Èle gbesɔsɔ ado alɔ wema mɛ ayi Fyɔɖuxu ŋɛnywidratɔwo suklua?

Gashiagamɛ sumɔsumɔdɔwatɔ ci yí le xwe wivɔntɔn yi kahowihoatɔn gblagblamɛ ènyia? Èle sɛnsinɖea? Àsun ji ayi fiɖekpokpui ci yí kunuɖeɖedɔɔ sugbɔ lea? Nɔ èlɔn nyɔ cɛ ciwo wobiɔ se ɖe, èbu alɔdodo wema mɛ keŋ ayi Fyɔɖuxu ŋɛnywidratɔwo suklu kpɔa? So hwecinu wotɔ suklu cɛ jiɔ, nɔvi sugbɔsugbɔ do alɔ wemaa mɛ. Nɔvi lɔwo nyi asu koɖo ashiwo, nɔviŋsu trɛnnɔ koɖo nɔvinyɔnu trɛnnɔwo. Ci enyi ahan can ɔ, mìgbejijiɛ mɔ nɔviŋsu sugbɔ ciwo yí nyi trɛnnɔwo le do alɔ yi mɛ. Biɔ Yehowa mɔ, yi le wɛ nɔ sukluɔ yiyi adro ye sugbɔ doji keŋ nɔ yeasun ji ato Eviɛ fɔ ji. (Ehajiji Wema 40:8; Matie 20:28; Ebretɔwo 10:7) Nɔ èwa yɛ ɖegbɔɔ, tekpɔ akpɔ lé àwɛ aɖe ŋciwo yí le kɔ nɔ kpɔtɔ keŋ asun ji avayi suklu lɔ.

Ci mɛɖewo yi suklu cɛ ɖegbɔ ɖe, edɔ ciwo wovasun ji yí wa nɔ Yehowaɔ? Wosɔ mɛɖewo ɖaɖa eju ciwo mɛ wodedonɔ wowo gbewo le o. Wogbesɔ mɛɖewo yí enyi jugbajakunu wowo ɖenɔ le jugan ganganwo mɛ. Wogbesɔ mɛbuwo yí wonyi ekán lɔ mɛ hamɛwo jikpɔtɔwo, ekán lɔ mɛ hamɛwo jikpɔtɔ kpedonutɔwo koɖo eŋɛnywidratɔ ejugodutɔwo. Nɔ èle lé àwɛ awa dɔ sugbɔ nɔ Yehowa bukɔ kpɔɔ, le gbesɔsɔ shigbe enyɔnuɖɛtɔ Ezai nɛ. Énu mɔ: “Nyɛ ke le lɛ. Dɔ ŋ ɖaɖa!”—Ezai 6:8.

MÍKPƆ VIDEO CI YÍ NYI EŊƐNYWIDRATƆ EJUGODUTƆWO LE DƆ WAKƆ LE JINUKUSƆSƆ LƆ MƐ, KEŊ AÐO NYƆBIƆSE CIWO YÍ GBƆGBƆ ŊCI:

• 

  Lé wosɔnɔ mɛ ciwo yí nyinɔ eŋɛnywidratɔ ejugodutɔwo doɔ?

• 

  Edɔ ciwo yí eŋɛnywidratɔ ejugodutɔwo wanɔɔ?

• 

  Ele ciwo woɖunɔ le ejugodu ŋɛnywidradradɔɔ mɛɔ?