnŋ ado ŋsɛn emɔɖetɔ ɖe yí agbekpedo nu doɔ?

• Nyɔna ciwo emɔɖetɔwo kpɔnɔɔ?