Kando ji mɔ woahwlɛn mì gan le xexe cɛ vɔvɔnu

Dagbejinjin o, Yehowa ado ʒinxo ɖegbɔ nɔ xexe cɛ. Woagu ŋsusɛnsɛnwo. Jukɔnwo gbɛbɔbɔ ɖeka aje Mawu mɛwo ji eyi Yehowa awu nuvwinwatɔwo le Armagedɔn hwenu. Kristotɔwo kpɔkpɔ emɔ nɔ enujɔjɔ vevi cɛwo.

Le nyɔnɔnwi mɛɔ, mìdenya enuwo pleŋ so efunkpekpe gangan lɔ nu o. Le kpɔwɛ mɛ, mìdenya hwenu atɔ ji teŋ o. Mìdenya nyɔ ci jiɖuɖuwo anu yí aje sɛnsɛnwo ji o. Nɔ jukɔnwo je Mawu mɛwo jiɔ, mìdenya hwenu nɛni axɔ koɖo ŋciwo woawa koɖo wo o. Eyi ahanke mìdenya ŋci koŋ Yehowa azan yí asɔ gu amɛ baɖawo le Armagedɔn o.

Ele ahan gan, Enuŋwlɛŋwlɛ lɔwo nu enyɔ ciwo pleŋ mìʒan yí agbe dɔn akpan ŋkɔ esɔ mɛ koɖo kankandoji. Le kpɔwɛ mɛ, mìnya mɔ mìle agbe le ŋkeke kpɛtɛkpɛtɛwo mɛ nɔ “ŋkeke vɔvɔ” lɔwo. (2Tim 3:1) Mìnya mɔ Mawu aɖe ŋkeke ci woaje sɛnsɛnwo ji “kpɔtɔ” nɔ sɛnsɛn adodwi lɔ ŋgbegu o. (Mt 24:22) Mìnya mɔ Yehowa ahwlɛn yi mɛwo gan. (2 Piɛ 2:9) Yí mìgbenya mɔ mɛ ci Yehowa sɔ mɔ yɛ le wu amɛ baɖawo yí aglɔn ta nɔ amɛ ahwa lɔ le Armagedɔn mɛ nyi amɛjɔjɔɛ yí gbeɖo ŋsɛn.—Enyɔ 19:11, 15, 16.

Kankandoji li mɔ ŋciwo yí ajɔ le esɔ mɛ adɔ amowo “aku koɖo vɔnvɔn.” Gan nɔ mìhlɛnnɔ nu so amɛhwlɛnhwlɛngandɔ ciwo Yehowa wa vayi koɖo ŋciwo emɔ yeavawa le esɔ mɛ yí bunɔ tamɛ kpɔ so wo nuɔ, mìatɛnŋ “aso jete yí a kɔ mìwo eta yì eji,” ɖo mìkando ji mɔ mìwo hwlɛngan gogo.—Lk 21:26, 28.